តារាកំប្លែងអង់គ្លេស Brodkin បាចដុល្លារក្លែងក្លាយទៅលើលោក Blatter

កីឡាអន្តរជាតិ

អន្តរជាតិ

តារាកំប្លែងអង់គ្លេស Brodkin បាចដុល្លារក្លែងក្លាយទៅលើលោក Blatter

20, Jul 2015 , 11:24 pm

រូបភាព

លោក Blatter ត្រូវបានស្រោចស្រពដោយដុល្លារក្លែងក្លាយពីសំណាក់តារាកំប្លែងអង់គ្លេស។ រូបថត Reuter

ដោយ: ថ្មីៗ

លោក Sepp Blatter ប្រធានសហព័ន្ធកីឡាបាល់ទាត់អន្តរជាតិ (FIFA) ដែលពោរពេញទៅដោយរឿងអាស្រូវពុករលួយ បានជួបប្រទះនូវការភ្ញាក់ផ្អើលមួយមុនពេលបើកសន្និសីទសារព័ត៌មាននៅក្នុងទីក្រុងហ្សួរិច។ លោកត្រូវបានតារាកំប្លែងអង់គ្លេសឈ្មោះ Simon Brodkin ដែលដើរតួជាអ្នកកាសែត បាចប្រាក់ដុល្លារក្លែងក្លាយដាក់នាថ្ងៃទី២០ ខែកក្កដា។

លោក Blatter បានហៅក្រុមសន្តិសុខនាំតារាកំប្លែង Simon Brodkin ដែលមានរហស្សនាមថា «Lee Nelson» ចេញទៅក្រៅ។ ខណៈដែលកំពុងត្រូវបានគេគ្រាកជាប់ Brodkin បានបាចលុយ ហើយស្រែកថា៖ «នេះសម្រាប់អ្នក លោក Sepp! គឺសម្រាប់ការប្រកួតកីឡាបាល់ទាត់ពិភពលោក [……] នៅកូរ៉េខាងជើងក្នុងឆ្នាំ២០២៦!» ។

ក្រោយហេតុការដែលបានកើតឡើង លោក Blatter សុំពេល៥នាទីដើម្បីឲ្យគេប្រមូលដុល្លារក្លែងក្លាយចេញ ពីព្រោះលោកបានលើកឡើងថា វាមិនជាប់ពាក់ព័ន្ធនឹងបាល់ទាត់នោះឡើយ។

Brodkin បានធ្វើរឿងប្លែកៗជាច្រើននាពេលកន្លងមក។ កាលពីថ្ងៃទី១៦ខែមិនា ឆ្នាំ២០១៣ គេបានបន្លំខ្លួនជាកីឡាកររត់ចូលទៅក្នុងទីលាន Goodison Park ដើម្បីកំដៅសាច់ដុំជាមួយ កីឡាករក្រុម Manchester City នៅមុនការប្រកួត Premier League ជាមួយម្ចាស់ផ្ទះ Everton។

នៅឆ្នាំ២០១៤ Brodkin បានស្លៀកពាក់ដូចកីឡាករ ហើយរត់ចូលទៅក្នុងក្រុមជម្រើសជាតិអង់គ្លេសដែលកំពុងត្រៀមឡើងយន្តហោះនៅអាកាសយានដ្ឋាន Luton ដើម្បីចេញទៅប្រកួត World Cup ជាដើម៕