ជាតិ
សង្គមជាតិ
ពលរដ្ឋច្រើនសហគមន៍ស្វែងរកដំណោះស្រាយរឿងដីធ្លីនៅសាលាខេត្តសៀមរាប
× សៀមរាប៖ ប្រជាពលរដ្ឋមកពីសហគមន៍ចំនួនជាង១០ ក្នុងខេត្តសៀមរាប បានលើកគ្នាមកតវ៉ានៅមុខសាលាខេត្តសៀមរាប ដើម្បីសុំកិច្ចអន្តរាគមន៍រឿងដីធ្លីដ៏រុំារ៉ៃរបស់ពួកគេ។ សហគមន៍ទាំងនោះ មកពីស្រុក ក្រុងចំនួន៧ ដែលគេដឹងថា ខ្លះមានជម្លោះទឹកទាហាន ក្រុមហ៊ុនអភិវឌ្ឍ និងអាជ្ញាធរអប្សរាជាដើម។
ប្រជាពលរដ្ឋប្រមាណ៥០០នាក់ បានប្រមូលផ្តុំគ្នាតវ៉ានៅមុខសាលាខេត្តសៀមរាប ដើម្បីឲ្យអភិបាលខេត្ត ដោះស្រាយទំនាស់ដីធ្លីរបស់ពួកគេ។ ពលរដ្ឋទាំងនោះ មកពីស្រុកនិងក្រុងចំនួន៧ នៃខេត្តសៀមរាប ដែលរួមមានស្រុកស្វាយលើ ស្រុកវ៉ារិន ស្រុកបន្ទាយស្រី ស្រុកអង្គរធំ ស្រុកប្រាសាទបាគង ស្រុកពួក និងក្រុងសៀមរាប។ មានទំនាស់ដីធ្លីនៅតំបន់ផ្សេងៗគ្នាក៏ពិតមែន ប៉ុន្តែពលរដ្ឋដែលឡើងតវ៉ានៅពេលនេះ គឺមានឆន្ទះ និងគោលបំណងដូចៗគ្នា។ គោលបំណង គឺស្នើឲ្យខេត្តពន្លឿនដោះស្រាយបញ្ហាដីធ្លីឲ្យពួកគេ ដែលខ្លះពាក់ព័ន្ធនឹងទាហាន ក្រុមហ៊ុន អាជ្ញាធរអប្សរា និងមេព្រៃជាដើម។
តំណាងសហគមន៍ភូមិសាលាក្រវ៉ាន់ ឃុំរំចេក ស្រុកបន្ទាយស្រី អ្នកស្រី តេះ ជឿន បានឲ្យដឹងថា ពលរដ្ឋក្នុងសហគមន៍អ្នកស្រីចំនួន ៤៧គ្រួសារ មានជម្លោះដីធ្លីនឹងក្រុមហ៊ុន លី អ៊ុំអេង និងលី អ៊ុំឆាយចាប់ពីឆ្នាំ២០០២មក។ អ្នកស្រីបន្តថា ក្រោយពីមានការតវ៉ាជាបន្តបន្ទាប់ ជម្លោះដីធ្លីនេះ ត្រូវបានលោកនាយករដ្ឋមន្ត្រីចេញមុខអន្តរាគមន៍កាលពីឆ្នាំ២០១៣ ដោយសម្រេចឲ្យក្រុមហ៊ុន ប្រគល់ដីឲ្យពលរដ្ឋទាំង៤៧គ្រួសារវិញ។ យ៉ាងណាមិញ ការសម្រេចរបស់លោកនាយករដ្ឋមន្ត្រី ហាក់មិនបានឮដល់ត្រចៀកមន្ត្រីថ្នាក់ស្រុកនោះទេ ជារួមអភិបាលស្រុកបន្ទាយស្រី មិនបានចុះវាស់វែងដីឲ្យពលរដ្ឋទាំងនោះទេ។ នេះបើតាមការបញ្ជាក់ពីតំណាងសហគមន៍ អ្នកស្រី តេះ ជឿន។
សំឡេង
មានប្រជាពលរដ្ឋរងគ្រោះច្រើន ដែលឡើងមកតវ៉ានៅព្រឹកថ្ងៃសុក្រនេះ។ តំណាងសហគនន៍ទួលគ្រួស ឃុំឃុនរាម ស្រុកបន្ទាយស្រី អ្នកស្រី ឈិត ផៃ បានរៀបរាប់ពីការរំលោភដីធ្លីអ្នកស្រី ដោយមេព្រៃដ៏មានឥទ្ធិពលថា បានឈួសឆាយដីចំការអ្នកភូមិ ៤០គ្រួសារ យកទៅកាន់កាប់ផ្ទាល់ខ្លួន។ អ្នកស្រី ឈិត ផៃ ពន្យល់ថា អស់រយៈពេល៤ឆ្នាំមកហើយ ដែលមេព្រៃឈ្មោះ តាលីមតាឡន (ឈ្មោះអ្នកភូមិហៅ) ឈួសដីអ្នកភូមិ យកទៅដាំដំឡូង ដោយទុកឲ្យពលរដ្ឋ៤០គ្រួសារ ដែលចូលទៅរស់នៅតំបន់នោះប្រមាណ៨ឆ្នាំមកនេះ រងទុក្ខវេទនា រកស៊ីឈ្នួលគេទាំងគ្រួសារ។
នៅព្រឹកមិញនេះ តំណាងសហគមន៍រងគ្រោះដីធ្លីទាំងអស់ បានជំនះចង់ជួបអភិបាលខេត្ត ដោយមានការរារាំងពីកងកំលាំងជាច្រើននាក់ ព្រោះថា សំណើរសុំហែក្បួននៅថ្ងៃនេះ មិនបានអនុញ្ញាតទេ ដោយអភិបាលរងខេត្ត លោក ប៊ុន ថាឫទ្ធិ ក្នុងចំណាររបស់ខ្លួន យោងលើហេតុផល ខ្លាចប៉ះពាល់ដល់សណ្តាប់ធ្នាប់សាធារណ សន្តិសុខ និងសុវត្ថិភាពសង្គម ដល់ភ្ញៀវទេសចរជាដើម។
មន្ត្រីផ្នែកច្បាប់នៃវេទិកាអង្គការមិនមែនរដ្ឋាភិបាលស្តីពីកម្ពុជា (NGO Forum) លោក វង្ស កុសល ដែលបានតាមដានការតវ៉ារបស់ពលរដ្ឋនៅព្រឹកមិញបានឲ្យដឹងថា បច្ចុប្បន្នរដ្ឋាភិបាលមានការខិតខំ និងប្រឹងប្រែងខ្លាំង លើការរកដំណោះស្រាយជូនពលរដ្ឋរងគ្រោះដោយសារដីធ្លី ដោយក្នុងនោះមានការបង្កើតក្រុមការងារដោះស្រាយជាដើម។ តួយ៉ាងកាលពីពេលថ្មីៗនេះ នៅក្នុងខេត្តសៀមរាបលោកបានប្រកាសកាត់ដីពីអាជ្ញាធរអប្សរា ប្រគល់ឲ្យពលរដ្ឋរងគ្រោះជាច្រើនគ្រួសារផងដែរ។ យ៉ាងណាមិញ លោក កុសល កត់សម្គាល់ឃើញថា ការអនុវត្ត មិនទាន់ដូចប្រសាសន៍លោកនាយករដ្ឋមន្ត្រីនៅឡើយទេ។ លោកស្នើឲ្យអាជ្ញាធរពាក់ព័ន្ធទាំងអស់ គួរពន្លឿនដោះស្រាយ និងអនុវត្តតាមអ្វីដែលប្រមុខរដ្ឋាភិបាលបានសម្រេចឲ្យប្រជាពលរដ្ឋ ជៀសវាងការកើតមានបញ្ហាផ្សេង។
រហូតមកដល់ម៉ោង៣រសៀលនេះ កិច្ចប្រជុំរកដំណោះ កំពុងដំណើរការក្នុងសាលាខេត្ត ខណៈដែលអ្នកភូមិឯទៀត ដែលភាគច្រើនធ្វើដំណើរតាមគោយន្ត និងនាំកូនចៅតាមដែរនោះ កំពុងរង់ចាំក្រោយកំដៅថ្ងៃហួតហែង៕
© រក្សាសិទ្ធិដោយ thmeythmey.com