ជាតិ
សង្គមជាតិ
លោក ហោ ណាំហុង ថា UNHCR កំពុងរកប្រទេសទី៣ សម្រាប់ជនភៀសខ្លួនម៉ុងតាញ៉ា
× លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជា បានប្រាប់លោក Scott Busby ឧបការីរងក្រសួងការបរទេស អាមេរិក ថា កម្ពុជាបានផ្ដល់លក្ខខណ្ឌជាជនភៀសខ្លួន ដល់ជនជាតិម៉ុងតាញ៉ា ចំនួន ១៣ រួចហើយ ហើយនៅពេលនេះឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួននៅកម្ពុជា (UNHCR) កំពុងស្វែងរកប្រទេសទី៣ ដើម្បីបញ្ជូនជនជាតិម៉ុងតាញ៉ាទាំងនោះឲ្យទៅរស់នៅបន្ត ។ការបញ្ជាក់របស់លោក ហោ ណាំហុង បែបនេះ ធ្វើឡើងបន្ទាប់ពីជំនួបជាមួយលោក Scott Busby ឧបការីរងក្រសួងការបរទេសអាមេរិកនៅ ព្រឹកថ្ងៃទី២ ខែមិថុនា នាទីស្តីការ ក្រសួង។
ឆ្លើយនឹងសំនួររបស់លោក Scott Busby ដែលបានសួរនាំពីករណីជនជាតិ ម៉ុងតាញ៉ាទាំង១៣នាក់ ដែលបានមកកម្ពុជានោះ លោក ហោ ណាំហុង បានបញ្ជាក់ថា កម្ពុជាបានអនុវត្ត និងគោរពអនុសញ្ញាអន្តរជាតិ ស្តីពីការទទួល យកជនភៀសខ្លួន ដែលកម្ពុជាជាប្រទេសហត្ថលេខី។ ថ្លែងប្រាប់ចំពោះមុខអ្នកកាសែត លោកប្រមុខការបរទេសកម្ពុជា បានបន្ថែមថា៖«ហើយឥឡូវនេះយើងបានឲ្យលក្ខខណ្ឌ ជាជនភៀសខ្លួន១៣នាក់ ទៅជនជាតិម៉ុងតាញ៉ា ហើយ ដូច្នេះតំណាងUNHCR នៅភ្នំពេញ កំពុងរកប្រទេសទី៣ ដើម្បីបញ្ជូនពួកគេទៅទៀត គឺអត់បញ្ហា។ ហើយខ្ញុំថា យើងបានទទួលអស់ច្រើនណាស់»។
ជាមួយគ្នានេះលោក ហោ ណាំហុង ក៏បានប្រាប់ទៅកាន់លោក Scott Busby ឧបការីរងក្រសួងការបរទេសអាមេរិកទៀតថា មុននឹងផ្ដល់លក្ខខណ្ឌជូនជនភៀសខ្លួនទាំងនោះ កម្ពុជាត្រូវត្រួតពិនិត្យមើលឲ្យបានច្បាស់ជាមុនសិន ពោលបានន័យថាមិនមែនចេះតែផ្ដល់លក្ខខណ្ឌជូននោះទេ។ «បើធ្វើតាមឯកឧត្តម(លោក Scott Busby) ប្រហែលជាមាន៥០ម៉ឺន ១លានវៀតណាមមកធ្វើម៉ុងតាញ៉ាហើយ យើងចេះតែឲ្យវៀតណាមមក ឲ្យតែវៀតណាមចូលមកប្រទេសខ្មែរ ឲ្យលក្ខខណ្ឌជាម៉ុងតាញ៉ាជនភៀសខ្លួន អ៊ីចឹងវៀតណាមមកអាច៥០០ពាន់ ១លាននាក់ហើយ»។នេះជាការបញ្ជាក់របស់លោកប្រមុខការបរទេសកម្ពុជា។
កន្លងមករដ្ឋមន្ត្រីក្រសួងមហាផ្ទៃលោក សខេងបានបញ្ជាក់ថា មូលហេតុដែលកម្ពុជាទទួលយកជនភៀសខ្លួនម៉ុងតាញ៉ាទាំង១៣នាក់នោះ គឺដោយសារកម្ពុជាអនុវត្តតាម អនុសញ្ញាអន្តរជាតិ ស្តីពីការទទួល យកជនភៀសខ្លួននិងច្បាប់អន្តោសប្រវេសន៍របស់កម្ពុជា ។
គួរបញ្ជាក់ថា ជនជាតិម៉ុងតាញ៉ាទាំង ១៣ នាក់នោះបានរត់មកពួនរស់នៅក្នុងព្រៃខេត្តរតនគិរី កាលពីចុងឆ្នាំ២០១៤ ដោយពូកគេទាំងនោះរត់គេចពីការធ្វើបាប រងទុក្ខបុកម្នេញពីអាជ្ញាធរវៀតណាម ៕
© រក្សាសិទ្ធិដោយ thmeythmey.com