ជាតិ
នយោបាយជាតិ
វៀតណាមសន្យាលុបស្រះ ៣ តែបក្សប្រឆាំងមិនទុកចិត្ត
×
រដ្ឋាភិបាលវៀតណាម បានសន្យាលុបស្រះចំនួន ៣ ក្នុងខេត្តរតនៈគិរី និងផ្អាកសាងសង់ប៉ុស្តិ៍យោធា នៅខេត្តកណ្តាល ព្រមទាំងផ្អាកសាងសង់ផ្លូវនៅចំណុចព្រំដែនខេត្តស្វាយរៀង។ ការសម្រេចរបស់ភាគីវៀតណាមនេះ ធ្វើឡើងនៅក្នុងកិច្ចប្រជុំគណៈកម្មការចម្រុះព្រំដែននៃប្រទេសទាំងពីរ នៅភ្នំពេញកន្លងទៅ។ នេះបើតាមសេចក្តីជូនដំណឹងរបស់ក្រសួងការបរទេសកម្ពុជានៅថ្ងៃទី ១០ ខែកក្កដា នេះ។ តែតំណាងរាស្រ្តគណបក្សសង្គ្រោះជាតិ មិនជឿលើការសន្យារបស់ភាគីវៀតណាមនោះឡើយ។
ស្រះទឹកចំនួន ៣ នៅក្នុងទឹកដីខេត្តរតនៈគិរី ប៉ុស្តិ៍យោធាវៀតណាមនៅខេត្តកណ្តាល ការសាងសង់ផ្លូវនៅព្រំដែនខេត្តស្វាយរៀង ត្រូវលោកអនុរដ្ឋមន្រ្តីការបរទេសវៀតណាម ប្រាប់លោកវ៉ា គឹមហុង នៅក្នុងកិច្ចប្រជុំថា រដ្ឋាភិបាលវៀតណាមសន្យាថា នឹងលុប និងផ្អាកការសាងសង់ទាំងអស់។ ហើយទាក់ទងនឹងស្រះទឹក ៥ ទៀត ក្រុមបច្ចេកទេសចម្រុះនៃគណៈកម្មការព្រំដែននៃប្រទេសទាំងពីរ នឹងចុះទៅពិនិត្យ នឹងចុះពិនិត្យមើលជាក់ស្តែង តែក្នុងចំណោមស្រះទាំងនោះ មានស្រះ ២ ជាស្រះចាស់យូរមកហើយ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា នៅថ្ងៃទី ១០ ខែកក្កដា។
ទាក់ទងនឹងការសន្យារបស់វៀតណាម លោក អ៊ុំ សំអាន តំណាងរាស្ត្រគណបក្សសង្គ្រោះជាតិ មិនមានជំនឿលើការសន្យានេះឡើយ។ « ខ្ញុំមិនស្វាគមន៍ចំពោះលទ្ធផលនៃការយល់ព្រមលុបស្រះ និងការផ្អាកសកម្មភាពសាងសង់ផ្លូវ ព្រោះកន្លងមកវៀតណាមធ្លាប់បានសន្យាជាច្រើនលើកច្រើនសាហើយ តែមិនដែលអនុវត្តតាមការសន្យាទេ។ ខ្ញុំយល់ថាវៀតណាមពិបាកទុកចិត្ត» ។ នេះជាការបញ្ជាក់របស់លោក អ៊ុំ សំអាន។
សូមបញ្ជាក់ ការជីកស្រះរបស់វៀតណាមនៅខេត្តរនៈគិរីចំនួន ស្ថិតនៅ ចន្លោះបង្គោលព្រំដែនលេខ ៣០ និង ៤០។ ហើយក្រសួងការបរទេសកម្ពុជា បានធ្វើកំណត់ទូតតវ៉ាពីរដងឲ្យវៀតណាមលុបស្រះទាំងនោះ កាលពីថ្ងៃទី ១២ និង ១៤ ខែមិថុនា ឆ្នាំ ២០១៥។ រីការសាងសង់ប៉ុស្តិ៍ នៅភូមិព្រែកស្បូវ ឃុំសំពៅពួន ស្រុកកោះធំខេត្តកណ្តាល កម្ពុជាធ្វើកំណត់ទូតតវ៉ាពីរដងដែរ ឲ្យវៀតណាមផ្អាកការសាង់សង់ កាលពីថ្ងៃទី ០៨ និងនៅថ្ងៃទី ១៧ ខែមិថុនា ឆ្នាំ ២០១៥។ បន្ទាប់មកកម្ពុជាបានធ្វើកំណត់ទូតតវ៉ា កាលពីថ្ងៃ ទី ១ ខែកក្កដា ឆ្នាំ ២០១៥ ស្នើឲ្យវៀតណាមផ្អាកសាងសង់ផ្លូវស្ថិតនៅបង្គោលព្រំដែនលេខ ១៩៤-២០៣ លេខ ២១១-២១៣ និងលេខ ២១៣ -២១៧ ក្នុងស្រុកចន្រ្ទានិងស្រុកកំពង់រោទិ៍ ខេត្តស្វាយរៀង។
© រក្សាសិទ្ធិដោយ thmeythmey.com