អន្តរជាតិ
នយោបាយជាតិ
ក្រិកចៀសមិនរួចពីចាកចេញពីអឺរ៉ុប និងរត់ចូលជាមួយរុស្ស៊ី?
× ពេលវេលាចេះតែខើចទៅៗ ប៉ុន្តែក្រិកប្រវេប្រវ៉ារកលុយសងម្ចាស់បំណុលមិនទាន់បានឡើយ។ នាយរដ្ឋមន្ត្រីក្រិកកំពុងបន្តចរចាជាមួយម្ចាស់បំណុលមានទាំងអឺរ៉ុបនិងមូលនិធិរូបីយវត្ថុអន្តរជាតិផង ដោយរំពឹងអាចសម្រេចបានកិច្ចព្រមព្រៀងមួយមុនថ្ងៃកំណត់សងលុយ។ ប៉ុន្តែមិនឃើញមានសញ្ញាវិជ្ជឡើយជុំវិញការចរចាគ្នាអស់ច្រើនថ្ងៃនេះ ព្រោះក្រិកមិនប្តូរជំហរប្រឆាំងគោលនយោបាយត្បិតត្បៀតរបស់ម្ចាស់បំណុលឡើយ។ ក្រិកមានកាតព្វកិច្ចត្រូវសងលុយជំពាក់គេ ១.៨ពានលាន់ដុល្លារអាមេរិកត្រឹមថ្ងៃ ៣០ខែនេះ ប៉ុន្តែបើគ្មានលុយសងមានតែប្រកាសមិនបំណុលនិងក្លាយជារដ្ឋក្ស័យធន។ ពេលក្រិកក្ស័យធនវាប្រាកដណាស់ថា ក្រិកនឹងចាកចេញមិស្តាយស្រណោះពីតំបន់ចាយលុយអឺរ៉ូនិងសហភាពអឺរ៉ុបផងក៏មិនដឹង។ យ៉ាងណាក៏ដោយ ប្រសិនបើក្រិកចាកចេញពីសហភាពអឺរ៉ុបមែន រដ្ឋមួយនេះមិនអាចចៀសផុតពីរត់ទៅពឹងពាក់រុស្ស៊ី ដែលកន្លងមកប្តេជ្ញាជួយក្រិក និងបានអញ្ជើញក្រិកឲ្យចូលជាសមាជិកធនាគារអភិវឌ្ឍន៍ របស់ក្រុមប្រទេសមហាអំណាចសេដ្ឋកិច្ចថ្មីផង។
សូមស្តាប់ការបកស្រាយរបស់លោក សៅ ផលនិស្ស័យ
បញ្ហាបំណុលក្រិកនៅតែជារឿងកង្វល់ដ៏ធំសម្រាប់សហភាពអឺរ៉ុប ព្រោះក្រិកអាចនឹងមិនមានលទ្ធភាពសងបំណុល ស្របពេលដែលពេលកំណត់សងបំណុលកាន់តែកៀកណាស់ទៅហើយនោះ។ កិច្ចប្រជុំពិភាក្សារឿងបំណុលរវាងក្រិកនិងម្ចាស់បំណុលបរទេសត្រូវបានរៀបចំបន្តបន្ទាប់គ្នា ហើយកាន់តែតានតឹងក្នុងសប្តាហ៍នេះ ប៉ុន្តែសំខាន់គ្មានសញ្ញាវិជ្ជមានអ្វីសោះ។ ក្រិកទំនងអាចអស់ភាពអត់ធ្មត់ដើម្បីបន្តធ្វើសម្បទានដល់ម្ចាស់បំណុលដើម្បីសម្រេចកិច្ចព្រមព្រៀង ព្រោះលក្ខខណ្ឌកិច្ចព្រមព្រៀងវាលើសពីអ្វីដែលក្រិកអាចធ្វើបាន។
សម្រាប់ម្ចាស់បំណុលក្រិកមាន ធនាគារកណ្តាលអឺរ៉ុប និងមូលនិធិរូបីយវត្ថុអន្តរជាតិ ទាមទារឲ្យក្រិកទទួលយកវិធានការត្បិតត្បៀតជាមុនសិន ដែលវាអាចជួយឲ្យសេដ្ឋកិច្ចក្រិកងើបឡើងវិញ បើសិនក្រិកចង់បានជំនួយហិរញ្ញវត្ថុសង្គ្រោះទុកសងបំណុល។ ប៉ុន្តែប្រជាជនក្រិកនិងនាយករដ្ឋមន្ត្រីក្រិក Alexis Tsipras អ្នកនយោបាយនិយមឆ្វេង នៅរក្សាជំហរផ្ទាល់ខ្លួនប្រឆាំងការបន្តអនុវត្តគោលនយោបាយត្បិតត្បៀតស្នើដោយម្ចាស់បំណុល។ យ៉ាងណាក៏ដោយចុះ កាលពីថ្ងៃចន្ទដើមសប្តាហ៍នាយករដ្ឋមន្ត្រីក្រិកដាច់ចិត្តធ្វើសម្បទានបន្ថែមចុងក្រោយផ្ញើរសេចក្តីព្រាងកិច្ចព្រមព្រៀងថ្មីទៅក្រុងប្រ៊ុយសែលដោយថយក្រោយមួយជំហានទៀត ប៉ុន្តែគេនៅតែឃើញភាគីមិនទាន់ត្រូវរ៉ូវគ្នាលើចំណុចសំខាន់ៗនៃកិច្ចព្រមព្រៀងដដែល។
១. នាយករដ្ឋមន្ត្រីក្រិករងសម្ពាធកាន់តែខ្លាំង
កន្លងមកប្រជាជនក្រិករងទុក្ខដោយសារការអនុវត្តគោលនយោបាយនេះ ដោយសាររដ្ឋាភិបាលត្រូវកាត់បន្ថយការចំណាយ រួមទាំងចំណាយលើសេវាសាធារណបម្រើប្រជាជន តាមតម្រូវការរបស់ម្ចាស់បំណុល និងអនុវត្តន៍ការកែទម្រង់លើវិស័យសំខាន់ៗផ្សេងទៀតផងដែរ។ ប្រជាជនខ្លះបាត់បង់ការធានារ៉ាប់រងវិស័យសុខាភិបាល ហើយសេវាសាធារណផ្សេងទៀតត្រូវកាត់ផ្តាច់ដោយសារតែការកាត់បន្ថយការចំណាយសាធារណ។ ម្យ៉ាងបន្ទុកកាន់តែធ្ងន់លើប្រជាជននៅពេលដែលមានលក្ខខណ្ឌបង្ខំឲ្យក្រិកតំឡើងពន្ធលើវិស័យជំនួញ និងរាល់ផលិតផលលក់ចេញនិងសេវានៅក្រិកផងដែរ។ ដោយសារឆ្អែតឆ្អន់បញ្ហានេះ ប្រជាជនក្រិកនាំគ្នាបោះឆ្នោតឲ្យបក្សឆ្វេងនិយម Syriza ដែលមាននិន្នាការប្រឆាំងការត្បិតត្បៀតនៅដើមឆ្នាំ២០១៥នេះ ដោយត្រួសត្រាយផ្លូវដល់លោក Alexis Tsipras ឡើងកាន់តំណែងប្រមុខរដ្ឋាភិបាលក្រុងអាថែន។ មិនមែនរឿងងាយស្រួលដូចរំពឹងទុកឡើយ ដែលប្រជាជនបោះឆ្នោតផ្តល់សេចក្តីទុកចិត្តដល់លោក Tsipras ដើម្បីឲ្យលោកត្រៀមខ្លួនចរចាជាមួយរដ្ឋម្ចាស់បំណុលនិងស្ថាប័នហិរញ្ញវត្ថុធំៗផង។ បច្ចុប្បន្នអាចនិយាយបានថា លោកកំពុងតែគ្មានផ្លូវដើរក្រៅពីបន្តរក្សាជំហរ ព្រោះប្រជាជនក្រិកមិនអាចទទួលយកសំណើរម្ចាស់បំណុលបានឡើយ។ សម្ពាធកើនឡើងទាំងក្នុងស្រុក និងទាំងពីម្ចាស់បំណុលផង ដែលតម្រូវឲ្យលោកសម្រេចចិត្តនិងបន្តចរចាប្រកបដោយភាពប្រុងប្រយ័ត្នបំផុត ព្រោះលោកត្រូវទទួលខុសត្រូវចំពោះប្រជាជនខ្លួនផង និងការពារមិនឲ្យការក្ស័យធនកើតឡើង។ បើទោះរឿងនេះក្រិកដូចរឹងទទឹងបន្តិចមែន ប៉ុន្តែក្រិកក៏មិនអាចធ្វើចិត្តសឿងបណ្តោយឲ្យក្ស័យធនឡើយ។ មិនមែនមានន័យថាប្រកាសក្ស័យធននិងចាកចេញពីតំបន់អឺរ៉ុបមានន័យថាក្រិកដោះស្រាយវិបត្តិជោគជ័យឯណា ក្រិកត្រូវការជំនួយច្រើនទៀតពីស្ថាប័នហិរញ្ញវត្ថុដូចជា IMF និងប្រទេសធំដើម្បីរក្សាស្ថិរភាពសេដ្ឋកិច្ច បញ្ចៀវិបត្តិធ្ងន់ធ្ងរ។
២.អនាគតតំបន់ចាយលុយអឺរ៉ូ ពឹងលើការដោះស្រាយបញ្ហាបំណុលក្រិក
អាចនិយាយបានថា បញ្ហាបំណុលក្រិកជារឿងគ្រោះថ្នាក់បំផុតសម្រាប់សហភាពអឺរ៉ុបទាំងមូលមិនមែនតែក្រុមរដ្ឋចាយលុយអឺរ៉ូឡើយ។ មេដឹកនាំអឺរ៉ុបដូចជាបារាំងជាដើមនោះមិនដែរចង់ឃើញក្រិកក្ស័យធនគ្មានលុយដោះបំណុល និងដើរចេញពីក្រុមឡើយ ព្រោះវានឹងប៉ះពាល់ដល់ប្រព័ន្ធហិរញ្ញក្រុមចាយលុយអឺរ៉ូទាំងមូល ហើយការបែកខ្ញែកគ្នាកើតឡើងចៀសមិនរួច។ ចំណែកអាឡឺម៉ង ហាក់ដូចជាស្ទាក់ស្ទើរក្នុងការជួយស្រោចស្រង់ក្រិក បើទោះឃើញក្រិកលង់ទឹកក៏ដោយ។ អធិការបតីអាឡឺម៉ង់អែនជេលឡា មឺហ្កែល ដែលបានចូលរួមយ៉ាងសកម្មដោះស្រាយវិបត្តិបំណុលក្រិកនោះបានស្តីបន្ទោសនិងចោទប្រកាន់ក្រិកផង ថាក្រិកហាក់ដូចជាមិនមើលឃើញបញ្ហាបច្ចុប្បន្នធ្ងន់ធ្ងរសោះ។ តាមពិតទៅ បើតាមរបាយការណ៍ទម្លាយចេញដោយវីគីលីក អាឡឺម៉ង់អស់ឆន្ទៈជួយក្រិកតាំងពីក្រិកធ្លាក់ទឹកដំបូងបំផុត រហូតប្រធានាធិបតីបារាំងបង្ខំចិត្តរកដំណោះស្រាយផ្សេងដោយជជែកជាមួយមេបក្សប្រឆាំងអាឡឺម៉ង់ពីក្រោយខ្នងលោកស្រីអធិការបតីផងដែរ។ បើសិន ករណីដែលក្រិកអាចចរចាបានសម្រេចកិច្ចព្រមព្រៀង គណកម្មការអឺរ៉ុបនឹងផ្តល់ជំនួយសង្គ្រោះដល់ក្រិកក្នុងទំហំ៣៥ពាន់លានអឺរ៉ូ។ បច្ចុប្បន្ននេះប្រមុខគណកម្មការនេះលោក Jean Claud Junker កំពុងតែមរមាញឺកធ្វើជាសន្ធានការីសម្រួលកិច្ច ចរចារវាងក្រិកនិងបណ្តាម្ចាស់បំណុលផង។
៣.ក្រិកចៀសមិនផុតពីរត់រករុស្ស៊ី បើសិនក្ស័យធន
ក្រិករៀបជើងព្រួលរួចទៅហើយបើសិនខ្លួនត្រូវប្រកាសក្ស័យធន មិនសងលុយម្ចាស់បំណុល។ រដ្ឋអឺរ៉ុបគ្មានឆន្ទៈចង់ជួយក្រិកដែលធ្លាក់ទឹកជារឿងមួយ ឯរឿងមួយទៀតក្រិកមិនអាចបន្តរស់នៅដោយរងទុក្ខលំបាកវេទនាដោយធ្វើតាមបញ្ជាគេឡើយ។ កន្លងមករដ្ឋាភិបាលថ្មីបានងាកទៅបង្កើនទំនាក់ទំនងជាមួយរបបដឹកនាំលោក វ្ល៉ាឌីមៀ ពូទីន ដែលប្លែកពីរដ្ឋាភិបាលមុន។ ដែលនេះមានន័យថា បើសិនជា ក្រិកថ្លោយក្ស័យធនឬអាចដើរចេញពីអឺរ៉ុប រុស្ស៊ីនឹងក្លាយជាទីពឹងជួយផ្គត់ផ្គង់ក្រិកបញ្ចៀសបញ្ហាធ្ងន់ធ្ងរ។ ការបង្កើនទំនាក់ទំនងស្តែងឡើងតាមទស្សនកិច្ចរបស់ Tsipras ទៅមូស្គូ ប៉ុន្តែលោកមិនបានហាមាត់សុំជំនួយពីរុស្ស៊ីមកដោះស្រាយបំណុលឡើយ។ ប៉ុន្តែគេដឹងថារុស្ស៊ីកំពុងតែចង់ចែរចូវក្រិកស្រាប់នោះ មិនអាចមិនជួយក្រិកឡើយ បើទោះក្រិកមិនសុំក៏រុស្ស៊ីជួយតាមវីធីផ្សេងទៀតដែរ។ ម្យ៉ាងវិញទៀតគេមើលឃើញថារុស្ស៊ីចង់ទាញក្រិកឲ្យចូលក្រោមឥទ្ធិពលរបស់ខ្លួនដែល ដោយថ្មីៗនេះរដ្ឋាភិបាលលោក ពូទីន បានអញ្ជើញក្រិកពេញៗមាត់ឲ្យចូលរួមធនាគារ BRICS បើទោះក្រិកនៅជាសម្រាមសម្រាប់រដ្ឋអឺរ៉ុបក៏ដោយចុះ។ វាពិតជារឿងចៀសមិនផុតឡើយ ប្រសិនបើក្រិកមិនអាចដោះបំណុលបានត្រឹមថ្ងៃ៣០នេះ ក្រិកនឹងធ្លាក់ក្នុងដៃរុស្ស៊ី។ ក្រៅពីរុស្ស៊ី ប្រជាជនក្រិកក៏មើលឃើញមហាយក្សចិន ជារដ្ឋគួររាប់អានផងដែរក្រៅពីរុស្ស៊ី៕
© រក្សាសិទ្ធិដោយ thmeythmey.com