ជាតិ
បទវិភាគ
សីលធម៌គ្រូពេទ្យ នៅតែជាក្តីកង្វល់របស់អ្នកជំងឺក្រីក្រ!
×
ជាញឹកញាប់គេតែងតែឮពាក្យត្អូញត្អែររបស់ប្រជាជន អំពីទង្វើអសីលធម៌របស់ក្រុមគ្រូពេទ្យខ្មែរមួយចំនួន នៅពេលដែលពួកគេទៅរកសេវាព្យាបាលសុខភាពរបស់រដ្ឋ។ ទង្វើទាំងអស់នោះមានដូចជា ការនិយាយស្តីជាមួយអ្នកជំងឺដោយពាក្យសម្តីមិនសមរម្យ ការរើសអើងអ្នកជំងឺ និងការយកលុយជាធំ ជាដើម ។ សកម្មភាពទាំងនេះ សុទ្ធតែផ្ទុយនឹងក្រមសីលធម៌របស់គ្រូពេទ្យ ដែលគ្រោះថ្នាក់សម្រាប់សង្គម និងប្រជាជន តម្រូវឲ្យស្ថាប័នពាក់ព័ន្ធមានវិធានការដោះស្រាយជាបន្ទាន់។
សូមស្តាប់លោក ជា ធីរិទ្ធ!
សមត្ថភាពនៅមានកំរិតរបស់ក្រុមគ្រូពេទ្យខ្មែរ កង្វះបច្ចេកទេស និងសម្ភារព្យាបាលជារឿងមួយ ដែលប្រជាជនខ្មែរយល់ថា វាជាហេតុផលសមរម្យ អាចទទួលយកបាន ។ ក៏ប៉ុន្តែទន្ទឹមនឹងខ្វះខាតនៅបញ្ហានេះហើយ ក្រុមគ្រូពេទ្យខ្មែរមួយចំនួន នៅតែបង្កើតបញ្ហាជាន់លើបញ្ហា ដែលប្រាសចាកពីវិជ្ជាជីវៈ និងក្រមសីលធម៌របស់ខ្លួន និងសេចក្តីថ្លៃថ្នូររបស់មនុស្ស។ ស្ទើររាល់ពេលប្រជាពលរដ្ឋខ្មែរជាពិសេសពលរដ្ឋដែលក្រីក្រ ដែលមានជំងឺ ហើយទៅរកសេវាព្យាបាលរបស់រដ្ឋ តែងតែត្អូញត្អែរពីទុក្ខលំបាក និងរិះគន់សកម្មភាពមិនសមរម្យរបស់ក្រុមគ្រូពេទ្យមកលើពួកគេ ។
បញ្ហាក្នុងវិស័យសុខាភិបាលរបស់រដ្ឋ ដែលជាក្តីកង្វល់របស់ពលរដ្ឋបច្ចុប្បន្នមានជាអាទិ៍ ៖ បញ្ហា ប្រើប្រាស់ពាក្យសម្តី និងអាកប្បកិរយារបស់គ្រូពេទ្យមិនសមរម្យចំពោះអ្នកជំងឺ ជាពិសេសគឺអ្នកជំងឺដែលក្រីក្រ។ នៅចំពោះមុខអ្នកជំងឺដែលក្រីក្រ គ្រូពេទ្យមួយចំនួន សម្លុតអ្នកជំងឺ ប្រមាថអ្នកជំងឺ ដែលធ្វើឲ្យពួកគេរងគ្រោះពីរដង ពោលគឺរងគ្រោះដោយសារជំងឺផង និងរងគ្រោះផ្នែកផ្លូវចិត្តដោយសារសម្តីរបស់គ្រូពេទ្យផង ។ ជាមួយគ្នានេះ បញ្ហាយកប្រាក់ជាត្រីមុខ ពោលនៅក្នុងភ្នែករបស់គ្រូពេទ្យខ្លះពោរពេញដោយទឹកលុយ។ភារកិច្ច ក្រមសីលធម៌ និងវិជ្ជាជីវៈ ពាក្យសម្បថ ត្រូវបំភ្លេចចោលទាំងស្រុង ដោយសារតែឥទ្ធិពលនៃប្រាក់ដុល្លារ។
ពេលខ្លះបើទោះបីជាអ្នកជំងឺមានស្ថានភាពធ្ងន់ធ្ងរ ដែលត្រូវទទួលការព្យាបាលជាបន្ទាន់ តែគ្រូពេទ្យមិនព្យាបាលឡើយ ប្រសិនបើអ្នកជំងឺមិនបានបង់លុយមុនទេនោះ ។ កន្លងមកមានអ្នកជំងឺមិនតិចទេ ដែលស្លាប់ដោយសារជួបស្ថានការណ៍បែបនេះ។ លើសពីនេះ កង្វះវប្បធម៌ទទួលខុសត្រូវរបស់គ្រូពេទ្យ និងបញ្ហានិទណ្ឌភាពកង្វះចំណាត់ការម៉ឺងម៉ាត់របស់រដ្ឋមន្ត្រីក្រសួងសុខាភិបាលនៅក្នុងវិស័យនេះ ក៏ជាបញ្ហាដ៏រសើបនៅក្នុងវិស័យសុខាភិបាលនៅកម្ពុជាដែរ ។
នៅចំពោះមុខបញ្ហាទាំងនេះ រដ្ឋមន្ត្រីមន្ត្រីក្រសួងសុខាភិបាល គួរប្រញាប់ប្រញាលដោះស្រាយបញ្ហានេះឲ្យបានឆាប់រហ័ស ដើម្បីបង្កើនក្តីសង្ឃឹមដល់ប្រជាជនខ្មែរ ពីព្រោះបញ្ហាទាំងនេះ មិនមែនទើបតែកើតមាននៅក្នុងវិស័យសុខាភិបាលនៅកម្ពុជានោះទេ វាជាបញ្ហាដ៏រ៉ាំរ៉ៃយូរមកហើយ ដែលប្រជាជនតែងតែជួបប្រទះ ។ វិធានការក្តៅៗមួយចំនួន ដែលក្រសួងសុខាភិបាល គួរធ្វើនោះមានដូចជា ពង្រឹងការដាក់ទណ្ឌកម្មឲ្យបានជាក់លាក់ នៅពេលដែលក្រសួងរកឃើញថា គ្រូពេទ្យ ឬមន្ទីរពេទ្យណា បានប្រព្រឹត្តអំពើមិនគប្បីលើអ្នកជំងឺ ដែលមិនគោរពទៅតាមក្រមសីលធម៌ និងវិជ្ជាជីវៈក្នុងនាមជាគ្រូពេទ្យ ។ ក្រសួងសុខាភិបាល ត្រូវតាមដានសកម្មភាពរបស់គ្រូពេទ្យនៅតាមមន្ទីរពេទ្យ ជាពិសេសគឺមន្ទីរពេទ្យរដ្ឋឲ្យមានតម្លាភាពពិតប្រាកដ គឺមិនមែនឃើញបញ្ហាកើតឡើងហើយ ក៏ក្រសួងនៅតែមិនមានចំណាត់ការ ដោយសារមន្ត្រីខិលខូចប្រព្រឹត្តអំពើពុករលួយជួយលាក់បាំងកំហុស។ និយាយឲ្យខ្លីទៅ បញ្ហាទាំងអស់នេះអាចដោះស្រាយបានឬមិនបានវាអាស្រ័យទៅលើឆន្ទៈរបស់លោករដ្ឋមន្ត្រីក្រសួង សុខាភិបាល ម៉ម ប៊ុនហេង ប៉ុណ្ណោះ ។
ក្រៅពីវិធានការរបស់ក្រសួង គ្រូពេទ្យខ្លួនឯង ដែលបំពេញភារកិច្ចក្នុងវិជ្ជាជីវៈនេះ គួរតែមានមនសិការ និងគុណធម៌ក្នុងខ្លួន ស្របតាមក្រមសីលធម៌របស់គ្រូពេទ្យ ។ ពីព្រោះ គ្រូពេទ្យ ក៏ជាជនជាតិខ្មែរ ហើយអ្នកជំងឺក៏ខ្មែរដូចគ្នា។ លើសពីនេះទៀត យុវជនជំនាន់ក្រោយ ដែលមានក្តីប្រាថ្នាចង់ក្លាយជាគ្រូពេទ្យ គួរលុបចោលផ្តត់គំនិតដែលគិតថា មូលហេតុដែលខ្លួន ចង់ក្លាយជាគ្រូពេទ្យ ព្រោះធ្វើជាគ្រូពេទ្យងាយស្រួលរកលុយ ដែលភ្លេចពីចេតនាជួយសង្គ្រោះជីវិតមនុស្សជាតិជាធំ និងក្រមសីលធម៌គ្រូពេទ្យ។
តាមពិតពាក្យសម្បថ ក្រមសីលធម៌របស់គ្រូពេទ្យ ល្មមអាចមានន័យគ្រប់គ្រាន់ ដាស់ស្មារតីគ្រូពេទ្យឲ្យមានបេះដូងគុណធម៌ចំពោះអ្នកជំងឺ ។ អនុក្រឹត្យស្តីពីក្រមសីលធម៌របស់គ្រូពេទ្យបានចែងចំណុចសំខាន់ៗដូចជា ក្នុងការប្រកបវិជ្ជាជីវៈវេជ្ជសាស្ត្រ ទោះក្នុងលក្ខណៈជាឯកជនក្តី ជាសាធារណៈក្តី គ្រូពេទ្យត្រូវគោរពជីវិត រាងកាយ និងសេចក្តីថ្លៃថ្នូររបស់មនុស្ស ។ ទោះស្ថិតនៅក្នុងកាលៈទេសៈណាក៏ដោយ គ្រូពេទ្យត្រូវតែគោរពគោលការណ៍សីលធម៌ មានជាអាទិ៍ ភាពសុចរិត ភក្តីភាពចាំបាច់ ក្នុងការប្រកបវិជ្ជាជីវៈវេជ្ជសាស្ត្រ ។
គ្រូពេទ្យមិនត្រូវបោះបង់ អាកប្បកិរិយា សុភាពរាបសា ត្រឹមត្រូវ និងយកចិត្តទុកដាក់ជួយទំនុកបម្រុងចំពោះមនុស្សដែលខ្លួនពិនិត្យ ។គ្រូពេទ្យត្រូវស្តាប់ ពិនិត្យ ឲ្យដំបូន្មាន ឬព្យាបាល ដោយសម្បជញ្ញៈ ចំពោះមនុស្សទូទៅស្មើៗគ្នា ដោយមិនប្រកាន់អំពីប្រភព ប្រពៃណី ស្ថានភាពគ្រួសារ ជាតិ សាសនា កេរ្តិ៍ឈ្មោះ ឬមនោសញ្ចេតនាអ្វីនោះឡើយ ។ គ្រូពេទ្យមិនត្រូវលះបង់ឥស្សរភាពវិជ្ជាជីវៈរបស់ខ្លួនដាច់ខាត ទោះស្ថិតនៅក្រោមរូបភាពណាក៏ដោយ ។ គ្រូពេទ្យគ្មានសិទ្ធិបង្កឲ្យមនុស្សស្លាប់ដោយចេតនានោះទេ៕
© រក្សាសិទ្ធិដោយ thmeythmey.com