ជាតិ
រូបថតលោក ប៉ែន សុវណ្ណ ក្នុងពេលព្យាបាលនៅប្រទេសសិង្ហបុរី កាលពីពេលកន្លងទៅ
×![]()
ស្ថានភាពជំងឺស្លាប់មួយចំហៀងខ្លួនរបស់លោក លោក ប៉ែន សុវណ្ណ ក្រោយព្យាបាលអស់រយៈពេលជិត ៤ ខែមកនេះ នៅតែមិនទាន់ធូរស្រាលគួរឲ្យកត់សម្គាល់ឡើយ ។ បច្ចុប្បន្នអតីតនាយករដ្ឋមន្ត្រីខ្មែរសម័យសាធារណៈរដ្ឋប្រជាមានិតកម្ពុជារយៈពេល ៦ ខែរូបនេះនៅតែមិនទាន់អាចនិយាយ និងកម្រើកខ្លួនបានដដែល ។ លោក បែន សុវណ្ណ កំពុងស្ថិតនៅក្រោមការថែទាំពីសំណាក់កូនធម៌របស់ខ្លួន ក្នុងក្រុងដូនកែវ ខេត្តតាកែវ ។
ជិត ៤ ខែមកហើយ ដែលលោកអតីតនាយករដ្ឋមន្ត្រីខ្មែរក្នុងឆ្នាំ ១៩៨១ មានជំងឺស្លាប់មួយចំហៀងខ្លួន ចាប់តាំងពីថ្ងៃទី ១៩ មករា ឆ្នាំ ២០១៥ មក ។ ថ្វីដ្បិតលោក ត្រូវគេបញ្ជូនទៅព្យាបាលនៅប្រទេសសិង្ហបុរី ហើយសាច់ញាតិយកទៅមើលថែនៅខេត្តកំណើតរបស់ខ្លួនពិតមែន តែមកដល់ពេលនេះ អាការៈជំងឺរបស់អ្នកនយោបាយមានវ័យ ៧៩ ឆ្នាំ រូបនេះ ហាក់នៅមិនទាន់ធូរស្បើយគួរឲ្យចាប់អាម្មណ៍នោះទេ ។
អ្នកថែរក្សា និងជាកូនស្រីធម៌លោក ប៉ែន សុវណ្ណ ផងនោះ កញ្ញា ប៉ែន សុទ្ធា បាននិយាយថា ស្ថានភាពជំងឺឪពុកធម៌របស់នាងមកដល់ពេលនេះ គ្រាន់តែអាចស្តាប់យល់ពីអ្វីដែលគេនិយាយ តែលោកមិនអាចនិយាយបានទេ។ « ពេលគាត់ស្តាប់យើងបាន គាត់ឲ្យសញ្ញាញញឹមបន្តិច ។ គាត់មិនអាចនិយាយបានទេ ។ ជើងគាត់ ម្ខាងអាចកម្រើកបាន តែក្រៅពីនេះ មិនបានទាំងអស់ ។ គាត់មិនអាចហូបថ្នាំតាមមាត់បានទេ តែខ្ញុំត្រូវសុងថ្នាំពេទ្យឬថ្នាំជំនួយតាមច្រមុះ ។ ពេលខ្លះខ្ញុំអាចបញ្ចុកអាហារតាមមាត់គាត់បានតិចតូច » ។ នេះជាការរៀបរាប់របស់កញ្ញា ប៉ែន សុទ្ធា ដែលបានហៅលោក ប៉ែន សុវណ្ណ ថា ឪពុកតាំងពីនាងនៅក្មេងពោលគឺចាប់ពីឆ្នាំ ១៩៩២ មក ។
កូនស្រីធម៌របស់លោក ប៉ែន សុវណ្ណ រូបនេះ បញ្ជាក់ថា សម្រាប់ការចំណាយលើការទំនុកបម្រុងដល់ការព្យាបាលថែទាំងជំងឺឪពុកខ្លួន ភាគច្រើនបានទទួលជំនួយពីប្រជាពលរដ្ឋខ្មែរនៅក្រៅប្រទេស តាមរយៈគណបក្សសង្គ្រោះជាតិ ។ ជាងនេះទៀត កញ្ញា បន្ថែមថា មេដឹកនាំគណបក្សសង្គ្រោះជាតិ ក៏ជួយជ្រោមជ្រែងក្នុងការផ្គត់ផ្គង់ឪពុកធម៌របស់ខ្លួនផងដែរ។ ប៉ែន សុទ្ធាបរិយាយដូច្នេះថា ៖« លោក សម រង្ស៊ី និងលោក កឹម សុខា លោកទាំងពីរប្រាប់ខ្ញុំថា បើខ្វះខាតអ្វី ត្រូវប្រាប់ពូកគាត់ ហើយពួកគាត់នឹងជួយ » ។
យ៉ាងណាក៏ដោយចុះ ពាក់ព័ន្ធនឹងតំណែងរបស់ខ្លួនវិញ ថ្វីដ្បិតតែពេលនេះលោក ប៉ែន សុវណ្ណ មិនអាចដើរ និងនិយាយបានក្តី ក៏គណបក្សសង្គ្រោះជាតិ មិនដកឈ្មោះរូបលោកចេញពីតំណាងរាស្ត្រមណ្ឌលកំពង់ស្ពឺគណបក្សនេះដែរ។ ពីព្រោះ លោក ប៉ែន សុវណ្ណ ជាមនុស្សមានគុណូបការៈច្រើនសម្រាប់គណបក្ស ហើយម្យ៉ាងទៀតពេលនេះរូបលោកកំពុងសម្រាកព្យាបាលជំងឺ។ នេះបើតាមការបញ្ជាក់របស់លោក យឹម សុវណ្ណ អ្នកនាំពាក្យគណបក្សសង្គ្រោះជាតិ កាលពីពេលកន្លងទៅ ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
