ជាតិ
សង្គមជាតិ
ប្រទេសចំនួន៣៧ ជួបគ្នាក្នុងកិច្ចប្រជុំ ICC-Angkor លើកទី២៤
× សៀមរាប៖ កិច្ចប្រជុំគណៈកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍរមណីយដ្ឋានប្រវត្តិសាស្ត្រអង្គរ ហៅកាត់ថា ICC-Angkor បានចាប់ផ្តើមហើយនៅព្រឹកថ្ងៃព្រហស្បតិ៍នេះ។ កិច្ចប្រជុំមានរយៈពេល ២ថ្ងៃ គឺចាប់ពីថ្ងៃទី៤ ដល់ថ្ងៃទី៥ ឧសភា នៅអាជ្ញាធរជាតិអប្សរា ដែលមានសមាជិកមកពី ៣៧ប្រទេស ក្នុងទ្វីបចំនួន៥ ។
ប្រធាននាយកដ្ឋានប្រព័ន្ធផ្សព្វផ្សាយនៃអាជ្ញាធរជាតិអប្សរា លោក ឡុង កុសល បានឲ្យដឹងថា ខ្លឹមសារសំខាន់សម្រាប់កិច្ចប្រជុំ ICC-Angkor នៅព្រឹកនេះ គឺផ្តោតសំខាន់លើការត្រួតពិនិត្យការងាររបស់ក្រុមបច្ចេកទេស ក្នុងការជួសជុល និងអភិរក្សប្រាសាទបុរាណខ្មែរ ក្នុងរមណីយដ្ឋានប្រវត្តិសាស្ត្រអង្គរ។ លោកបន្តថា ក្រៅពីនេះអ្នកជំនាញជាន់ខ្ពស់ផ្នែកវប្បធម៌ បុរាណវិទ្យា និងការអភិវឌ្ឍប្រកបដោយចីរភាព ក៏នឹងត្រួតពិនិត្យលើការអនុវត្ត អនុសាសន៍នានា ដែលគណៈកម្មាធិការនេះបានអនុម័ត កាលពីកិច្ចប្រជុំពេញអង្គរកាលពីខែធ្នូ ឆ្នាំ២០១៤កន្លងទៅផងដែរ។
បើតាមលោក ឡុង កុសល ដដែល កិច្ចប្រជុំនេះក៏នឹងនិយាយពីកិច្ចការស្រាវជ្រាវថ្មីៗ ផ្នែកបុរាណវិទ្យា និងគម្រោងតអភិរក្សជាបន្តបន្ទាប់ទៀតផងដែរ។ លោកបញ្ជាក់ថា ជាចុងបញ្ចប់រយៈពេលពេញ២ថ្ងៃ គណៈកម្មាធិការគ្រប់ជំនាញទាំងអស់ នឹងអនុម័តអនុសាសន៍រួម សម្រាប់ក្រុមបច្ចេកទេស ដើម្បីយកទៅអនុវត្តជាបន្ត។
អ្នកចូលរួមមានប្រមាណ៣០០នាក់ ដែលអ្នកទាំងនោះ មកពី៣៧ប្រទេស ក្នុងទ្វីបចំនួន៥ និងស្ថាប័នអង្គការអន្តរជាតិចំនួន ១៣ ជាសមាជិក។ ហើយកិច្ចប្រជុំ ICC-Angkor លើកទី២៤នេះ មានការចូលរួមពី លោកឧបនាយករដ្ឋមន្ត្រី សុខ អាន ប្រធានអាជ្ញាធរជាតិអប្សរា រួមនិងសហប្រធានគណៈកម្មាធិការអន្តរជាតិ ICC-Angkor លោក តាកាហ៊ីសា ហ្សូហ្គាវា (Takahisa Tsugawa) អនុប្រធានបេសកកម្មនៃស្ថានទូតជប៉ុន និងលោក រ៉ូមុំាង លូវ៉េ (Romain Louvet) ទីប្រឹក្សាផ្នែកសហប្រតិបត្តិការ និងកិច្ចការវប្បធម៌នៃស្ថានទូតបារាំង។
គួររម្លឹកថា គណៈកម្មាធិការ ICC-Angkor បង្កើតឡើង នៅឆ្នាំ១៩៩៣ ក្រោយសនិ្នសីទ អន្តរជាតិលើកទី១ ស្តីពី អង្គរនៅទីក្រុងតូក្យូ ប្រទេសជប៉ុន តាមសំណូមពររបស់គណៈកម្មាធិការបេតិកភណ្ឌពិភពលោក ពេលទទួលចុះឈ្មោះប្រាសាទអង្គរវត្ត ទៅក្នុងបញ្ជីសម្បត្តិបេតិកភណ្ឌពិភពលោក៕
© រក្សាសិទ្ធិដោយ thmeythmey.com