អ្នកគាំទ្រមួយចំនួនរបស់ក្រុមកីឡាបាល់ទាត់យុវជនជម្រើសជាតិកម្ពុជាអាយុក្រោម២៣ឆ្នាំ (U-23) មិនទាន់ស្ងប់ចិត្តនោះឡើយ ចំពោះលទ្ធផលដែលកម្ពុជាទទួលរងបរាជ័យ ៣-១ ដោយសារម្ចាស់ផ្ទះសឹង្ហបុរី នាការប្រកួតពូល A នៃព្រឹត្តិការណ៍កីឡាស៊ីហ្គេមលើកទី២៨ នៅកីឡដ្ឋាន Jalan Besar កាលពីរាត្រី ថ្ងៃចន្ទ។ ពួកគេបានសរសេរទាំងខឹងសម្បារនៅគណនីហ្វេសប៊ុករបស់ខ្លួនថា លោកអាជ្ញាកណ្តាល Ma Ning មានភាពលំអៀងទៅលើម្ចាស់ផ្ទះ។
លោក Ma Ning ជនជាតិចិន អាយុ៣៦ឆ្នាំ គឺជាអាជ្ញាកណ្តាលដែលទទួលស្គាល់ដោយសហព័ន្ធកីឡាបាល់ទាត់អន្តរជាតិ (FIFA) ចាប់តាំងពីឆ្នាំ២០១១ មក ហើយលោកបានបម្រើតួនាទីយ៉ាងទៀងទាត់នៅក្នុងក្របខណ្ឌបាល់ទាត់កំពូលរបស់ចិន និងការប្រកួតអន្តរជាតិនានា ជាពិសេសក្នុងទ្វីបអាស៊ីទាំងមូល។