ជាតិ
សង្គមជាតិ
អាជ្ញាធរអប្សរាកំពុងកំណត់អត្តសញ្ញាណរូបចម្លាក់ដែលពលរដ្ឋរកឃើញម្សិលមិញ
× សៀមរាប៖ រហូតមកដល់ព្រឹកថ្ងៃព្រហស្បតិ៍នេះ អាជ្ញាធរជាតិអប្សរា មិនទាន់អាចកំណត់អត្តសញ្ញាណនៃរូបចម្លាក់ទាំងពីរ ដែលពលរដ្ឋបានប្រទះឃើញកាលពីម្សិលមិញបាននៅឡើយទេ។ បើតាមមន្ត្រីនៃអាជ្ញាធរជាតិអប្សរា អាជ្ញាធរបានធ្វើការសម្អាតរូបទាំងនោះ និងកំពុងចុះបញ្ជីសារពើភណ្ឌផងដែរ។
លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាបានឲ្យដឹងថា បច្ចុប្បន្ន អាជ្ញាធរកំពុងរៀបចំការចុះបញ្ជីសារពើភណ្ឌដល់រូបចម្លាក់ ដែលពលរដ្ឋប្រទះឃើញកាលពីថ្ងៃទី១ កក្កដាម្សិលមិញ ខណៈដែលពួកគេកំពុងឆ្កាដីធ្វើស្រែ។ មានន័យថា អាជ្ញាធរជាតិអប្សរាកំពុងធ្វើឯកសារដើម្បីកំណត់អត្តសញ្ញាណនៃរូបទាំងពីរនោះហើយ។ យ៉ាងណា បើតាមការបញ្ជាក់របស់លោក ឡុង កុសល រហូតមកដល់ពេលនេះ គេមិនទាន់អាចកំណត់សញ្ញាណនៃរូបទាំងនោះបាននៅឡើយទេ។
តាមការបញ្ជាក់ពីប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា រូបទាំងពីរនោះ ទីមួយមានពាក់កណ្តាលខ្លួន និងរូបទីពីរ គឺរូបអង្គុយពែនភ្នែន ហើយរូបមួយៗមានកម្ពស់ពី២០ ទៅ៣០ សង់ទីម៉ែត្រ ហើយរូបទាំងនោះ ធ្វើឡើងពីថ្មភក់។
គួររម្លឹក នៅព្រឹកថ្ងៃទី១ កក្កដា ឆ្នាំ២០១៥ ពលរដ្ឋបានប្រទះឃើញរូបចម្លាក់២ដុំ ដែលនៅចំងាយប្រមាណ៣០០ម៉ែត្រ ពីផ្លូវកៅស៊ូមុខអង្គរវត្ត ផ្លូវទៅព្រលានយន្តហោះ។ ភ្លាមៗ ពលរដ្ឋបានប្រគល់រូបទាំងនោះឲ្យអាជ្ញាធរជាតិអប្សរា ដើម្បីយកទៅរក្សាទុកកន្លែងមានសុវត្ថិភាព៕
© រក្សាសិទ្ធិដោយ thmeythmey.com