ជាតិ
នយោបាយជាតិ
មានជនអន្តោប្រវេសន៍ខុសច្បាប់វៀតណាម១៦ម៉ឺននាក់ក្នុងឆ្នាំ២០១៤
× ភ្នំពេញ៖ លោកនាយឧត្តមសេនីយ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ថ្លែងថា ជនអន្តោប្រវេសន៍ខុសច្បាប់វៀតណាមបានកើនឡើងពី ៧ម៉ឺននាក់ក្នុងឆ្នាំ២០០២ មកដល់១៦ម៉ឺននាក់ក្នុងឆ្នាំ២០១៤នេះ។ វាជាចំនួនកើនឡើងដែលធ្វើឲ្យលោកអគ្គនាយកកត់សម្គាល់យ៉ាងខ្លាំង។ បើតាមការអះអាងរបស់មេប៉ូលីសអន្តោប្រវេសន៍ ចំនួន១៦ម៉ឺននាក់នៃជនអន្តោប្រវេសន៍ខុសច្បាប់វៀតណាមនេះ ក៏មិនទាន់ជាចំនួនសរុបចុងក្រោយនោះដែរ។ លោក សុខ ផល បានបង្ហាញរបាយការណ៍ជនអន្តោប្រវេសន៍ខុសច្បាប់នៅក្នុងពិធីផ្សព្វផ្សាយរបាយការណ៍អន្តោប្រវេសន៍នៅកម្ពុជា។
សូមស្តាប់ប្រសាសន៍លោក សុខ ផល
«ជនអន្តោប្រវេសន៍ខុសច្បាប់វៀតណាមចូលមកកម្ពុជាតាមច្រកព្រំដែនអន្តរជាតិ និងតាមបន្ទាត់ព្រំដែន។ ដូច្នេះយើងត្រូវពង្រឹង»។ នេះជាការទទួលស្គាល់របស់លោកអគ្គនាយកដ្ឋានអន្តោប្រវេសន៍។
នៅក្នុងក្របខណ្ឌនៃការបោសម្អាតជនអន្តោប្រវេសន៍ខុសច្បាប់ អគ្គនាយកដ្ឋានអន្តោប្រវេសន៍ក៏បានរកឃើញពលករបរទេសដែលកំពុងធ្វើការងារនៅកម្ពុជាដោយគ្មានឯកសារច្បាប់បញ្ជាក់ត្រឹមត្រូវជាច្រើនពាន់នាក់ដែរ។ ក្នុងបរិបទនេះ លោកអគ្គនាយកអន្តោប្រវេសន៍បានស្នើដល់ថ្នាក់ដឹកនាំខេត្តរាជធានី និងភាគីពាក់ព័ន្ធផ្តល់កិច្ចសហការដើម្បីក្រុមការងារអន្តោប្រវេសន៍បន្តការស្រាវជ្រាវរកជនអន្តោប្រវេសន៍ខុសច្បាប់ និងពលករបរទេសខុសច្បាប់ដោយប្រសិទ្ធភាព៕
© រក្សាសិទ្ធិដោយ thmeythmey.com