ជាតិ
សង្គមជាតិ
អ្នកនាំពាក្យ៖ អាជ្ញាធរកំពុងរៀបចំឲ្យជនរងគ្រោះដាក់ពាក្យទាមទារសំណងរដ្ឋប្បវេណី ករណីបាញ់ពលរដ្ឋខ្មែរស្លាប់
×
ភ្នំពេញ៖ សំណុំរឿងថៅកែជនជាតិថៃបាញ់ពលរដ្ឋខ្មែរម្នាក់ នៅក្នុងខេត្តឆាក់ឆឺនសៅ ប្រទេសថៃ កន្លងមកនេះ កំពុងស្ថិតក្នុងដៃរបស់តុលាការថៃនៅឡើយ។ ទាក់ទិននឹងបញ្ហានេះ អ្នកនាំពាក្យក្រសួងការបរទេស លោក កុយ គួង បានឲ្យដឹងថា បច្ចុប្បន្ននេះ អាជ្ញាធរទូតកម្ពុជា បាននឹងកំពុងសហការជាមួយភាគីថៃ ក្នុងការរៀបចំឲ្យភាគីគ្រួសារសពជនរងគ្រោះដាក់ពាក្យ បណ្តឹងទាមទារ សំណងរដ្ឋប្បវេណីផងដែរ។
មានសំឡេង
អាជ្ញាធរក្រសួងការបរទេសកម្ពុជាកំពុងបន្តពន្លឿនលើសំណុំរឿងថៅកែជនជាតិថៃបាញ់ ពលរដ្ឋខ្មែរស្លាប់នាពេលកន្លងមក។ អ្នកនាំពាក្យក្រសួងការបរទេស កុយ គួង បានឲ្យដឹងថា អាជ្ញាធរទូតកម្ពុជា កំពុងសហការជាមួយអាជ្ញាធរថៃ ក្នុងករណីមនុស្សឃាតរនេះ ដោយអាជ្ញាធរប្រទេសទាំងពីរ កំពុងជួយរៀបចំឯកសារដល់តុលាការថៃ។ ហើយថា ជនល្មើសដែលបាញ់ពលរដ្ឋខ្មែរនោះ ត្រូវបានតុលាការព្រហ្មទណ្ឌថៃសម្រេចឃុំខ្លួនបណ្តោះ អាសន្នក្នុងពន្ធនាគារហើយដែរ។
អ្នកនាំពាក្យរូបនេះ បន្ថែមថា ថៅកែជនជាតិថៃរូបនោះ បានស្នើរតម្កល់លុយចំនួន ៦០ ម៉ឺនបាត ស្មើរនឹងប្រមាណ ២ម៉ឺនដុល្លារអាមេរិក ដើម្បីធានានៅក្រៅឃុំផងដែរ។
ទោះជាយ៉ាងណា លោកបញ្ជាក់ថា ក្រសួងការបរទេសកម្ពុជានៅតែទាមទារតុលាការថៃ យកជនល្មើសនោះ ទៅដាក់ទោសតាមច្បាប់ដដែល។ ជាមួយគ្នានេះ លោក កុយ គួង បានបន្ថថា អាជ្ញាធរភាគីទាំងពីរ បាននឹងកំពុងរៀបចំឯកសារឲ្យគ្រួសារសព ជនរងគ្រោះដាក់ពាក្យបណ្តឹងទាមទារសំណងរដ្ឋប្បវេណីផងដែរ។
គួររម្លឹកថា កាលពីថ្ងៃទី ២៣ មេសាកន្លងមក ពលករខ្មែរម្នាក់ឈ្មោះ ផាត សុអ៊ិន អាយុ២៤ឆ្នាំ មានស្រុកកំណើតក្នុងស្រុកបរិបូណ៍ ខេត្តកំពង់ឆ្នាំង ត្រូវបានមេកាថៃម្នាក់ ឈ្មោះ តា យ៉ៃ បាញ់សម្លាប់ នៅឃុំបានសុង ស្រុកភ្នំសារខាម ខេត្តឆាក់ឆឺនសៅ ប្រទេសថៃ ព្រោះតែខឹងនឹងជនរងគ្រោះ លេងជាមួយក្មេងភូមា បណ្តាលឱ្យឪពុករបស់ក្មេងខឹង ប្តឹងដល់លោកមេការ៕
© រក្សាសិទ្ធិដោយ thmeythmey.com