ជាតិ
នយោបាយជាតិ
ព្រំដែន៖ រដ្ឋាភិបាលបន្តតវ៉ាបែបការទូត ខណៈអ្នកវិភាគជំរុញឲ្យប្តឹងទៅស្ថាប័នអន្តរជាតិ
× លោក ជុំ សន្ទរី អ្នកនាំពាក្យក្រសួងការបរទេសកម្ពុជា អះអាងថា រដ្ឋាភិបាលនឹងធ្វើការតវ៉ាជាមួយវៀតណាមបន្ដទៀត បើសិនវៀតណាមមិនព្រមធ្វើតាមកំណត់ទូតរបស់កម្ពុជា។ កាលពីពេលថ្មីៗនេះ ក្រសួងការបរទេសកម្ពុជា បានចេញកំណត់ទូតជាបន្តបន្ទាប់ទៅកាន់រដ្ឋាភិបាលវៀតណាមពាក់ព័ន្ធនឹងការំលោភបំពានបូរណភាពទឹកដីកម្ពុជា។អ្នកនយោបាយ និងអ្នកវិភាគ បានជំរុញឲ្យរដ្ឋាភិបាលប្ដឹងទៅកាន់អង្គការសហប្រជាជាតិ ឬទៅតុលាការយុត្តធម៌អន្តរជាតិICJ ដើម្បីបញ្ចប់ភាពចម្រូងសចម្រាសព្រំដែនរវាងកម្ពុជានិងវៀតណាម ក្នុងករណីវៀតណាមមិនឆ្លើយតបកំណត់ទូតរបស់រដ្ឋាភិបាលកម្ពុជា។
កំណត់ទូតរបស់ក្រសួងការបរទេសកម្ពុជា ផ្ញើរទៅកាន់រដ្ឋាភិបាលវៀតណាមជាបន្ដបន្ទាប់ក្នុងរយៈពេលចុងក្រោយនេះ។ អ្នកនាំពាក្យក្រសួងការបរទេសកម្ពុជាលោក ជុំ សន្ទរី អះអាងថា រដ្ឋាភិបាលកម្ពុជានឹងធ្វើការតវ៉ាជាមួយរដ្ឋាភិបាលវៀតណាមបន្ដទៀត ដោយមិនទុកបញ្ហាព្រំដែននេះចោលទេ បើសិនជាវៀតណាមនៅតែព្រងើយកន្ដើយមិនព្រមឆ្លើយតបនឹងកំណត់ទូតកម្ពុជា។ អ្នកនាំពាក្យរូបនេះបន្ថែមថា៖«យើងបានធ្វើកំណត់ទូត១០ហើយ វាទទួលបានលទ្ធផលខ្លះ មិនទទួលបានលទ្ធផលខ្លះ។ លទ្ធផលទទួលបានគឺភាគីទាំងពីរបានសម្រសម្រួលដោះស្រាយបញ្ចប់។ ប៉ុន្ដែកំណត់ទូតយើងទើបតែដាក់ទៅនៅពេលថ្មីៗនេះ ដូច្នេះគេមិនទាន់ឆ្លើយតបមកវិញទេ។ យើងរងចាំមើលសិន បើមិនមានការឆ្លើយតប រដ្ឋាភិបាលកម្ពុជានឹងធ្វើការតវ៉ាបន្ដទៀត ប៉ុន្ដែតាមរូបភាពផ្សេងៗបែបណានោះ គឺខ្ញុំមិនទាន់អាចផ្ដល់ព័ត៌មានបានទេ ដោយអាស្រ័យលើថ្នាក់ដឹកនាំ»។
អ្នកនយោបាយ និងអ្នកវិភាគជំរុញឲ្យរដ្ឋាភិបាលប្ដឹងទៅកាន់អង្គការសហប្រជាជាតិ ឬទៅតុលាការយុត្តធម៌អន្តរជាតិICJ ដើម្បីបញ្ចប់ភាពចម្រូងសចម្រាសព្រំដែនរវាងកម្ពុជានិងវៀតណាមបើសិនវៀតណាមនៅតែមិនអើពើចំពោះកំណត់ទូតរបស់រដ្ឋាភិបាលកម្ពុជា។
អ្នកវិភាគសង្គមលោក កែម ឡី មានប្រសាសន៍ថា សកម្មភាពភ្លាមៗរបស់រដ្ឋាភិបាលកម្ពុជាដាក់កំណត់ទូតទៅកាន់រដ្ឋាភិបាលវៀតណាម គឺរឿងល្អដែលគួរឲ្យគាំទ្រនិងលើកទឹកចិត្ត។ ប៉ុន្ដែការធ្វើកំណត់ទូតនេះ មិនអាចឲ្យភាពចម្រូងចម្រាសព្រំដែនកម្ពុជាបញ្ចប់នោះទេ។ អ្នកវិភាគរូបនេះបន្ថែមថា រដ្ឋាភិបាលគួរតែសិក្សាពីទឹកដីនៅតាមព្រំដែនដែលបាត់បង់ និងដីដែលនៅសល់ឲ្យបានច្បាស់ ដើម្បីធ្វើបទបង្ហាញតទល់ជាមួយវៀតណាម ឬប្ដឹងទៅតុលាការយុត្តិធម៌អន្តរជាតិ ICJ ដើម្បីបញ្ចប់បញ្ហាព្រំដែន«បើទោះជាវៀតណាមឆ្លើយតបមួយករណីៗ រឿងព្រំដែនខ្មែរ និងវៀតណាមនេះគឺអត់ចប់ទេ។ កំណត់ទូតហើយមិនឆ្លើយតប ធ្វើលិខិតកោះអញ្ជើញប្រមុខទូតវៀតណាមនៅកម្ពុជាមកជជែកគ្នា ហើយធ្វើបទបង្ហាញពីព្រំដែនគ្នា ម្នាក់ម្ដងវៀតណាមបង្ហាញពីព្រំដែនខ្លួន ហើយកម្ពុជាបង្ហាញព្រំដែនខ្លួន។ហើយបើចង់ឲ្យបញ្ចប់ប្ដឹងទៅICJ ។ ហើយរដ្ឋាភិបាលត្រូវអភិវឌ្ឍន៍ ធ្វើផ្លូវ តំបន់ទេសចរណ៍នៅតាមព្រំដែនដើម្បីឲ្យប្រជាពលរដ្ឋជួយការពារ ព្រោះរដ្ឋាភិបាលម្នាក់ឯងមិនអាចការពារព្រំដែនបានទេ»។នេះជាការបញ្ជាក់របស់លោក កែម ឡី។
លោក រស់ រ៉ាវុធ អ្នកវិភាគសង្គមយល់ថា ការកំណត់ទូតរបស់រដ្ឋាភិបាលកម្ពុជានាពេលនេះ គឺគ្រាន់តែចង់បង្ហាញថា រដ្ឋាភិបាលមិនបានព្រងើយកន្តើយចំពោះបញ្ហាព្រំដែនប៉ុណ្ណោះ។លោកថា រដ្ឋាភិបាលមិនត្រូវបណ្ដែតបណ្ដោយរឿងបញ្ហារំលោភបំពានទឹកដីពីវៀតណាមនេះទៀតទេ។ រដ្ឋាភិបាលគួរជូនដំណឹងទៅសមាគមន៍អាស៊ានឲ្យបានដឹងពីបញ្ហាឈ្លានពានពីសំណាក់វៀតណាម ហើយដាក់ពាក្យបណ្ដឹងទៅកាន់អង្គការសហប្រជាជាតិ ដើម្បីដោះស្រាយបញ្ហាព្រំដែននេះ។ អ្នកវិភាគរូបនេះពន្យល់យ៉ាងដូច្នេះថា៖«កុំថាឡើយកំណត់ទូត១០ ទោះបីកំណត់ទូត២០ទៀត ក៏គ្មានប្រយោជន៍ដែរ។ ក្នុងទិដ្ឋភាព២ បើភាគីវៀតណាមមិនឆ្លើយតបកំណត់ទូត រដ្ឋាភិបាលកម្ពុជាធ្វើលិខិតកោះអញ្ជើញទូតវៀតណាម មកបង្ហាញពីការរំលោភបំពានទឹកដីកម្ពុជា។ ចំណុចមួយទៀតជូនដំណឹងទៅអាស៊ាន រួចប្ដឹងទៅអង្គការសហប្រជាជាតិ។
ចំណែកលោក អ៊ំ សំអាន តំណាងរាស្ត្រគណបក្សសង្គ្រោះជាតិ ដែលតែងតែសកម្មនឹងបញ្ហព្រំដែននេះ យល់ថា ការកំណត់ទូតនេះគឺរដ្ឋាភិបាលគ្រាន់តែឲ្យប្រជាពលរដ្ឋស្ងប់ចិត្តប៉ុណ្ណោះ។ លោកបន្ថែមថា រដ្ឋាភិបាលគួរតែបង្ហាញជំហររបស់ខ្លួនក្នុងការដោះស្រាយបញ្ហាព្រំដែន ប្រសិនបើវៀតណាមនៅតែមិនឆ្លើយតបជាវិជ្ជមានចំពោះកំណត់ទូតដែលកម្ពុជាបានដាក់ទៅនោះ ។ ជាមួយគ្នានេះលោកស្នើឲ្យរដ្ឋាភិបាលកម្ពុជា បង្កើតគណកម្មាការព្រំដែនដោយមានការចូលរួមគណបក្សនយោបាយទាំងពីរនៅក្នុងរដ្ឋសភា សង្គមស៊ីវិល អង្គការសហប្រជាជាតិ និងតំណាងមកពីប្រទេសបារាំង ដើម្បីកំណត់ព្រំដែនកម្ពុជា ជាមួយប្រទេសជិតខាងឲ្យបានច្បាស់«រដ្ឋាភិបាលមិនទាន់បង្ហាញជំហរច្បាស់នោះទេ ខ្ញុំចង់រដ្ឋាភិបាលបង្ហាញជំហរឲ្យបានច្បាស់នឹងការតវ៉ាបន្ថែមទៀត បើសិនជាវៀតណាមមិនឆ្លើយតបហើយនៅកន្លែងដដែលនោះ ដូច្នេះរដ្ឋាភិបាលត្រូវដាក់ពាក្យប្ដឹងទៅកាន់តុលាការអន្តរជាតិICJ រួចឆ្លើយតទល់ជាមួយគ្នានៅទីនោះ»។ នេះជាការបញ្ជាក់របស់លោក អ៊ំ សំអាន។
កាលពីពេលថ្មីៗនេះក្រសួងការបរទេសកម្ពុជា បានដាក់កំណត់ទូតចំនួន២លើកទៅកាន់ស្ថានទូតវៀតណាម ក្រោយពីភាគីកម្ពុជា បានរកឃើញស្រះទឹកចំនួន៨ ជីកខុសច្បាប់ដោយភាគីវៀតណាមនៅតំបន់ស ដោយខុសការកំណត់នៃកិច្ចព្រមព្រៀងរវាងប្រទេសទាំងពីរ។ ការអះអាងរបស់រដ្ឋាភិបាលកម្ពុជានេះ គឺធ្វើឡើងដោយយោងលើផែនទីខ្នាត ១/១០០.០០០ ។ ចំណែកថ្ងៃទី១៧មិថុនា ក្រសួងការបរទេស ដាក់កំណត់ទូតថ្មីមួយទៀត ទៅកាន់រដ្ឋាភិបាលវៀតណាម ឲ្យបញ្ឈប់ការជីកដីធ្វើគ្រឹះសម្រាប់ការសាងសង់ប៉ុស្តិ៍យោធា នៅត្រង់ចំណុចភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល ។
លិខិតរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ប្រាប់ទៅប្រធានរដ្ឋសភា លោក ហេង សំរិន ដោយបានបញ្ជាក់ថា រូបលោកបានដាក់កំណត់ទូតចំនួន៨ច្បាប់ ទៅកាន់រដ្ឋាភិបាលវៀតណាម អំពីការរំលោភបំពានលើទឹកដីកម្ពុជានៅតំបន់ផ្សេងៗ ចាប់ពីឆ្នាំ២០១៣ ដល់ឆ្នាំ២០១៥ ។លោក ហោ ណាំហុង បានបញ្ជាក់ថា រាជរដ្ឋាភិបាលកម្ពុជា បានតវ៉ាពីការរំលោភបំពានទឹកដីកម្ពុជានេះ ទៅកាន់រដ្ឋាភិបាលវៀតណាមជាច្រើនដងមកហើយ៕
© រក្សាសិទ្ធិដោយ thmeythmey.com