ពីនេះ ពីនោះ
× ក្រមាត្បាញដៃ អំបោះសរសៃ ច្នៃជាក្រមា
កំណួចចុងជាយ មិនងាយរសាត់ ពណ៌ដូចគេផាត់
ជ្រលក់ល័កស្ងោរ។
ចោមពុងក្រោមក្លៀក រុំព័ទ្ធត្រគាក ស្លៀកជំនួសខោ
វេចម្ជូស្លាទុំ រួមផ្តុំកំបោរ ថ្ងៃសីលថ្ងៃកោរ
ពានាសូត្រធម៌។
មូរធ្វើឈ្នួតក្បាល បោកទឹកពូតហាល ស្រាលដូចស្នោជ័រ
ដណ្តប់ការពារ រងាញាប់ញ័រ ប្រើជំនួសវល្លិ
ចងអុសរុំផ្តៅ។
ជួតក្បាលបង់ក ទទូរលំអ ប្រឆាំងកម្តៅ
ក្រវាត់ចង្កេះ ផាយសេះចេញក្រៅ សៀតដាវពូថៅ
ធ្វើថ្នក់សម្ពាយ។
លាតក្រាលសម្រាន្ត ជូកមុខខ្លួនប្រាណ បានស្ងួតយ៉ាងងាយ
បក់មូលរោមខាំ ចូលឆ្នាំរីករាយ មូរកួចចុងជាយ
ជាឈូងកម្សាន្ត។
ខ្មែរត្បាញបន្ត ស្នាដៃបវរ មរតកថ្កើងថ្កាន
ស្រួលធ្វើងាយប្រើ ចេញដើរចាកឋាន យកជាប់នឹងប្រាណ
ប្រើបានច្រើនយ៉ាង។
ក្រមាន័យពិត គ្នាក្នុងជីវិត មិត្តញាតិជិតខាង
បងប្អូនកូនក្មួយ មកជួយច្រូងច្រាង ចាស់ទុំក្មេងក្មាង
គ្រាមានធុរៈ។
ផ្តល់សិទ្ធិដោយ លោក ចាន់ សំណប់ សាស្ត្រចារ្យអក្សសាស្ត្រខ្មែរ និងជាអនុប្រធានរាជបណ្ឌិតសភាកម្ពុជា
© រក្សាសិទ្ធិដោយ thmeythmey.com