ជាតិ
សង្គមជាតិ
បន្តប្រឆាំងនឹងសេចក្ដីព្រៀងច្បាប់ NGOs ស្របពេលគណៈកម្មការជំនាញគ្រោងអនុម័ត
× អង្គការក្រៅរដ្ឋាភិបាល ដែលបាន និងកំពុងជំនាស់នឹងសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល (LANGO) បន្តប្រមូលផ្តុំគ្នាធ្វើវេទិកាពិភាក្សាសាធារណៈ នៅថ្ងៃទី៩ កក្កដានេះ នៅទីលានប្រជាធិបតេយ្យ ដើម្បីទាមទារឲ្យរដ្ឋសភាពន្យាអនុម័ត និងពិគ្រោះ យោបល់បន្ថែម។ ប៉ុន្តែគណៈកម្មការជំនាញ នឹងអនុម័តសេចក្តី្តព្រាងច្បាប់នេះ នៅថ្ងៃទី១០ កក្កដា។
វេទិកាសាធារណៈ ដើម្បីពិភាក្សាលើសេចក្តីព្រាងច្បាប់សមាគម និងអង្គការមិនមែនរដ្ឋាភិបាលនេះ មានអ្នកចូលរួមជាង ២០០នាក់ រួមមាន តំណាងអង្គការសង្គមស៊ីវិល អ្នកការពារសិទ្ធិមនុស្ស សកម្មជនដីធ្លី និងក្រុមយុវជន។ វេទិកានេះ ក៏មានតំណាងអង្គការសហប្រជាជាតិចូលរួមឃ្លាំមើលដែរ។
ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ លោក អំ សំអាត បានថ្លែងជំនាស់នឹងសេចក្តីព្រាងច្បាប់ LANGO នេះ ដោយលោកឡើងថា ប្រសិនបើសេចក្តីព្រាងច្បាប់នេះ នឹងត្រូវអនុម័តនោះ សមាគម និងអង្គការរាប់ម៉ឺននៅមូលដ្ឋាន នឹងមានឧបសគ្គ។ ជាងនេះទៀត លោកអះអាងថា ច្បាប់នេះ នឹងធ្វើឲ្យប៉ះពាល់ដល់សិទ្ធិសេរីភាព បញ្ចេញមតិរបស់អង្គការក្រៅ រដ្ឋាភិបាលនានាផង។ «ប្រសិនបើច្បាប់ត្រូវបានអនុម័តនោះ សមាគម និងអង្គការនានានៅមូលដ្ឋាន ដែលមានចំនួនជាង ២ម៉ឺន នឹងឈប់ដំណើរ ព្រោះច្បាប់នេះ តម្រូវឲ្យពួកគេបង់ថវិកាចុះបញ្ជីនៅក្រសួងមហាផ្ទៃ ដែលពួកគេពុំមាន លទ្ធភាពចុះបញ្ជីនេះ»។ នេះជាការលើកឡើងរបស់លោក អំ សំអាត។
ទោះបីជា តំណាងអង្គការក្រៅរដ្ឋាភិបាល ទាំងជាតិ និងអន្តរជាតិបាន និងកំពុងទាមទារឲ្យ ពន្យាពេលពិនិត្យសេចក្តីព្រាងច្បាប់ NGOs ទៀតក៏ដោយ ក៏គណៈកម្មការជំនាញ ដែលទទួលបន្ទុកត្រួតពិនិត្យសេចក្តីព្រាងច្បាប់ LANGOនេះ មិនពន្យាពេលអនុម័តឡើយ។
លោក ឈាង វុន អ្នកនាំពាក្យ និងជាប្រធានគណៈកម្មការកិច្ចការបរទេសរដ្ឋសភា បានថ្លែងកាលពីម្សិលមិញថា គណៈកម្មការជំនាញទាំង៣ នៃរដ្ឋសភា នឹងអនុម័តសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល នៅថ្ងៃទី១០ ខែកក្កដាខាងមុខ ដើម្បីដាក់ទៅគណៈកម្មការ អចិន្ត្រៃយ៍រដ្ឋសភា ដើម្បីពិនិត្យ និងអនុម័តក្នុងសម័យប្រជុំរដ្ឋសភាលើកទី៤ នីតិកាលទី៥ នាសប្តាហ៍ក្រោយនេះ។
សេចក្តីព្រាងច្បាប់ចុងក្រោយស្តីពី សមាគម និងអង្គការមិនមែនរដ្ឋាភិបាល ដែលរដ្ឋាភិបាលបានអនុម័តនៅ ថ្ងៃទី៥មិថុនាកន្លងទៅ មាន៩ជំពូក និង៣៩មាត្រា៕
© រក្សាសិទ្ធិដោយ thmeythmey.com