ជាតិ
នយោបាយជាតិ
លោក សម រង្ស៊ី បកស្រាយប្រាប់លោក ហ៊ុន សែន ថា ឃ្លីបវីឌីអូចាស់ គ្មានអត្ថន័យទេ
×
លោក សម រង្ស៊ី ប្រធានគណបក្សសង្គ្រោះជាតិ បានបកស្រាយចំពោះវីឌីអូឃ្លីបរបស់ខ្លួន ជូននាយករដ្ឋមន្ត្រី ហ៊ុន សែន វិញថា វីឌីអូឃ្លីបនោះជារឿងចាស់ គ្មានអត្ថន័យអ្វីទេសម្រាប់បច្ចុប្បន្នកាល និងអនាគត។ ហើយលោក ក៏ស្នើឲ្យលោក ហ៊ុន សែន កុំចាប់អារម្មណ៍ និងកុំផ្ដល់តម្លៃចំពោះវីឌីអូឃ្លីបនេះ។ ការបកស្រាយរបស់លោក សម រង្ស៊ី នាពេលនេះ គឺធ្វើឡើងក្រោយពីលោក ហ៊ុន សែន ចោទសួរលោក សម រង្ស៊ី ជុំវិញបញ្ហាដែលរូបលោក បានបកស្រាយរិះគន់រដ្ឋាភិបានៅក្នុងវីឌីអូឃ្លីបមួយ ដែលត្រូវបានបង្ហោះក្នុងបណ្ដាញហ្វេសបុក កាលពីថ្ងៃទី ៤ ឧសភា ឆ្នាំ២០១៥ ។ លោក ហ៊ុន សែន សួរលោក សម រង្ស៊ី ឲ្យពន្យល់ចំពោះវីឌីឃ្លីបរិះគន់រដ្ឋាភិបាលបង្ហោះឡើងជាថ្មី ខណៈដែលរូបលោក និងលោក សម រង្ស៊ី ប្រកាសអនុវត្តវប្បធម៌សន្ទនាជាមួយគ្នា។
យោងតាមសារព័ត៌មានFresh Newsលោក សម រង្ស៊ី មានប្រសាសន៍យ៉ាងដូច្នេះថា ៖ «សូមសម្តេចកុំផ្តល់តម្លៃអ្វីចំពោះវីឌីអូនេះ ដែលបានថត នៅថ្ងៃទី២០ ខែមេសា ឆ្នាំ២០១៤ នៅប្រទេសបារាំង ពីព្រោះវាជារឿងចាស់ ដែលគ្មានអត្ថន័យអ្វីទេសម្រាប់បច្ចុប្បន្នកាល និងអនាគតកាល។ ពេលនោះបរិបទនយោបាយ ពិសេសណាស់ គឺមានបញ្ហាផ្ទៃក្នុង ក្នុងជួរថ្នាក់ដឹកនាំគណបក្សសង្គ្រោះជាតិ ហើយខ្ញុំត្រូវប្រឈមមុខនឹងការចោទប្រកាន់ ថាចង់ត្រូវរូវគ្នា តែពីរនាក់ជាមួយសម្តេច»។
លោក សម រង្ស៊ី បន្ដថា៖«ទើបបន្ទាប់មក សម្តេច និងរូបខ្ញុំបានបើកទំព័រថ្មីមួយ នៃប្រវត្តិសាស្ត្ររបស់ប្រទេសកម្ពុជា នៅថ្ងៃទី២២ ខែកក្កដា ឆ្នាំ ២០១៤ នៅមន្ទីរព្រឹទ្ធសភា។ នៅថ្ងៃនោះ សម្តេច និង រូបខ្ញុំ ដែលពីអតីតកាលធ្លាប់ជាគូបដិបក្ស យើងបានចាប់ដៃគ្នា ហើយបានក្លាយទៅជាសហស្ថាបនិកនៃវប្បធ៌មសន្ទនា។ តាំងពីថ្ងៃនោះមក ខ្ញុំបានគោរពជានិច្ច នូវស្មារតី នៃវប្បធ៌មសន្ទនានេះ យ៉ាងស្មោះត្រង់ឥតខ្ចោះ ហើយមានបំណងគោរពស្មារតី នៃវប្បធ៌មសន្ទនានេះ ជារៀងរហូត»។
ចំពោះការបកស្រាយនេះលោក សម រង្ស៊ី យល់ព្រមឲ្យមានការចុះផ្សាយជាសាធារណៈផងដែរ។
ការបកស្រាយរបស់លោក សម រង្ស៊ី នេះ បានធ្វើឡើងក្រោយពីលោកនាយករដ្ឋមន្ត្រី ហ៊ុនសែន បានសរសេរសារជាភាសាខ្មែរ ផ្ញើទៅកាន់លោកសមរង្ស៊ី បន្ទាប់ពីមានវិឌីអូឃ្លីបមួយរបស់លោកសមរង្ស៊ី បានថ្លែងរិះគន់នាយករដ្ឋមន្ត្រី ហ៊ុនសែន កាលពីឆ្នាំ២០១៤ត្រូវបានគេបង្ហោះឡើងវិញតាមគេហទំព័រហ្វេសបុក កាលពីថ្ងៃទី៤ ខែមេសា ឆ្នាំ២០១៥។
ចំពោះបញ្ហាដែលនាំឲ្យលោកនាយករដ្ឋមន្ត្រី ហ៊ុន សែន ចោទសួរលោក សម រង្ស៊ីនេះ គឺដោយសារតែវីឌីអូឃ្លីបដែលលោក សម រង្ស៊ី បានរិះគន់លោក ហ៊ុន សែន កាលពីឆ្នាំ២០១៤កន្លងទៅ ត្រូវបានបង្ហោះឡើងស្របពេលដែលលោកសមរង្ស៊ី បានចាកចេញពីកម្ពុជាកាលពីថ្ងៃទី៤ឧសភា ទៅកាន់ប្រទេសកាណាដានិងអាមេរិកដើម្បីជួបជាមួយសកម្មជនអ្នកគាំទ្ររបស់ខ្លួន រយៈពេលមួយខែ ៕
© រក្សាសិទ្ធិដោយ thmeythmey.com