ជាតិ
សង្គមជាតិ
ប្រធាន និងសមាជិកក្រុមប្រឹក្សាឃុំ សង្កាត់ ទទួលប្រាក់ខែថ្មី ពី៣៥ម៉ឺន ដល់៥៧ម៉ឺនរៀល
×![]()
ភ្នំពេញ៖រដ្ឋាភិបាលបានសម្រេចចេញអនុក្រឹត្យថ្មីស្តីពីការកំណត់ប្រាក់ឧបត្ថម្ភប្រចាំខែ ចំពោះប្រធានក្រុមប្រឹក្សាឃុំសង្កាត់ សមាជិកក្រុមប្រឹក្សាឃុំ សង្កាត់ ចាប់ពី ៣៥ម៉ឺន ដល់៥៧ម៉ឺនរៀល ក្នុងមួយខែ ដោយផ្តើមអនុវត្តចាប់ពីខែកក្កដា ឆ្នាំ២០១៥ខាងមុខនេះ។
រដ្ឋាភិបាលកម្ពុជាបានសម្រេចកំណត់ដំឡើងប្រាក់ឧបត្ថម្ភប្រចាំខែជាថ្មីដល់សមាជិកក្រុមប្រឹក្សាឃុំ សង្កាត់និងមន្ត្រីភូមិទាំងអស់នៅទូទាំងប្រទេសកម្ពុជា។បើយោងតាមអនុក្រឹត្យចុះថ្ងៃទី២៥ ឧសភា ឆ្នាំ២០១៥ ប្រធានក្រុមប្រឹក្សានិងជាមេឃុំ ចៅសង្កាត់ក្នុងមួយនាក់ ត្រូវទទួលបានប្រាក់ឧបត្ថម្ភចំនួន៥៧ម៉ឺនរៀលក្នុងមួយខែ។ ដោយឡែក ចំពោះសមាជិកក្រុមប្រឹក្សាឃុំ សង្កាត់ដែលជាជំទប់ និងចៅសង្កាត់ក្នុងមួយនាក់ ទទួលបាន ៤០ម៉ឺនរៀលក្នុងមួយខែនិងសមាជិកក្រុមប្រឹក្សាឃុំ សង្កាត់ ទទួលបាន ៣៥ម៉ឺនរៀល។
បើយោងតាមអនុក្រឹត្យរបស់រដ្ឋាភិបាលការផ្តល់ប្រាក់ឧបត្ថម្ភប្រចាំខែថ្មីនេះ ត្រូវអនុវត្តន៍ចំពោះតែសមាជិកក្រុមប្រឹក្សាឃុំ សង្កាត់ដែលស្ថិតក្នុងមុខតំណែងប៉ុណ្ណោះ។
គួររម្លឹកថា កាលពីថ្ងៃទី ៣១ ធ្នូ ឆ្នាំ២០១៤ រដ្ឋាភិបាលបានចេញអនុក្រឹត្យ កំណត់ដំឡើងប្រាក់ឧបត្ថម្ភប្រចាំខែដល់សមាជិកក្រុមប្រឹក្សាឃុំ សង្កាត់និងមន្ត្រីភូមិទាំងអស់នៅទូទាំងប្រទេសកម្ពុជា។យោងតាមអនុក្រឹត្យកាលនោះ ប្រធានក្រុមប្រឹក្សានិងជាមេឃុំ ចៅសង្កាត់ ត្រូវទទួលបានប្រាក់ឧបត្ថម្ភចំនួន៤០ម៉ឺនរៀលក្នុងមួយខែ ហើយសម្រាប់សមាជិកក្រុមប្រឹក្សាឃុំ សង្កាត់ដែលជាជំទប់ និងចៅសង្កាត់ ទទួលបាន ៣៥ម៉ឺនរៀលក្នុងមួយខែនិងសមាជិកក្រុមប្រឹក្សាឃុំ សង្កាត់ ទទួលបាន ៣០ម៉ឺនរៀល។ដោយឡែក មេភូមិ ទទួលបានប្រាក់ឧបត្ថម្ភ ១៦ ម៉ឺនរៀល អនុប្រធានភូមិ ១៤ ម៉ឺនរៀល និងសមាជិកភូមិទទួលបាន ១២ ម៉ឺនរៀលផងដែរ។
កាលពីមុនឆ្នាំ២០១៤ ចំពោះប្រាក់ឧបត្ថម្ភប្រចាំខែប្រធានក្រុមប្រឹក្សា និងជាមេឃុំ ចៅសង្កាត់ទទួលបាន ៣០ម៉ឺនរៀល ហើយជំទប់និងសមាជិកក្រុមប្រឹក្សាឃុំ សង្កាត់ ដែលជាជំទប់ និងចៅសង្កាត់ ទទួលបាន២៤ម៉ឺនរៀល រីឯ សមាជិកក្រុមប្រឹក្សាឃុំ សង្កាត់ ទទួលបាន ២០ម៉ឺនរៀលក្នុងមួយខែ៕
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
