ជាតិ
សង្គមជាតិ
អត្រាយុវជនសេពគ្រឿងស្រវឹងនៅកម្ពុជា កាន់តែច្រើនឡើង
× នាពេលបច្ចុប្បន្ន គេឃើញថាប្រជាពលរដ្ឋខ្មែរយើងដ៏ច្រើនលើសលុបជាពិសេសពលរដ្ឋពេញវ័យរហូតដល់ច្រើនជាង៥០% ក្នុងនោះ មានបុរស ៧០% និងស្ត្រី ២៣%ដែលទទួលទានគ្រឿងស្រវឹង ។ នេះបើតាមលទ្ធផលនៃការស្ទង់មតិប្រជាពលរដ្ឋស្តីពីគ្រឿងស្រវឹង ដែលធ្វើឡើងក្នុងអំឡុងពេល១២ខែ ក្នុងឆ្នាំ២០១៤ ដោយសាកលវិទ្យាល័យភូមិន្ទភ្នំពេញ ក្រោមការទាំគ្ររបស់អង្គការសុខភាពពិភពលោក អង្គការចលនាដើម្បីសុខភាពកម្ពុជា និងដៃគូសុវត្ថិភាពចរាចរផ្លូវគោកសាកល ។
ឥទ្ធិពលនៃការឃោសនាពាណិជ្ជកម្មគ្រឿងស្រវឹងតាមប្រព័ន្ធផ្សព្វផ្សាយនានា មានទូរទស្សន៍ វិទ្យុនិងបណ្តាញទាក់ទងសង្គមផ្សេងៗ ដូចជាហ្វេសប៊ុក យូធូប ស្វិតធើ ព្រមទាំងមធ្យោបាយដទៃទៀតដូចជាការប្រគំតន្ត្រីសាធារណៈ ទស្សនាវដ្តី កាសែត ផ្ទាំងប៉ាដូ និងផ្ទាំងបដាតាមដងផ្លូវ គឺជាមូលហេតុដ៏ចម្បងមួយ ដែលជំរុញឲ្យមានចំនួនអ្នកទទួលទានគ្រឿងស្រវឹងនៅកម្ពុជាកើនឡើងច្រើនគួរឲ្យកត់សម្គាល់នាពេលបច្ចុប្បន្ន ។
ថ្លែងក្នុងសិក្ខាសាលាស្តីពីគ្រឿងស្រវឹង និងវិធានការកាត់បន្ថយការប្រើប្រាស់ កញ្ញា ម៉ក់ ទេវិន្ទ ប្រធានគម្រោង អង្គការចលនាដើម្បីសុខភាពកម្ពុជា បានសង្កត់ធ្ងន់ថា មូលហេតុសំខាន់ៗដែលបណ្តាលឲ្យចំនួនប្រជាជនច្រើនទទួលទានគ្រឿងស្រវឹង គឺបណ្តាលមកពីការផ្សព្វផ្សាយ និងការដាក់លក់គ្រឿងស្រវឹងតាមគ្រប់មធ្យោបាយ ហើយតម្លៃគ្រឿងស្រវឹងក៏ថោកដែលជាហេតុនាំឲ្យប្រជាជនអាចមានលទ្ធភាពច្រើនក្នុងការទិញគ្រឿងស្រវឹង។
លើសពីនេះទៅទៀត តំណាងក្រសួងសុខាភិបាល លោកវេជ្ជបណ្ឌិត សុខ គង់ អនុប្រធានការិយាល័យជំងឺមិនឆ្លង នៃនាយកដ្ឋានការពារសុខភាព អះអាងថា មូលហេតុដែលប្រជាពលរដ្ឋប្រើប្រាស់គ្រឿងស្រវឹងច្រើន គឺដោយសារតែ ពួកគេមានឱកាសពិសារគ្រឿងស្រវឹងច្រើន ។ លោកវេជ្ជបណ្ឌិតរូបនេះបញ្ជាក់ថា៖ «ស្ទើរគ្រប់កន្លែង ស្ទើរគ្រប់ពេល មានលក់គ្រឿងស្រវឹង ហើយប្រជាពលរដ្ឋយើងស្ទើរគ្រប់វ័យអាចពិសារគ្រឿងស្រវឹង» ។ លោកបន្ថែមទៀតថា វប្បធម៌ និងផ្នត់គំនិតក្នុងសង្គមខ្មែរយើង ក៏ជាហេតុបណ្តាលឲ្យកើនឡើងនូវចំនួនអ្នកពិសាគ្រឿងស្រវឹងដែរ ។ អ្នកខ្លះមិនចេះផឹកស្រា ត្រូវបានគេសើចចំអកឡកឡឺយ ថាមិនមែនជាកូនប្រុស ឬក៏ថាមិនចង់រាប់អានគេជាមិត្ត ជាសាច់ញាតិទើបមិនញ៉ាំស្រាជាមួយគេ ហេតុនេះ អ្នកមិនដែលញ៉ាំស្រា ត្រូវបង្ខំញ៉ាំទាំងខ្លួនឯងមិនចេះ រហូតដល់ចេះ។
ទាក់ទងនឹងការកើនឡើងនូវចំនួនអ្នកទទួលទានគ្រឿងស្រវឹង លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានពន្យល់ថា ដើម្បីកាត់បន្ថយនូវការប្រើប្រាស់គ្រឿងស្រវឹង អង្គការសុខភាពពិភពលោកបានដាក់ចេញនូវវិធានដ៏មានប្រសិទ្ធភាព៤យ៉ាង ។លោក មុំ គង់ បញ្ជាក់ពីវិធានការណ៍ទាំង ៤ នោះយ៉ាងនេះថា៖ « ១. ហាមប្រាមការផ្សព្វផ្សាយគ្រឿងស្រវឹងតាមប្រព័ន្ធផ្សព្វផ្សាយនានា ដូចជាទូរទស្សន៍ វិទ្យុជាដើម ។ ២. ដំឡើងព័ន្ធលើផលិតផលគ្រឿងស្រវឹង ដែលជាហេតុឲ្យកាត់បន្ថយការនាំចូលនូវគ្រឿងស្រវឹង ហើយក៏អាចកាត់បន្ថយចំនួនអ្នកប្រើប្រាស់ ម្យ៉ាងទៀតរដ្ឋក៏ទទួលបានប្រាក់ចំណូលច្រើនផងដែរ៣. កំហិតការលក់គ្រឿងស្រវឹង មានន័យថា កន្លែងប្រភេទណា និងពេលណា ដែលត្រូវអនុញ្ញាតឲ្យលក់ និងមិនអនុញ្ញាតឲ្យលក់៤. កំណត់អាយុក្នុងការទទួលទានគ្រឿងស្រវឹង និងហាមប្រាមអ្នកលក់មិនឲ្យលក់គ្រឿងស្រវឹងដល់កុមារ » ៕
© រក្សាសិទ្ធិដោយ thmeythmey.com