ជាតិ
អាដហុកប្តឹងមន្ត្រីតុលាការខេត្តសៀមរាបលើការឃុំខ្លួនពលរដ្ឋដែលមានទំនាស់ជាមួយសហគមន៍វៀតណាម
× ភ្នំពេញ៖ សមាគមការពារសិទ្ធិមនុស្សអាដហុក (ADHOC) បានប្តឹងព្រះរាជអាជ្ញារង និងចៅក្រមស៊ើបសួរនៃសាលាដំបូងខេត្តសៀមរាបជូនថ្នាក់ដឹកនាំស្ថាប័នជាតិមានសមត្ថកិច្ច នៅថ្ងៃទី២០ ខែឧសភានេះ ។ ក្នុងពាក្យប្តឹងនោះ តំណាងអាដហុកបានចោទថា ព្រះរាជអាជ្ញារង និងចៅក្រមនោះ ចោទប្រកាន់ និងសម្រេចឃុំខ្លួនពលរដ្ឋក្នុងពន្ធនាគារដោយមិនត្រឹមត្រូវតាមច្បាប់។ ស្ថាប័នរដ្ឋធំៗដែលអាដហុកដាក់ ពាក្យបណ្តឹងនោះ រួមមាន ឧត្តមក្រុមប្រឹក្សានៃអង្គចៅក្រម ក្រសួងយុតិ្តធម៌ តុលាការកំពូល អយ្យការអមតុលាការកំពូល និងខុទ្ទកាល័យលោកនាយករដ្ឋ មន្ត្រី ហ៊ុន សែន ជាដើម។
ប្រធានផ្នែកស៊ើបអង្កេតនៃសមាគមអាដហុក លោក នី ចរិយា និងមេធាវី កញ្ញា ពូក យ៉ារ៉ាន់ បានរិះគន់មន្ត្រីតុលាការសៀមរាប ក្នុងករណីវិវាទដីធ្លីពលរដ្ឋ នៅឃុំកន្ទួត ស្រុកស្វាយលើ ខេត្ដសៀមរាប។ ប្រធានផ្នែកស៊ើបអង្កេត ADHOC និយាយថា ព្រះរាជអាជ្ញារង លោក សុក កែវបណ្ឌិត និងចៅក្រមស៊ើបសួរអមសាលាដំបូង ខេត្ដសៀមរាប លោក គី ឬទ្ធី បានឃុបឃិតគ្នា ប្រព្រឹតអំពើពុករលួយយកដីពលរដ្ឋ នៅឃុំកន្ទួត ស្រុកស្វាយលើ ខេត្ដសៀមរាប ប្រគល់ឲ្យ សហគមន៍វៀតណាម ឈ្មោះសហគមន៍តាខ្មៅអភិវឌ្ឍន៍កសិកម្ម និងឧស្សាហកម្ម ហៅកាត់ថា TCIDA ដឹកនាំដោយឈ្មោះ លី គឹមឃុន ។ លើសពីនេះ លោកបន្តថា៖«មន្ត្រីតុលាការខាងលើ បានសម្រេចឃុំពលរដ្ឋដាក់ពន្ធនាគារដោយអនុវត្តន៍ខុសនីតិវិធី»។
ថ្លែងនៅក្នុងសន្និសីទសារព័ត៌មាន ក្នុងទីស្នាក់ការកណ្តាលសមាគមអាដហុក នៅថ្ងៃទី២០ ខែឧសភានេះ ប្រធានផ្នែកស៊ើបអង្កេត ADHOC លើកឡើងថា រយៈពេលជិត ៥ខែហើយដែលតុលាការខេត្តសៀមរាប សម្រេចឃុំខ្លួនបុរស ២នាក់ជាអ្នកភូមិជប់រំដេង ឃុំកន្ទួត ស្រុកស្វាយលើ ឲ្យជាប់ពន្ធនាគារជាបណ្ដោះអាសន្ន ដោយសារតែមានជម្លោះដីធ្លីជាមួយសហគមន៍វៀតណាម ឈ្មោះ តាខ្មៅអភិវឌ្ឍន៍កសិកម្ម និងឧស្សាហកម្ម។
មេធាវីរបស់សមាគមការពារសិទ្ធិមនុស្សអាដហុក កញ្ញា ពូក យ៉ារ៉ាន់ បានចាត់ទុកថា តុលាការដែលសម្រេចឃុំខ្លួនអ្នកភូមិជប់រំដេង ទាំង ២នាក់នោះ គឺជាចំណាត់ការមិនត្រឹមត្រូវ ដោយរំលោភនីតិវិធីទាំងអង្គហេតុ និងអង្គច្បាប់។ មេធាវីរូបនេះបញ្ជាក់ថា៖«ខ្ញុំនឹងបន្តស្នើសុំឲ្យតុលាការ ដោះលែងអ្នកភូមិទាំងពីរនាក់ ឲ្យនៅក្រៅឃុំជាបណ្ដោះអាសន្នទៀត»។
គួររម្លឹកថា កាលពីថ្ងៃទី១២ ខែឧសភា នាសន្និសីទកាសែតនៅទីស្នាក់ការខេត្តសៀមរាប លោក នី ចរិយា ថា សហគមន៍តាខ្មៅអភិវឌ្ឍន៍កសិកម្ម និងឧស្សាហកម្ម កំពុងតែព្យាយាមរំលោភយកដីធ្លីប្រជាពលរដ្ឋនៅភូមិជប់រំដេង ឃុំកន្ទួត ស្រុកស្វាយលើ ក្នុងពេលដែលគេកំពុងស្នើសុំដីសម្បទានសេដ្ឋកិច្ចពីរដ្ឋាភិបាលចំនួន ៤១៩ហិចតា។
លោកថា៖«សហគមន៍តាខ្មៅនេះ មិនមែនជាសហគមន៍ត្រឹមត្រូវតាមផ្លូវច្បាប់ទេ ពីព្រោះតាមគោលការណ៍ កាលណាគេបង្កើតសហគមន៍នៅតំបន់ណា គឺគេយកប្រជាពលរដ្ឋនៅទីនោះធ្វើជាសមាជិកឲ្យទទួលបានផលប្រយោជន៍ពីការអភិវឌ្ឍ ប៉ុន្តែសហគមន៍នេះមានប្រវត្តិមកពីខេត្តកណ្ដាល បែរជាមកបង្កើតសហគមន៍នៅសៀមរាប ហើយយកជនជាតិវៀតណាមមកធ្វើការទៅវិញ»។
ប្រតិកម្មរបស់សមាគមការពារសិទ្ធិមនុស្សអាដហុក បានកើតឡើងបន្ទាប់ពីសមត្ថកិច្ចបានចាប់ខ្លួនបុរសអ្នកភូមិជប់រំដេង ចំនួន ២នាក់ឈ្មោះ បឿន សុខ និង វ៉ែន ឡន ដាក់ពន្ធនាគារកាលពីថ្ងៃទី៣ ខែមករា កន្លងទៅ បន្ទាប់ពីមានជម្លោះដីធ្លីជាមួយសហគមន៍អភិវឌ្ឍន៍តាខ្មៅ។
ទាក់ទិននឹងករណីនេះ កាលពីថ្ងៃទី១៥ ខែឧសភា ស្ថាប័នអយ្យការអមសាលាដំបូងខេត្តសៀមរាប បានចេញសេចក្តីថ្លែងការណ៍មួយចំនួន ៥ទំព័រ ដើម្បីបំភ្លឺសាធារណជនកុំឱ្យយល់ច្រឡំ។ សេចក្តីថ្លែងការណ៍នោះបានពន្យល់ថា បុរសអ្នកភូមិជប់រំដេង ២នាក់ ឈ្មោះ បឿន សុខ និង វ៉ែន ឡន ដែលមានទំនាស់ដីធ្លីជាមួយសហគមន៍វៀតណាម ឈ្មោះតាខ្មៅអភិវឌ្ឍន៍កសិកម្ម និងឧស្សាហកម្ម គឺពិតជាបានទៅបំផ្លាញដំណាំ និងសង់ខ្ទមលើដីសហគមន៍មែន ទើបតុលាការសម្រេចឃុំខ្លួន។
នៅក្នុងសេចក្ដីថ្លែងការណ៍នោះដែរ ស្ថាប័នអយ្យការអមសាលាដំបូងខេត្តសៀមរាប ក៏ចោទប្រកាន់សមាគមការពារសិទ្ធិមនុស្សអាដហុក ថាបានធ្វើសន្និសីទកាសែតនិយាយបំផ្លើសខុសពីការពិត ព្រមទាំងញុះញង់ឱ្យមានការរើសអើងពូជសាសន៍ប្រឆាំងនឹងជនជាតិវៀតណាម ផង។
ទោះយ៉ាងណា សមាគមការពារសិទ្ធិមនុស្សអាដហុក បានច្រានចោលសេចក្ដីថ្លែងការណ៍ចោទប្រកាន់របស់តំណាងអយ្យការនេះ ដោយថា តំណាងអយ្យការកាន់សំណុំរឿងក្តីអ្នកភូមិជប់រំដេង ដែលមានជម្លោះដីធ្លីជាមួយសហគមន៍វៀតណាម នោះ កំពុងតែទាញយកស្ថាប័នអយ្យការទាំងមូលមកដាក់ភ្ជាប់ជាមួយនឹងរឿង របស់បុគ្គល៕
© រក្សាសិទ្ធិដោយ thmeythmey.com