ជាតិ
×![]()
ដោយ: ធឿន បញ្ញាឬទិ្ធ
សហភាពអឺរ៉ុបជំរុញឲ្យរដ្ឋាភិបាលកម្ពុជា ចាត់វិធានការកាប់បំផ្លាញព្រៃឈើខុសច្បាប់ ដើម្បីការពារទប់ស្កាត់ការប្រែប្រួលអាកាសធាតុនៅប្រទេសកម្ពុជា។ សហភាពអឺរ៉ុបប្រារព្វពិធីបើកយុទ្ធនាការការទូតស្ដីពី ការប្រែប្រួលអាកាសធាតុ «យើងត្រូវចាប់ផ្ដើមឥឡូវនេះ» នៅព្រឹកថ្ងៃទី១៧ មិថុនា នៅទីស្នាក់ការសហភាពអឺរ៉ុប។
លោកឯកអគ្គរដ្ឋទូតសហភាពអឺរ៉ុបប្រចាំកម្ពុជា ហ្សង់ហ្វ្រង់ស័រ កូតាន់ មានប្រសាសន៍ថា ក្នុងនាមជាដៃគូឈានមុខរបស់ប្រទេសកម្ពុជា សហភាពអឺរ៉ុបគាំទ្រកម្ពុជា ក្នុងការប្រយុទ្ធប្រឆាំងនឹងការប្រែប្រួលអាកាសធាតុ និងកាត់បន្ថយការប្រឈមនឹងគ្រោះមហន្តរាយនៅក្នុងប្រទេសកម្ពុជា។ ទន្ទឹមនឹងការចូលរួមចំណែកប្រឆាំងការប្រែប្រួលអាកាសធាតុ ជាមួយរដ្ឋាភិបាលកម្ពុជានេះ សហភាពអឺរ៉ុប និងបណ្ដាស្ថានទូតនៃរដ្ឋជាសមាជិករបស់ខ្លួន ចាប់ផ្ដើមចាប់ដៃជាមួយប្រជាជនកម្ពុជា ក្នុងការបើកយុទ្ធនាការការទូតអំពីអាកាសធាតុក្រោមប្រធានបទ «យើងត្រូវចាប់ផ្ដើមឥឡូវនេះ»។
ជាមួយគ្នានេះលោកឯកអគ្គរដ្ឋទូតសហភាពអឺរ៉ុបរូបនេះ បានបញ្ជាក់ថា ដើម្បីប្រឆាំងនឹងការប្រែប្រួលអាកាសធាតុ និងកាត់បន្ថយគ្រោះមហន្តរាយនានា រដ្ឋាភិបាលកម្ពុជាគប្បីត្រូវចាត់វិធានការទប់ស្កាត់លើការកាប់បំផ្លាញព្រៃឈើខុសច្បាប់ ពាណិជ្ជកម្មឈើខុសច្បាប់។ ជាពិសេសការសាងសង់វារីអគ្គិសនី ដែលតម្រូវឲ្យមានកាប់ព្រៃឈើ ដូចនេះរដ្ឋាភិបាលត្រូវមានការត្រួតពិនិត្យ និងវិភាគពីផលប៉ះពាល់ឲ្យបានត្រឹមត្រូវ ដើម្បីប្រឆាំងការប្រែប្រួលអាកាសធាតុ។ហើយសង្គមស៊ីវិល និងប្រជាពលរដ្ឋតាមមូលដ្ឋានត្រូវចូលរួមទប់ស្កាត់ការកាប់បំផ្លាញព្រៃឈើនេះ«អ្វីដែលត្រូវធ្វើជាចម្បងជាងគេ គឺការប្រយុទ្ធប្រឆាំងការកាប់បំផ្លាញ់ព្រៃឈើខុសច្បាប់ ។ ហើយចំណុចនេះគឺទាក់ទងនិតិរដ្ឋនៅក្នុងប្រទេសនីមួយដែរ។នេះជាការបញ្ជាក់របស់លោកហ្សង់ហ្វ្រង់ស័រ កូតាន់។
លោកឯកអគ្គរដ្ឋទូតបន្ថែមថា គោលដៅចូលរួមចំណែក របស់សហភាពអឺរ៉ុបនេះគឺជាយោបល់ដើម្បីចែករំលែកឲ្យរដ្ឋាភិបាលកម្ពុជាយកចិត្តទុកដាក់ និងពិចារណាឲ្យបានច្បាស់លាស់ ព្រោះអ្វីដែលសហភាពអឺរ៉ុបលើកឡើងនេះ គឺជាបទពិសោធន៍ខុសឆ្គង ដែលសហគមន៍អឺរ៉ុបធ្លាប់ធ្វើកំហុសពីអតីតកាលកន្លងមក។
លោកស្រី គ្រីស្ទីណា ប្រធានសហប្រតិបត្តិការស៊ុយអែតប្រចាំកម្ពុជា មានប្រសាសន៍ថា ផែនការយុទ្ធសាស្ត្រក្នុងការប្រឆាំងនឹងការប្រែប្រួលអាកាសធាតុ ក៏មានពាក់ព័ន្ធនឹងបញ្ហានយោបាយផងដែរ ដែលត្រូវការពេលវេលារៀបចំឲ្យបានត្រឹមត្រូវ។លើសពីនេះការអប់រំប្រជាពលរដ្ឋនៅតាមសហគមន៍មូលដ្ឋាននានា ឲ្យមានការយល់ដឹង ដើម្បីចូលរួមទប់ស្កាត់ និងកាត់បន្ថយការប្រែប្រួលអាកាសធាតុ និងគ្រោះមហន្តរាយ។
សហភាពអឺរ៉ុប និងដៃគូជាសមាជិកខ្លួន នឹងរៀបចំសន្និសីទបើកយុទ្ធនាការការទូតស្ដីពី ការប្រែប្រួលអាកាសធាតុ «យើងត្រូវចាប់ផ្ដើមឥឡូវនេះ» នៅតាមបណ្ដាប្រទេសទាំងអស់ ដើម្បីយកក្តីបារម្ភនៃការប្រែប្រួលអាកាសធាតុតាមប្រទេសនីមួយៗ ទៅពិភាក្សានៅក្នុងសន្និសីទស្ដីពីការប្រែប្រួលអាកាសធាតុរបស់អង្គការសហប្រជាជាតិ COP21 ដែលនឹងរៀបចំនៅទីក្រុងប៉ារីស ប្រទេសបារាំង ចាប់ពីថ្ងៃទី៣០ វិច្ឆិកា ដល់ថ្ងៃទី១១ ធ្នូ ឆ្នាំ២០១៥ខាងមុខ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
