កីឡាជាតិ
ជាតិ
ជម្រុះ World Cup៖ គ្រូបង្វឹកកម្ពុជា និងសឹង្ហបុរី សុទ្ធតែអះអាងថា មានការត្រៀមខ្លួនបានល្អ
× លោក Kazunori Ohara គ្រូបង្វឹកក្រុមជម្រើសជាតិ និងលោក Bernd Stange គ្រូបង្វឹកក្រុមជម្រើសជាតិសឹង្ហបុរី បានប្រាប់អ្នកសារព័ត៌មានក្នុងសន្និសីទដោយឡែកពីគ្នាកាលពីថ្ងៃម្សិលមិញថា ក្រុមរបស់ពួកគេមានត្រៀមខ្លួនរួចរាល់ហើយ សម្រាប់ជំនួបបើកឆាកពូល E នៃការប្រកួតជម្រុះជុំទីពីរប្រចាំតំបន់អាស៊ី ក្នុងដំណើរឆ្ពោះទៅកាន់ព្រឹត្តិការណ៍ World Cup ឆ្នាំ២០១៨ ។ កម្ពុជាបើកទ្វាទទួលភ្ញៀវសឹង្ហបុរីនាវេលាម៉ោង៦ និង៣០នាទីល្ងាចនេះនៅ ពហុកីឡដ្ឋានជាតិអូឡាំពិក។
លោក Kazunori Ohara គ្រូបង្វឹកជនជាតិជប៉ុន បានលើកឡើងថា កម្ពុជាធ្វើបានយ៉ាងល្អនាការប្រកួតមិត្តភាពពីរលើកកន្លងមកជាមួយក្រុមជម្រើសជាតិឡាវ និងក្រុមជម្រើសជាតិមីយ៉ាន់ម៉ារ ហើយលោករំពឹងថា ស្ថានភាពនឹងល្អប្រសើរនាជំនួបផ្លូវការជាមួយសឹង្ហបុរី។
លោកបានកត់សម្គាល់ថា៖ «កីឡាករកម្ពុជាសុទ្ធតែមានការតាំងចិត្តខ្ពស់សម្រាប់ជំនួបដ៏សំខាន់នេះ។ ជាមួយនឹងកម្លាំងចិត្តរបស់ក្រុមអ្នកគាំទ្រនៅលើទឹកដីរបស់ខ្លួន ខ្ញុំមានជំនឿថា ការប្រកួតលើកដំបូងនៅវគ្គជម្រុះជុំទីពីររបស់កម្ពុជានឹងទទួលបានលទ្ធផលល្អ»។
ស្របពេលជាមួយគ្នានេះ ផងដែរ គ្រូបង្វឹកជនជាតិអាល្លឺម៉ង់ លោក Bernd Stange ដែលធ្លាប់ដឹកនាំក្រុមជម្រើសជាតិអូម៉ង់ អ៊ីរ៉ាក់ និងបេឡារុស ទាំងក្លិបមួយចំនួននៅអាល្លឺម៉ង់ អ៊ុយក្រែន អូស្ត្រាលី និងស៊ីប ចាប់ពីឆ្នាំ១៩៧០ មកនោះ មានជំនឿថា សឹង្ហបុរី នឹងដណ្តើមបានបីពិន្ទុនាការប្រកួតបើកឆាក។
«ការប្រកួត World Cup ជាការប្រកួតដ៏សំខាន់របស់ក្រុមជម្រើសជាតិនានាលើពិភពលោក។ ពិតណាស់នៅក្នុងពូល E នេះ ជប៉ុនគឺជាក្រុមដែលមានកម្រិតខ្ពស់ជាងគេ ប៉ុន្តែយើងនៅតែមានក្តីសង្ឃឹមខ្ពស់។ សម្រាប់ជំនួបជាមួយកម្ពុជា បើទោះបីយើងមានជំនឿថាឈ្នះក៏ដោយ ប៉ុន្តែយើងត្រូវតែគោរពគូប្រកួត»។ នេះជាការលើកឡើងរបស់លោក Bernd Stange ដោយកត់សម្គាល់ផងដែរថា កម្ពុជាមានការវិវត្តយ៉ាងច្រើននារយៈពេលចុងក្រោយនេះ ជាពិសេសសមត្ថភាពកីឡាករក្មេងៗនៅតំបន់ប្រយុទ្ធ។
នាសន្និសីទសារព័ត៌មានផងដែរ ប្រធានក្រុមជម្រើសជាតិកម្ពុជា គួច សុគម្ភៈ បានអំពាវនាវឲ្យក្រុមអ្នកគាំទ្រចូលរួមលើកទឹកចិត្តក្រុមជម្រើសជាតិទាំងមូល ហើយខ្សែប្រយុទ្ធរូបនេះ បានអះអាងថា កីឡាករទាំងអស់នឹងខិតខំឲ្យអស់ពីសមត្ថភាពដើម្បីនាំយកជ័យជម្នះជូនជាតិ។
មុនជំនួបល្ងាចនេះ ក្រុមជម្រើសជាតិកម្ពុជាបានប្រកួតមិត្តភាពដោយបញ្ចប់លទ្ធផលស្មើ ១-១ ជាមួយឡាវនៅពហុកីឡដ្ឋានជាតិ និងឈ្នះមីយ៉ាន់ម៉ារ ១-០ នៅលើទឹកដីថៃ ខណៈសឹង្ហបុរីឈ្នះប្រ៊ុយណេ ៥-១ ឈ្នះបង់ក្លាដេស ២-១ ស្មើហ្គាម ២-២ និងចាញ់ថៃ ២-០ ។
សម្រាប់ជំនួបចុងក្រោយ កាលពីឆ្នាំ២០១៤ សឹង្ហបុរី បានទទួលជ័យជម្នះក្នុងលទ្ធផល ៤-២ ខណៈ ឃួន ឡាបូរ៉ាវី គឺជាស៊ុតបាល់បញ្ចូលទីទាំងពីរគ្រាប់សម្រាប់ក្រុមកម្ពុជា៕
© រក្សាសិទ្ធិដោយ thmeythmey.com