ជាតិ
ព្រៃឡង់ជាតំបន់ជីវចម្រុះសំខាន់បំផុតក្នុងចំណោមតំបន់ជីវចម្រុះទាំង១០ក្នុងលោក
× តំបន់ព្រៃឡង់ជាគំរូដ៏អស្ចារ្យមួយនៃតំបន់ទំនាបព្រៃស្រោងតំបន់ឥណ្ឌូភូមា ហើយក៏តំបន់ជីវចម្រុះដ៏សំខាន់បំផុតមួយក្នុងចំណោមតំបន់ជីវចម្រុះសំខាន់ទាំង១០នៅលើពិភពលោក។ នេះជាអះអាងរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍ USAID ។
យោងតាមសេចក្តីប្រកាសព័ត៌មានរួមរបស់USAID និងអង្គការអភិរក្សអន្តរជាតិ ចេញផ្សាយនៅថ្ងៃទី៣០មិថុនានេះ តាមរយៈគម្រោងគាំទ្រ ព្រៃឈើ និងជីវចម្រុះរបស់USAID បានរកឃើញថាមានប្រភេទសត្វ និងរុក្ខជាតិកំពុងរស់នៅ ជាង១ពាន់ប្រភេទតំបន់ព្រៃឡង់។ សត្វ និងរុក្ខជាតិរកឃើញទាំងអស់នោះ មានរុក្ខជាតិ៥៣០ប្រភេទ ថនិកសត្វ៦០ប្រភេទ សត្វស្លាប២២៦ប្រភេត ឧរង្គសត្វ និងថលជលិក៦៧ប្រភេទ។ជាមួយនឹងការស្រាវជ្រាវនេះ រដ្ឋបាលព្រៃឈើអាចរៀបចំដំណើរព្រាងអនុក្រឹតដើម្បីដាក់ទំហំព្រៃដី៣០ម៉ឺនហិចតារបស់ព្រៃឡង់ជាតំបន់ការពារ។
អ្នកស្រី Rebecca Black នាយកUSAIDប្រចាំនៅកម្ពុជា បានថ្លែងនៅក្នុងសេចក្តីប្រកាសព័ត៌មាននៅថ្ងៃនេះថា៖«ការយកចិត្តទុកដាក់ចំពោះបរិស្ថាន ការការពារជីវចម្រុះ និងការអភិរក្សធនធានធម្មជាតិ ជាការងារអាទិភាពរបស់កម្ពុជា និងត្រូវបានដាក់បញ្ចូលទៅក្នុងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា»។ លោកស្រីបន្តថា៖«USAID ពិតជារីករាយនឹងផ្តល់ថវិកាគាំទ្រដល់ការសិក្សាស្រាវជ្រាវ និងលទ្ធផលដ៏អស្ចារ្យនេះ។ វាបានបង្ហាញថាមានមូលហេតុសំខាន់ៗជាច្រើនដើម្បីអភិរក្ស និងដាក់ព្រៃឡង់ជាបេតិកភណ្ឌធម្មជាតិ»។
តាមរយៈសេចក្តីប្រកាសព័ត៌មានដដែល ព្រៃឡង់គឺជាទីជម្រាលរបស់បឹងទន្លេសាប ដែលបម្រើសេចក្តី ត្រូវការរបស់ប្រជាពលរដ្ឋកម្ពុជារាប់លាននាក់ និងរួមចំណែកមួយភាគធំដល់ការអភិវឌ្ឍសេដ្ឋកិច្ចជាតិ។
អ្នកស្រី Tracy Farrell នាយកបច្ចេកទេសរបស់អង្គការអភិរក្សអន្តរជាតិ បានមានប្រសាសន៍ថា៖«បើទោះបីជាតម្លៃផ្នែកជីវចម្រុះលើសឃ្លាំងស្តុកទឹក និងឱកាសសេដ្ឋកិច្ច ព្រៃឡង់នៅតែរងការកាប់បំផ្លាញ ដូចជាការកាប់ឈើខុសច្បាប់ ការជួញដូរសត្វព្រៃក្នុងអត្រាកើនឡើងខ្ពស់»។ អ្នកស្រីបន្តថា៖«បើសិនគ្មានវិធានការទប់ស្កាត់នោះទេ តំបន់ព្រៃដែលមានជីវចម្រុះដ៏មានតម្លៃមួយនេះ នឹងត្រូវបាត់បង់ជារៀងរហូត»។
ព្រៃឡង់ស្ថិតនៅភាគខាងលិចទន្លេមេគង្គ ចំភាគកណ្តាលនៃប្រទេសកម្ពុជា និងលាតសន្ធឹងលើខេត្តចំនួន៤ គឺក្រចេះ កំពង់ធំ ស្ទឹងត្រែង និងព្រះវិហារ ព្រមទាំងស្ថិតនៅលើទីជម្រាលនៃតំបន់ចំនួន៣ ដូចជាស្ទឹងសែន ស្ទឹងជីនីត និងស្ទឹងសៀមបូក និងជាផ្លូវទឹកបែងចែករវាងបឹងទន្លេសាប និងអាងទន្លេមេគង្គ។ ប្រជាសហគមជាង២៥ម៉ឺននាក់ រស់នៅក្នុងភូមិចំនួន៣៤០ស្ថិតនៅក្នុង និងតំបន់ជុំវិញព្រៃឡង់ ពឹងអាស្រ័យស្ទើទាំងស្រុងលើព្រៃឡង់នេះ តាមរយៈ ការប្រមូលក្រវាញ ជ័រទឹក ទឹកឃ្មុំព្រៃផ្តៅ ឫស្សី និងផ្លែឈើព្រៃ៕
© រក្សាសិទ្ធិដោយ thmeythmey.com