ជាតិ
នយោបាយជាតិ
តំណាងរាស្រ្ត CNRP ទាំងអស់ពហិការ មិនចូលរួមអនុម័តសេចក្តីព្រាងច្បាប់ NGOs នៅថ្ងៃស្អែក
× នៅទីបំផុតទៅ តំណាងរាស្រ្តរបស់គណបក្សសង្គ្រោះជាតទាំង ៥៥ រូប នឹងមិនចូលរួមក្នុងកិច្ចប្រជុំដើម្បីអនុម័តសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាល នៅថ្ងៃទី ១៣ ខែកក្កដា ស្អែកនោះទេ។ នេះបើយោងតាមសេចក្តីថ្លែងការណ៍របស់គណបក្សសង្គ្រោះជាតិនៅថ្ងៃទី ១២ ខែកក្កដា នេះ៕
ក្រៅពីរិះគន់សេចក្តីព្រាងច្បាប់នេះមិនបន្ធូរដៃ គណបក្សសង្គ្រោះជាតិ ក៏ស្នើឲ្យរដ្ឋសភាជាតិទម្លាក់ចោលការអនុម័តសេចក្តីព្រាងច្បាប់នេះចោលតែម្តង។ សេចក្តីថ្លែងការណ៍គណបក្សសង្គ្រោះជាតិនៅថ្ងៃទី ១២ ខែកក្កដា នេះ បញ្ជាក់យ៉ាងច្បាស់ថា តំណាងរាស្រ្តរបស់គណបក្សប្រឆាំងទាំងអស់ នឹងគ្មានអ្នកណាចួលរួមអនុម័តសេចក្តីព្រាងច្បាប់នេះនៅថ្ងៃ ១៣ ខែកក្កដា នោះទេ។
បើតាមសេចក្តីថ្លែងការណ៍ដដែល គណបក្សសង្គ្រោះជាតិ ខកចិត្តយ៉ាងខ្លាំង ចំពោះការមិនទទួលយកយោបល់និងគំនិតសំខាន់ៗស្ទើរទាំងស្រុងរបស់គណបក្សប្រឆាំង និងអង្គការសង្គមស៊ីវិលជាតិ និងអន្តរជាតិ ដើម្បីកែសម្រួលសេចក្តីព្រាងច្បាប់ឲ្យប្រសើរ ដែលអាចទទួលយកបានទាំងអស់គ្នា។ លើសពីនេះ សេចក្តីថ្លែងការណ៍នោះបន្តថា ជំហរបស់គណបក្សសង្គ្រោះជាតិ គឺមិនគាំទ្រឲ្យមានច្បាប់ស្តីពី សមាគម និងអង្គការក្រៅរដ្ឋាភិបាល ក្នុងដំណាក់កាលបច្ចុប្បន្ននេះទេ។
គណបក្សសង្គ្រោះជាតិ យល់ថា ខ្លឹមសារនៃសេចក្រីព្រាងច្បាប់NGOs មានលក្ខណៈគាបសង្កត់ កម្រិតសិទ្ធិសេរីភាពបុគ្គលក្នុងការសម្តែងមតិ និងផ្ទុយពីច្បាប់រដ្ឋធម្មនុញ្ញ មាត្រា ៣៥ និងអនុសញ្ញា និងកតិកាអន្តរជាតិផ្សេងៗទៀត ដែលកម្ពុជាចុះហត្ថលេខា។ បើទោះបីបែបនេះក្តី គណបក្សសង្គ្រោះជាតិ នៅតែប្រកាន់វប្បធម៌សន្ទានាគ្នាដដែល។
យ៉ាងណាក៏ដោយ លោក ឈាង វុន តំណាងរាស្រ្តគណបក្សកាន់អំណាច បានអះអាងប្រាប់សារព័ត៌មានថ្មីៗកាលពីពេលកន្លងទៅថា រដ្ឋសភានៅតែអនុម័តសេចក្តីព្រាងច្បាប់នេះ នៅថ្ងៃទី ១៣ ខែកក្កដា ខាងមុខ បើទោះបីបក្សប្រឆាំងពហិការមិនចូលអនុម័តក៏ដោយ។ លោកថា តំណាងរាស្រ្តគណបក្សប្រជាជនកម្ពុជា មាន ៦៨ រូប គ្រប់គ្រាន់ដើម្បីអនុម័តសេចក្តីព្រាងច្បាប់នេះហើយ៕
© រក្សាសិទ្ធិដោយ thmeythmey.com