អ្នកគាំទ្រខ្មែរមួយចំនួន ថា អាជ្ញាកណ្តាលចិន Ma Ning ជាកីឡាករទី១២របស់សឹង្ហបុរី

កីឡាជាតិ

ជាតិ

អ្នកគាំទ្រខ្មែរមួយចំនួន ថា អាជ្ញាកណ្តាលចិន Ma Ning ជាកីឡាករទី១២របស់សឹង្ហបុរី

09, Jun 2015 , 6:29 pm

រូបភាព

ដោយ: ថ្មីៗ

អ្នកគាំទ្រមួយចំនួនរបស់ក្រុមកីឡាបាល់ទាត់យុវជនជម្រើសជាតិកម្ពុជាអាយុក្រោម២៣ឆ្នាំ (U-23) មិនទាន់ស្ងប់ចិត្តនោះឡើយ ចំពោះលទ្ធផលដែលកម្ពុជាទទួលរងបរាជ័យ ៣-១ ដោយសារម្ចាស់ផ្ទះសឹង្ហបុរី នាការប្រកួតពូល A នៃព្រឹត្តិការណ៍កីឡាស៊ីហ្គេមលើកទី២៨ នៅកីឡដ្ឋាន Jalan Besar កាលពីរាត្រី ថ្ងៃចន្ទ។ ពួកគេបានសរសេរទាំងខឹងសម្បារនៅគណនីហ្វេសប៊ុករបស់ខ្លួនថា លោកអាជ្ញាកណ្តាល Ma Ning មានភាពលំអៀងទៅលើម្ចាស់ផ្ទះ។

លោក Ma Ning ជនជាតិចិន អាយុ៣៦ឆ្នាំ គឺជាអាជ្ញាកណ្តាលដែលទទួលស្គាល់ដោយសហព័ន្ធកីឡាបាល់ទាត់អន្តរជាតិ (FIFA) ចាប់តាំងពីឆ្នាំ២០១១ មក ហើយលោកបានបម្រើតួនាទីយ៉ាងទៀងទាត់នៅក្នុងក្របខណ្ឌបាល់ទាត់កំពូលរបស់ចិន និងការប្រកួតអន្តរជាតិនានា ជាពិសេសក្នុងទ្វីបអាស៊ីទាំងមូល។

អ្នកគាំទ្រកម្ពុជា ដែលខឹងសម្បារយ៉ាងខ្លាំងបានចាត់ទុកអាជ្ញាកណ្តាលរូបនេះ ជាកីឡាករទី១២ របស់សឹង្ហបុរី នាអំឡុងនៃការប្រកួតកាលពីល្ងាចថ្ងៃចន្ទ ខណៈទាំងកម្ពុជា និងម្ចាស់ផ្ទះត្រូវការបីពិន្ទុជាចាំបាច់ដើម្បីតោងយកឱកាសឈានទៅកាន់វគ្គពាក់កណ្តាលផ្តាច់ព្រ័ត្រ។

នៅក្នុងការប្រកួត លោក Ma Ning ត្រូវបានអ្នកគាំទ្រខ្មែរវាយតម្លៃថា ចាប់កំហុសខាងកម្ពុជាច្រើនជាងខាងសឹង្ហបុរី។ «ខ្មែរធ្វើខុសតិចតួចពិន័យ ខណៈសឹង្ហបុរី ឈូសជើងផង ឲ្យកែងផង អត់មានពិន័យអ្វីសោះ» នេះជាការលើកឡើងរបស់អ្នកគាំទ្រម្នាក់។

គេហទំព័រកីឡាដ៏ល្បី FourFourTwo ក៏បានសរសេរនៅលើព័ត៌មានរបស់ខ្លួនផងដែរថាលទ្ធផលនៃការប្រកួតអាចមានការប្រែប្រួលខ្លាំង ប្រសិនអាជ្ញាកណ្តាលផ្តល់បាល់ពិន័យឲ្យកម្ពុជានៅដើមតង់ទីមួយ ខណៈរូបភាពវីដេអូពិតជាបង្ហាញឲ្យឃើញថា ប្រធានក្រុម ប្រាក់ មុន្នីឧត្តម ត្រូវខ្សែការពារសឹង្ហបុរី Shakir ឈួសឲ្យដួលនៅតំបន់គ្រោះថ្នាក់។

ចំណុចផ្សេងទៀត ដែលគេបានកត់សម្គាល់នោះ គឺការផ្តល់ឲ្យសឹង្ហបុរី ទាត់បាល់ពិន័យដោយមានរនាំងការពារនៅតំបន់គ្រោះថ្នាក់ បន្ទាប់ពីអ្នកចាំទី អ៊ុំ សេរីរ័ត្ន គ្រាន់តែចាប់បាល់ដែលផ្លាតពីជើងរបស់ខ្សែបម្រើ ឈិន ឈឿន។ ចំណុចផ្សេងទៀតមានដូចជា ការផ្តល់កាតលឿងឲ្យ ចាន់ វឌ្ឍនាកា និងការអនុញ្ញាតឲ្យសឹង្ហបុរី ទាត់បញ្ចូលទីគ្រាប់ទីបី ខណៈកីឡាករនៅតំបន់អកហ្សឺ ជាដើម។

លោក ឆាំង ពិសិដ្ឋ អ្នកចាត់ការទូទៅក្រុម U-23 កម្ពុជា បានសម្តែងការខឹងសម្បារចំពោះលោក អាជ្ញាកណ្តាល Ma Ning នៅពេលលោកថ្លែងទៅកាន់អ្នកសារព័ត៌មានក្រោយការប្រកួតផងដែរ។ លោកបានចោលប៊ិច បន្ទាប់ពីបានមើលឃើញការកាត់ក្តីដ៏អយុត្តិធម៌។ លោកបានកាត់សម្គាល់ផងដែរថា អាជ្ញាកណ្តាលបានធ្វើឲ្យខាតពេលជាច្រើនក្នុងការប្រកួតតាមរយៈការរត់ចុះឡើងទៅសួរជំនួយការរបស់ខ្លួន ដោយគ្មានប្រើកាសដើម្បីទំនាក់ទំនងគ្នា។