ជាតិ
មន្ត្រីជាន់ខ្ពស់CPP ជាច្រើន joined Telegram នៅថ្ងៃសៅរ៍នេះ
× ប្រធានគណបក្សប្រជាជនកម្ពុជាលោក ហ៊ុន សែន នៅតែបន្តនិយាយអំពីវិស័យបច្ចេកវិទ្យានៅចំពោះមុខមន្ត្រីរបស់ខ្លួន។ ក្រៅពីផ្តល់ដំបូន្មានដល់សមាជិកអំពីការងាររបស់បក្សនោះ នៅក្នុងសន្និបាតគណៈកម្មាធិការកណ្តាលនៅថ្ងៃសៅរ៍ទី២០មិថុនានេះ លោក ហ៊ុន សែន ក៏និយាយអំពីបណ្តាញសង្គម telegram ដែរ។ នេះបើតាមការបង្ហើបពីមន្ត្រីគណបក្សមួយចំនួន។
នៅថ្ងៃសៅរ៍នេះ ក្រុមហ៊ុន Telegram បានទទួលអតិថិជន (user) ថ្មីជាច្រើននាក់ ដែលជាសមាជិកគណបក្សប្រជាជនកម្ពុជាពីប្រទេសកម្ពុជា។ សមាជិកជាច្រើនដែលរួមមាន ទីប្រឹក្សាលោកនាយករដ្ឋមន្ត្រី រដ្ឋមន្ត្រី អ្នកតំណាងរាស្ត្រ ថ្នាក់ដឹកនាំនគរបាល និងកងទ័ពផង បានដំឡើងប្រព័ន្ធទំនាក់ទំនងសង្គមឈ្មោះ Telegram នៅក្នុងទូរសព្ទដៃឆ្លាត (smartphone) របស់ខ្លួន។
វត្តមានរបស់សមាជិកគណបក្សប្រជាជនកម្ពុជា ពិសេសមន្ត្រីជាន់ខ្ពស់ បន្ថែមទៀតនៅក្នុងបណ្តាញសង្គម Telegram បានកើតឡើង ភ្លាមៗក្រោយពីលោក ហ៊ុន សែន ដែលជាប្រធានគណបក្សបាននិយាយអំពីបណ្តាញសង្គមមួយនេះនៅក្នុងសន្និបាត។ នេះបើតាមការបង្ហើបរបស់មន្ត្រីជាន់ខ្ពស់មួយចំនួនដែលមានវត្តមាននៅក្នុងសន្និបាតគណៈកម្មាធិការកណ្តាលលើកទី៣៨ នៅថ្ងៃទី២០មិថុនានេះ។
ក្នុងរយៈពេលចុងក្រោយនេះ ប្រធានគណបក្សប្រជាជនកម្ពុជា ដែលជានាយករដ្ឋមន្ត្រីផងនោះ បានលើកឡើងច្រើនអំពីសារៈប្រយោជន៍នៃការប្រើប្រាស់បច្ចេកវិទ្យា។ តាមរយៈប្រសាសន៍របស់លោកនៅតាមវេទិកាសាធារណៈនានា គេដឹងថាលោកនាយករដ្ឋមន្ត្រី ហ៊ុន សែន ក៏កំពុងប្រើប្រព័ន្ធបណ្តាញសង្គម WatsApp ដែលធ្វើឲ្យគេអាចយល់បានថា មន្ត្រីជាច្រើនក៏កំពុងប្រើប្រាស់ប្រព័ន្ធនេះដែរ ដើម្បីទាក់ទងគ្នា និងចែករម្លែកព័ត៌មានរវាងគ្នា និងគ្នា។
គួររម្លឹកថា លោក ហ៊ុន សែន ក៏ធ្លាប់និយាយដាស់តឿនសមាជិកគណបក្ស និងមន្ត្រីរដ្ឋាភិបាលរបស់លោក ឲ្យធ្វើខ្លួនឲ្យទំនើបទៅតាមការវិវត្តនៃប្រព័ន្ធបច្ចេកវិទ្យាផងដែរ។
បើទោះលោកនាយករដ្ឋមន្ត្រីបានបង្ហើបអំពីការប្រើប្រាស់ប្រព័ន្ធបណ្តាញសង្គមមួយចំនួន ប៉ុន្តែរហូតដល់ពេលនេះ នៅតែមិនមានការអះអាងផ្លូវការនៅឡើយថា គណនីហ្វ៊េសប៊ុកមួយដែលមានឈ្មោះជាភាសាអង់គ្លេសថា «Samdech Hun Sen, Cambodina Prime Minister» ជាគណនីហ្វ៊េសប៊ុកផ្ទាល់របស់លោកនាយករដ្ឋមន្ត្រី ឬក៏មិនមែននោះឡើយ។ ប៉ុន្តែគេសង្កេតឃើញមានរូបថតព្រឹត្តិការណ៍ជាច្រើនស្តីពីជំនួបរបស់លោកនាយករដ្ឋមន្ត្រី ជាមួយប្រតិភូបរទេស នៅក្នុងទំព័រហ្វ៊េសប៊ុកនោះ ហើយថាព្រឹត្តិការណ៍ទាំងនោះ សុទ្ធតែជាព័ត៌មានបច្ចុប្បន្នភាពដែលសារព័ត៌មានក្នុងស្រុកជាច្រើនបានផ្សព្វផ្សាយដែរ៕
© រក្សាសិទ្ធិដោយ thmeythmey.com