ជាតិ
មនុស្សប្រមាណ១១.៧លាននាក់នៅអាស៊ីប៉ាស៊ីហ្វិក មានជនរងគ្រោះដោយសារការជួញដូរ
×![]()
ដោយ: ខន ចំប៉ា
ប្រទេសមហាអនុតំបន់ទន្លេមេគង្គ រួមមានកម្ពុជា ឡាវ ថៃ វៀតណាម ភូមា និងប្រទេសចិន បានអះអាងជាថ្មី ពីការប្តេជ្ញាចិត្តរបស់ខ្លួន ក្នុងដើម្បីលុបបំបាត់ការជួញដូរមនុស្សនៅក្នុងប្រទេសមហាអនុតំបន់ទន្លេមេគង្គ។ ការប្រកាសនេះ ត្រូវបានធ្វើឡើងនៅក្នុងកិច្ចប្រជុំនៅ ក្នុងកិច្ចប្រជុំថ្នាក់រដ្ឋមន្ត្រីលើកទី៤ នៃការសម្រួលសម្រួលគំនិតផ្តួចផ្តើមថ្នាក់រដ្ឋមន្ត្រីប្រឆាំងការជួញដូរមនុស្ស ហៅកាត់ថា ខមមីត កាលពីថ្ងៃទី ៣០ខែមេសា។
តាមរយៈសេចក្តីប្រកាសរួមរបស់កិច្ចប្រជុំនេះ ក្រោមចំណងជើងថា«ការលុបបំបាត់រាល់ទម្រង់ធ្វើអាជីវកម្ម ទិញ លក់ ចាប់ពង្រត់ បង្ខំឲ្យរៀបការ និងកេងប្រវ័ញ្ញធ្ងន់ធ្ងរ ដែលប្រាសចាកពី ការគោរពសិទ្ធិជាមូលដ្ឋានរបស់មនុស្ស» លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចកានារី បានមានប្រសាសន៍ថា៖«ការជួញដូរមនុស្សជាឧក្រិដ្ឋកម្មដ៏យង់ឃ្នង ដូច្នេះយើងត្រូវធានាថាកិច្ចអន្តរាគមន៍ទាំងអស់ត្រូវធ្វើឡើងដោយយកចិត្តទុកដាក់ និងផ្តល់អាទិភាពលើបញ្ហាជនរងគ្រោះ ព្រមទាំងការពារសិទ្ធិរបស់ពួកគេ»។
លោកស្រីបន្តថា៖«ប្រទេសដែលជាគោលដៅទេសន្តរប្រវេសន៍ត្រូវធានានូវកិច្ចគាំពារ និងលក្ខខណ្ឌការងារសម្រាប់ពលករទេសន្តរប្រវេសន៍ទាំងនោះ ដើម្បីទប់ស្កាត់ពីការកេងប្រវ័ញ្ញពលកម្ម ហើយដើម្បីឲ្យការទប់ស្កាត់អំពើជួញដូរមនុស្សប្រកបដោយជោគជ័យ ក៏ទាមទារផងដែរឲ្យមានការបង្កើនកិច្ចខិតខំប្រឹងប្រែងកាត់បន្ថយភាពក្រីក្រ ធ្វើឲ្យប្រសើរឡើងនូវការវិនិយោគក្នុងប្រទេស និងតំបន់ដែលជាលំហូរចេញនៅអំពើជួញដូរមនុស្ស និងប្រសិទ្ធិភាពនៃការដាក់ទោសឧក្រិដ្ឋជន»។
អង្គការពលកម្មអន្តរជាតិ ILO បានប៉ាន់ស្មានថាមានមនុស្សប្រហែល២០.៩លាននាក់នៅទូទាំងពិភពលោក គឺជាជនរងគ្រោះនៃពលកម្មដោយបង្ខំ និងការកេងប្រវ័ញ្ញផ្លូវភេទ ក្នុងនោះមានស្ត្រី និងក្មេងស្រី៥៥ភាគរយ (១១.៤លាននាក់) និងកុមារប្រមាណ២៥ភាគរយ (៥.៥លាននាក់) គឺជាជនរងគ្រោះ ដោយអំពើជួញដូរមនុស្ស។
សេចក្តីប្រកាសព័ត៌មានរបស់រដ្ឋាភិបាលនៃប្រទេសមហាអនុតំបន់ទន្លេមេគង្គ បានឲ្យដឹងថា អាស៊ីប៉ាស៊ីហ្វិកមានជនរងគ្រោះដោយសារការជួញដូរច្រើនជាងពាក់កណ្តាលនៃជនរងគ្រោះនៅក្នុងពិភពលោក ដោយបច្ចុប្បន្នមានរហូតដល់ទៅ១១.៧លាននាក់។ ក្នុងចំណោមជនរងគ្រោះរាប់លាននោះ មានជនរងគ្រោះដោយការជួញដូរធ្ងន់ធ្ងរបំផុតគឺមកពីប្រទេសក្នុងមហាអនុតំបន់ទន្លេមេគង្គ។
ពលកម្មដោយបង្ខំលើទូកនេសាទ និងឧស្សាហកម្មសមុទ្រ រោងចក្រ កសិកម្ម និងផ្នែកសំណង់ ស្ត្រី និងក្មេងស្រីមួយចំនួនធំត្រូវគេធ្វើអាជីវកម្មផ្លូវភេទ ទាសភាពការងារតាមផ្ទះ ឬអាពាហ៍ពិពាហ៍ដោយបង្ខំ ការបង្ខំកុមារឲ្យសុំទាន ការដកហូត និងការបាត់ឱកាសរស់នៅដែគ្មានអំពើហិង្សា ព្រមទាំងការទទួលបានប្រាក់កំរៃសមរម្យ សុទ្ធតែ ជារូបភាពជីវភាពរបស់ជនរងគ្រោះទាំងនោះ នៅពីក្រោយការជួញដូរ។ នេះបើតាមសេចក្តីប្រកាសព័ត៌មានដដែល៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
