ជាតិ
សង្គមជាតិ
អាមេរិកស្នើរដ្ឋាភិបាលកម្ពុជាបង្ហាញសេចក្តីព្រាងច្បាប់ NGOs ឲ្យបានឆាប់
× សេចក្តីព្រាងច្បាប់ស្តីពីអង្គការមិនមែនរដ្ឋាភិបាល និងសមាគម ជាប្រធានបទក្តៅដ៏ចម្រូងចម្រាស់រវាងរដ្ឋាភិបាលកម្ពុជា និងក្រុមអង្គការក្រៅរដ្ឋាភិបាល។ ខណៈសេចក្តីព្រាងច្បាប់នេះ ត្រូវគេរំពឹងថា នឹងត្រូវអនុម័តដោយរដ្ឋាភិបាលនៅចុងសប្តាហ៍នេះ មន្ត្រីការទូតអាមេរិកបានជំរុញឲ្យរាជរដ្ឋាភិបាលកម្ពុជា ផ្សព្វផ្សាយសេចក្តីព្រាងច្បាប់នេះ ជាសាធារណៈឲ្យបានឆាប់តាមតែអាចធ្វើបាន ដើម្បីអាចឲ្យអង្គការសង្គមស៊ីវិលបានពិភាក្សា និងផ្តល់យោបល់ មុននឹងបញ្ជូនទៅរដ្ឋសភា។
ក្នុងដំណើរទស្សនកិច្ចនៅកម្ពុជា លោក Scott Busby ឧបការីរងនៃក្រសួងការបរទេសអាមេរិក ទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ បានជំរុញឲ្យរដ្ឋាភិបាលកម្ពុជា ផ្សព្វផ្សាយសេចក្តីព្រាងច្បាប់អង្គការមិនមែនរដ្ឋាភិបាល និងសមាគម ជាសាធារណៈឲ្យបានឆាប់ ដើម្បីអាចឲ្យអង្គការសង្គមស៊ីវិល បានពិភាក្សា និងផ្តល់យោបល់ មុននឹងបញ្ជូនទៅរដ្ឋសភា។
នៅក្នុងសន្និសីទសារព័ត៌មាននៅថ្ងៃទី២មិថុនានេះ លោកឧបការីរងនៃក្រសួងការបរទេសអាមេរិក បានថ្លែងថា៖«រដ្ឋាភិបាលកម្ពុជាត្រូវតែផ្សព្វផ្សាយជាសាធារណៈទៅដល់អ្នកពាក់ព័ន្ធ ដើម្បីអាចឲ្យពួកគេបានពិភាក្សា និងផ្តល់យោបល់ មុននឹងបញ្ជូនទៅរដ្ឋសភា ដើម្បីអនុម័ត»។
លោក បន្តថា៖«រាជរដ្ឋាភិបាលកម្ពុជា គួរពិចារណាឡើងវិញ អំពីខ្លឹមសេចក្តីព្រាងច្បាប់អង្គការមិនមែនរដ្ឋាភិបាល និងសមាគម ហើយដែលយើងជឿជាក់ថា ច្បាប់នេះហាក់មិនចាំបាច់មាននោះទេ នៅខណៈពេលនេះ។ ហើយបើចាំបាច់ត្រូវតែអនុម័ត យើងសង្ឃឹមថា នឹងជួយអង្គការសង្គមស៊ីវិល មិនមែនរឹតត្បិតនោះទេ»។ សូមរំឮកថា តាមការស្នើសុំរបស់លោកស្រី ហីលឡារី គ្លិនតុន អតីតប្រមុខការទូតអាមេរិក កម្ពុជាបានព្យូរការតាក់តែងសេចក្តីព្រាងច្បាប់នេះម្តងរួចហើយ។
សេចក្តីព្រាងច្បាប់អង្គការមិនមែនរដ្ឋាភិបាល និងសមាគម កំពុងតែជាប្រធានបទក្តៅដ៏ចម្រូងចម្រាស់រវាងរដ្ឋាភិបាលកម្ពុជា និងក្រុមអង្គការក្រៅរដ្ឋាភិបាល។ តំណាងអង្គការសហប្រជាជាតិមួយចំនួន និងអគ្គរដ្ឋទូតសហរដ្ឋអាមេរិកបានចេញមុខសំដែងការព្រួយបារម្ភជាចំហ ទល់នឹងរដ្ឋាភិបាលកម្ពុជា រហូតដល់រដ្ឋាភិបាលកម្ពុជាចេញកំណត់ទូតតទល់នឹងការអត្ថាធិប្បាយរបស់ អង្គការអន្តរជាតិ និងទូតអាមេរិកទៀតផង។
ក្រុមអង្គការក្រៅរដ្ឋាភិបាលបានរិះគន់រដ្ឋាភិបាលថាកំពុងតាក់តែង សេចក្តីព្រាងច្បាប់ដែលមិនមានការចូលរួមពី សង្គមស៊ីវិល ហើយដែលមានខ្លឹមសាររឹតត្បិតសិទ្ធិ និងសកម្មភាពរបស់អង្គការក្រៅរដ្ឋាភិបាល។ ប៉ុន្តែផ្ទុយពីការលើកឡើងរបស់អង្គការសង្គមស៊ីវិល រាជរដ្ឋាភិបាល កម្ពុជា អះអាងថាសេចក្តីព្រាងច្បាប់ស្តីពីអង្គការមិនមែនរដ្ឋាភិបាល និងសមាគម ដែលគេរំពឹងថា នឹងត្រូវអនុម័តដោយរដ្ឋាភិបាលនៅចុងសប្តាហ៍នេះ បង្កើតឡើងដើម្បីលើកស្ទួយការប្រើប្រាស់សិទ្ធិសេរីភាព ក្នុងការបង្កើតសមាគម និងអង្គការមិនមែនរដ្ឋាភិបាល និងលើកកម្ពស់កិច្ចសហប្រតិប្រតិបត្តិការជាមួយអង្គការសង្គមស៊ីវិលលើគ្រប់វិស័យ៕
© រក្សាសិទ្ធិដោយ thmeythmey.com