ជាតិ
នយោបាយជាតិ
លោក កឹម សុខាថា រដ្ឋសភាគួរតែពន្យាពេលអនុម័តច្បាប់NGOសិន
×
លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១រដ្ឋសភា មានប្រសាសន៍ថា សេចក្ដីព្រាងច្បាប់សមាគម និងអង្គការក្រៅរដ្ឋាភិបាលនេះ គួរតែពន្យាពេលសិនព្រោះថាប្រទេសកម្ពុជានាពេលមិនទាន់ចាំបាច់ត្រូវការច្បាប់នេះនៅឡើយទេ។ ការលើកឡើងរបស់លោក កឹម សុខា នេះ ធ្វើឡើងក្នុងជំនួបជាមួយតំណាងអង្គការសង្គមស៊ីវិលចំនួន១០ ពិភាក្សាអំពីក្ដីកង្វល់របស់ពួកគេ នៅព្រឹកថ្ងៃទី១៧ មិថុនា នាវិមានរដ្ឋសភា។
ក្នុងជំនួបជាមួយតំណាងអង្គការសង្គមស៊ីវិលចំនួន១០ទាំងនោះ លោក កឹម សុខា មិនហ៊ានបញ្ចេញមតិ ឬយោបល់ប្រតិកម្មខ្លាំងៗលើសេចក្ដីព្រាងច្បាប់នេះឡើយ ដោយលោកគ្រាន់តែបញ្ជាក់ថា រូបលោកផ្ទាល់ និងអ្នកតំណាងរាស្ត្រដទៃទៀត មិនទាន់ដឹងនិងបានទទួលសេចក្ដីព្រាងច្បាប់នេះ ជាផ្លូវការច្បាស់លាស់នៅឡើយទេ រហូតមកដល់ពេលនេះ។ តែយ៉ាងណាអនុប្រធានទី១រដ្ឋសភារូបនេះ បន្ថែមថា ប្រទេសកម្ពុជានៅមានច្បាប់ជាច្រើនទៀត ដែលចាំបាច់ពិភាក្សា និងអនុម័តមុនសេចក្ដីព្រាងច្បាប់ សមាគម និងអង្គការក្រៅរដ្ឋាភិបាលនេះ។
ថ្លែងចំពោះមុខអ្នកកាសែត លោក កឹម សុខា បានបញ្ជាក់គោលជំហរយ៉ាងដូច្នេះថា៖«យើងគិតថា ប្រទេសកម្ពុជានៅមានច្បាប់ច្រើនណាស់ដែលចាំបាច់ជាង ត្រូវការបន្ទាន់ជាងច្បាប់សមាគម និងអង្គការទៀត ដែលយើងត្រូវការយកមកពិភាក្សាអនុម័តមុន…ដូចជា៣ដែលបានអនុម័តនៅពេលដែលសភាយើងមិនទាន់ជុំគ្នា គួរតែយកមកវិសោធនកម្ម ដើម្បីជជែកគ្នាចូលរួមទាំង២បក្ស។ឥឡូវនេះខ្ញុំបញ្ជាក់ជូនថា ទី១យើងគិតថាមិនទាន់ចាំបាច់ទេ បើអាចពន្យាពេលបាន គួរតែពន្យាពេលសិន យកច្បាប់ចាំបាច់មកធ្វើមុន។ ជំហទី២ បើសិនជារដ្ឋាភិបាលយល់ថាចាំបាច់ បង្ហាញពីហេតុផលច្បាស់លាស់ យើងគួរមានការពិភាក្សាបើកឲ្យទូលំទូលាយ ហើយមានភាគីពាក់ព័ន្ធចូលរួមជាគំនិត មិនមែនបើកម្ដង បញ្ចូលសិក្ខាសាលាមួយភ្លេត ឬមួយថ្ងៃទេ…»។
សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលដ៏ចម្រូងចម្រាស ត្រូវបានរាជរដ្ឋាភិបាល អះអាងថា បង្កើតឡើងដើម្បីលើកស្ទួយការប្រើប្រាស់សិទ្ធិសេរីភាព ក្នុងការបង្កើត សមាគម និងអង្គការមិនមែនរដ្ឋាភិបាល និងលើកកម្ពស់កិច្ចប្រតិបត្តិការជាមួយអង្គការសង្គមស៊ីវិលលើគ្រប់វិស័យ។ តែយ៉ាងណាអង្គការសង្គមស៊ីវិលជាតិ និងអន្តរជាតិ មានការព្រួយបារម្ភថា ច្បាប់នេះអាចរឹតត្បិតសិទ្ធិសេរីភាពរបស់ពួកគេ។ កន្លងមកសង្គមស៊ីវិលទាំងនោះ ក៏ស្នើឲ្យរដ្ឋសភា បើកកិច្ចពិគ្រោះយោបល់ដោយចំហរជាមុនសិនទៅលើសេចក្ដីព្រាងច្បាប់នេះ មុននឹងសភាអនុម័ត។
សេចក្ដីព្រាងច្បាប់ស្ដីពី សមាគម និងអង្គការមិនមែនរដ្ឋាភិបាល ដែលរដ្ឋាភិបាលអនុម័តនេះគឺមាន០៩ជំពូក និង៣៩មាត្រា ក្រោយពីរដ្ឋាភិបាលបានពិនិត្យកែសម្រួលនិងលុបចោលចំនួន២មាត្រាកាលពីថ្ងៃទី៥មិថុនាកន្លងមក៕
© រក្សាសិទ្ធិដោយ thmeythmey.com