កីឡាជាតិ
ជាតិ
U-23 ជួបឥណ្ឌូនេស៊ីល្ងាចនេះ ខណៈនាយករដ្ឋមន្ត្រីប្រកាសឧបត្ថម្ភ១ម៉ឺនដុល្លារនូវរាល់ជ័យជម្នះ
× ក្រុមកីឡាបាល់ទាត់ជម្រើសជាតិអាយុក្រោម២៣ឆ្នាំកម្ពុជា ត្រូវជួបតទល់ជាមួយឥណ្ឌូនេស៊ីនៅវេលាម៉ោង៧ និង៣០នាទីល្ងាចនេះ នៅកីឡដ្ឋាន Jalan Besar Stadium សម្រាប់ការប្រកួតលើកទីពីរក្នុងពូល A ប្រចាំព្រឹត្តិការណ៍កីឡាស៊ីហ្គេមលើកទី២៨ ។
U-23 កម្ពុជា ដែលបានយកឈ្នះហ្វីលីពីន ៣-១ នៅថ្ងៃបើកឆាក នឹងត្រូវអវត្តមានខ្សែការពារឆ្នើម ណុប តុលា ដោយសារបញ្ហារបួស។ កម្ពុជាមិនដែលមានប្រវត្តិឈ្នះឥណ្ឌូនេស៊ីឡើយក្នុងជំនួបស៊ីហ្គេម ដោយចាញ់ ១០-០ នៅឆ្នាំ១៩៩៥ ចាញ់ ១-០ នៅឆ្នាំ១៩៩៩ ចាញ់ ៣-១ នៅឆ្នាំ២០០៧ ចាញ់ ៦-០ នៅឆ្នាំ២០១១ និងចាញ់ ១-០ នៅឆ្នាំ២០១៣ ។
ប្រាក់រង្វាន់ឧបត្ថម្ភ៖
លោក ឆាំង ពិសិដ្ឋ អ្នកដឹកនាំក្រុមជម្រើសជាតិ U-23 បាននិយាយប្រាប់សារព័ត៌មានថ្មីៗ តាមទូរសព្ទនៅថ្ងៃនេះថា៖ «ឯកឧត្តមប្រធានសហព័ន្ធ បាននិយាយមកប្រាប់ក្រុមយើង ថាសម្តេច ហ៊ុន សែន នឹងឧបត្ថម្ភប្រាក់១ម៉ឺនដុល្លារអាមេរិកនូវរាល់ជ័យជម្នះរបស់ក្រុម មានន័យថា គាត់បានត្រៀមរួចជាស្រេចហើយក្នុងទឹកប្រាក់១ម៉ឺនដុល្លារសម្រាប់ជ័យជម្នះលើហ្វីលីពីនកន្លងមក»។
លោកពិសិដ្ឋ បានបន្ថែមដែរថា លោករដ្ឋមន្ត្រីក្រសួងអប់រំ យុវជន និងកីឡា បានឧបត្ថម្ភដល់ក្រុម U-23 រួចហើយនូវទឹកប្រាក់ចំនួន១០០០ដុល្លារអាមេរិកសម្រាប់ការការហូបចុករបស់ក្រុមទាំងមូល។
ក្រៅពីការប្រកាសឧបត្ថម្ភរបស់លោកនាយករដ្ឋមន្ត្រី សហព័ន្ធកីឡាបាល់ទាត់កម្ពុជា (FFC) បានត្រៀមថវិកា១ម៉ឺនដុល្លាររួចជាស្រេចសម្រាប់ U-23 ចំពោះជ័យជម្នះ ៣-១ លើហ្វីលីពីន រួមទាំងការឧបត្ថម្ភបន្ថែម១០០ដុល្លារអាមេរិកទៀតដល់រាល់សមាជិកក្រុម U-23 ។
លោក ខៀវ សាម៉េត អនុប្រធាន FFC បានបញ្ជាក់ថា បើ U-23 កម្ពុជាយកឈ្នះឥណ្ឌូនេស៊ី នៅថ្ងៃនេះ ពួកគេនឹងទទួលបាន១ម៉ឺនដុល្លារបន្ថែមទៀត ហើយរាល់សមាជិកទាំងអស់នឹងបានបន្ថែមផងដែរនូវទឹកប្រាក់ម្នាក់ៗចំនួន២០០ដុល្លារអាមេរិក៕
© រក្សាសិទ្ធិដោយ thmeythmey.com