ជាតិ
សង្គមជាតិ
×![]()
ដោយ: ធឿន បញ្ញាឬទិ្ធ
អង្គការមិនមែនរដ្ឋាភិបាល បានបង្ហាញរបាយការណ៍ស្រាវជ្រាវថា ប្រជាពលរដ្ឋដែលបានវាស់វែងដីតាមបទបញ្ជា០១របស់រដ្ឋាភិបាល បានទទួលប័ណ្ណកម្មសិទ្ធិដីមួយចំនួនសម្រាប់ដីរបស់ពួកគេ ប៉ុន្ដែដីពលរដ្ឋជាច្រើនទៀតនៅមិនទាន់បានផ្ដល់ប័ណ្ណកម្មសិទ្ធិឲ្យពួកគេដែរ។សង្គមស៊ីវិលយល់ថា បទបញ្ជា០១នេះ នៅមានភាពចន្លោះប្រហោង ដែលតម្រូវឲ្យរដ្ឋាភិបាលត្រឡប់ទៅបង្ហើយការងារនៅតំបន់ដែលបានវិនិច្ឆ័យរួច តែមិនទាន់បានបញ្ចប់ការងារចុះបញ្ជីចប់សព្វគ្រប់។អង្គការមិនមែនរដ្ឋាភិបាល បានរៀបចំសិក្ខសាលាផ្សព្វផ្សាយរបាយការណ៍ស្រាវជ្រាវស្ដីពី គោលនយោបាយចាស់ សកម្មភាពថ្មី ការអនុវត្ត និងឥទ្ធិពលបទបញ្ជា០១ នៅព្រឹកថ្ងៃទី០៩ មិថុនានេះ នៅភោជនីយដ្ឋានទន្លេបាសាក់។
លោក តឹក សុវណ្ណារ៉ា នាយកប្រតិបត្តិអង្គការមិនមែនរដ្ឋាភិបាល មានប្រសាសន៍ថាបទបញ្ជា០១រដ្ឋាភិបាលនេះ ផ្ដល់នូវលទ្ធផលច្របូកច្របល់នៅតំបន់ដែលធ្លាប់មានជម្លោះដីធ្លី។ ការអនុវត្តបទបញ្ជា០១នេះ លើដីជនជាតិដើមភាគតិចបានបង្កើតជាកង្វល់យ៉ាងធ្ងន់ធ្ងរ ដោយសារការវាស់វែងលើដីសហគមន៍ តម្រូវឲ្យប្រជាពលរដ្ឋដែលស្នើប័ណ្ណកម្មសិទ្ធិចុះកិច្ចសន្យាយល់ព្រមចាកចេញពីសហគមន៍ និងបោះបង់សិទ្ធិលើដីកេរ្ត៍ពីដូនតាទាំងអស់។លទ្ធផលស្រាវជ្រាវបង្ហាញថា ដីមានជម្លោះត្រូវបានវាស់វែងក្នុងកម្រិតខ្ពស់ តែលទ្ធផលនៃដំណើរការសម្រេចជោគជ័យ ក្នុងការដោះស្រាយបញ្ហាជម្លោះ បានតែមួយភាគបួននៃករណីទាំងអស់ ប្រហែលជា៥០ភាគរយមិនត្រូវបានដោះស្រាយបន្ទាប់ពីបញ្ចប់បទបញ្ជា០១ នៅតំបន់សិក្សាទាំងនេះ។
លោកថា មូលហេតុដែលនាំអោយមានការស្រាវជ្រាវនេះឡើង គឺដើម្បីបំពេញចន្លោះប្រហោង នៃការខ្វះខាតព័ត៌មានទាក់ទងនឹងការអនុវត្តបទបញ្ជាទី០១របស់រដ្ឋាភិបាល និងការវាយតម្លៃទៅលើការរិះគន់ចម្បងៗ ចំពោះយុទ្ធនាការនេះ។ ការស្រាវជ្រាវនេះប្រើប្រាស់វិធីសាស្ត្រចម្រុះ ទាំងបែបគុណភាព និងបរិមាណ។
នាយកប្រតិបត្តិអង្គការមិនមែនរដ្ឋាភិបាលរូបនេះជំរុញឲ្យរដ្ឋាភិបាល ផ្សព្វផ្សាយជាសាធារណៈ នូវលទ្ធផលលម្អិតអំពីការអនុវត្តបទបញ្ជា០១ ។ ផ្សព្វផ្សាយនូវតារាងសម្បទានដីសេដ្ឋកិច្ចច្បាសលាស់ដែលបានកាត់ចេញ ឬលុបចោលតាមការអនុវត្តតាមបទបញ្ជា០។ បញ្ជាក់ពីស្ថានភាព និងទិន្នន័យដីសម្បទានដែលលុបចោល និងដីសម្បទានដែលបន្ដមានសកម្មភាព។ បន្ដស៊ើបអង្កេត និងលុបចោលនូវសម្បទានណា ដែលមិនគោរពតាមក្រមខណ្ឌច្បាប់ ឬកិច្ចសន្យា។ ផ្សព្វផ្សាយជាសាធារណៈនូវការងាររបស់អន្តរក្រសួង ដែលធ្វើការលើដីបញ្ហាដីសម្បទានសេដ្ឋកិច្ច ដើម្បីបង្កើនតម្លាភាព និងគណនេយ្យភាព ក៏ដូចជាផ្សព្វផ្សាយបញ្ជីដីសម្បទានសេដ្ឋកិច្ចដែលបានស៊ើបអង្កេតជាដើម។
យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់ គិតមកដល់ពាក់កណ្តាលខែធ្នូ ឆ្នាំ២០១៤កន្លងទៅ យុទ្ធនាការអនុវត្តបទបញ្ជា ០១ បានវាស់វែងក្បាលដីច្រើនជាង ៧១ម៉ឺនប្លង់ ក្នុងឃុំចំនួន ៣៥៧ និងបានផ្តល់ប័ណ្ណកម្មសិទ្ធិចំនួន ៦១ម៉ឺនប្លង់ជូនប្រជាពលរដ្ឋ ក្នុងចន្លោះពេលនៃការចាប់ផ្តើមយុទ្ធនាការ នៅខែមិថុនា ឆ្នាំ២០១២ និងខែធ្នូឆ្នាំ២០១៤ ។ រហូតដល់ខែធ្នូឆ្នាំ២០១៤ ដីសរុបប្រមាណ ១,២ លានហិកតា ត្រូវបានរៀបចំឡើងវិញតាមរយៈបទបញ្ជា០១ ដោយក្នុងនោះមាន ដីសម្បទានសេដ្ឋកិច្ច៣២ភាគរយ ព្រៃសម្បទាន២៣ ភាគរយ និងតំបន់ដីរដ្ឋ និងដីព្រៃផ្សេងទៀត៥៥ភាគរយ។ ចាប់ពីខែសីហា ឆ្នាំ២០១៤ ដីសម្បទានសេដ្ឋកិច្ចជាច្រើន ត្រូវបានលុបចោលទាំងស្រុង។
កាលពីខែឧសភា ឆ្នាំ២០១២ រដ្ឋាភិបាលកម្ពុជា បានចេញនូវបទបញ្ជា០១ ស្ដីពីវិធានការពង្រឹង និងបង្កើនប្រសិទ្ធិភាពនៃការគ្រប់គ្រងដីសម្បទានសេដ្ឋកិច្ចដោយប្រកាសឲ្យក្រសួង ស្ថាប័ន និងអាជ្ញាធរ ដែលមានសមត្ថកិច្ចពាក់ព័ន្ធ អនុវត្តឲ្យមានប្រសិទ្ធិភាពនូវគោលនយោបាយនិងលក្ខខណ្ឌទាំងឡាយរបស់រដ្ឋាភិបាលស្ដីពីការផ្ដល់ដីសម្បទានសេដ្ឋកិច្ច។ ចំពោះក្រុមហ៊ុនដែលមិនបានអនុវត្តតាមគោលការណ៍និតិវិធីច្បាប់ និងកិច្ចសន្យា រាជរដ្ឋាភិបាលនិងដកហូតដីសម្បទានសេដ្ឋកិច្ចនោះវិញ ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
