ជាតិ
នយោបាយជាតិ
លោក សម រង្ស៊ី បន្តអំពាវនាវរកលុយបើកទូរទស្សន៍«ព្រះអាទិត្យ»
× ភ្នំពេញ៖ លោក សម រង្ស៊ី ប្រធានគណបក្សសង្គ្រោះជាតិបានអំពាវនាវរកលុយពីប្រជាជន ដើម្បីរៀបចំដំណើរការទូរទស្សន៍«ព្រះអាទិត្យ»។ ទូរទស្សន៍ដែលមិនគាំទ្រគណបក្សប្រជាជនកម្ពុជាកាន់អំណាចដំបូងគេ តែមានសមានចិត្តលើគណបក្សសង្គ្រោះជាតិនោះ កំពុងត្រៀមលក្ខណៈទាំងបច្ចេកទេស និងហិរញ្ញវត្ថុ ដើម្បីចាប់ផ្តើមដំណើរការមុនដំណាច់ឆ្នាំ ២០១៥នេះ។
គណបក្សសង្គ្រោះជាតិនឹងចាប់ផ្តើមទទួលថវិកាវិភាគទានពីប្រជាជន ចាប់ពីថ្ងៃទី២៧ ខែមិថុនា ឆ្នាំ២០១៥ខាងមុខនេះ ដើម្បីរៀបចំកម្មវិធីទូរទស្សន៍«ព្រះអាទិត្យ»របស់ពួកគេ ដែលនឹងចាប់ផ្តើមផ្សព្វផ្សាយក្នុងឆ្នាំ ២០១៥។ នេះគឺជាការប្រកាសរបស់ប្រធានគណបក្សសង្គ្រោះជាតិ និងជាដៃគូសន្ទនារបស់លោកនាយករដ្ឋមន្ត្រី ហ៊ុន សែន។ លោក សម រង្ស៊ី ប្រាប់អំពីព័ត៌មាននេះនៅក្នុងទំព័រគណនីហ្វេសប៊ុករបស់លោក។
លោក ហុង សុខហួរ សមាជិកព្រឹទ្ធសភានៃគណបក្ស សម រង្ស៊ី និងជាមនុស្សស្និទ្ធនឹងលោក សម រង្ស៊ី ធ្លាប់បានអះអាងប្រាប់សារព័ត៌មានថ្មីៗ ថា ដំណើរការរៀបចំទូរទស្សន៍ព្រះអាទិត្យ នឹងអាចប្រព្រឹត្តិទៅលឿន ដោយសារតែមានការយកចិត្តទុកដាក់ពីថ្នាក់ដឹកនាំនៃគណបក្សសង្គ្រោះ ជាតិ។
បើតាមការអះអាងរបស់លោក ហុង សុខហួរដដែល ក្រុមហ៊ុនទូរទស្សន៍ថ្មីនេះ នឹងត្រូវធ្វើការជាមួយអ្នកជំនាញ ហើយក៏កំពុងត្រៀមប្រមូលដើមទុន និងអ្នកដែលចង់វិនិយោគជាមួយដែរ។
នៅលើគណនីយហ្វេសប៊ុករបស់ខ្លួន លោក សមរង្ស៊ី បានសរសេរយ៉ាងដូច្នេះថា ស្ថានីយទូរទស្សន៍ថ្មីនេះ ដែលប្រជារាស្ត្រខ្មែររង់ចាំយូរមកហើយ ហើយដែលអាចមានឈ្មោះថា "ទូរទស្សន៍ ព្រះអាទិត្យ" គឺជាលទ្ធផលមួយទៀត នៃវប្បធម៌សន្ទនា បន្ទាប់ពីការបង្កើត គ.ជ.ប. ថ្មីមួយ ដែលគេអាចជឿទុកចិត្តបាន ដើម្បីរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ នៅឆ្នាំ ២០១៧ និង ២០១៨ ៕
© រក្សាសិទ្ធិដោយ thmeythmey.com