ជាតិ
នយោបាយជាតិ
CNRP ថា ការផ្ដន្ទាទោសសកម្មជនខ្លួន ធ្វើផ្ទុយពីកិច្ចព្រមព្រៀង ២២ កក្កដា
× គណបក្សសង្គ្រោះជាតិ ចាត់ទុកការផ្ដន្ទាទោសសកម្មជនគណបក្សខ្លួនចំនួន១១ គឺជាការធ្វើឲ្យមានភាពតានតឹងនយោបាយ ដែលផ្ទុយពីកិច្ចព្រមព្រៀងនរវាងគណបក្សជាប់ឆ្នោតទាំងពីរ ដែលបានឯកភាពគ្នាកាលពីឆ្នាំមុន។ ការលើកឡើងរបស់គណបក្សសង្គ្រោះជាតិនេះ ធ្វើឡើងក្រោយពីសាលាដំបូងរាជធានីភ្នំពេញ បានសម្រេចសាលក្រមសំណុំរឿងលោក មាជ សុវណ្ណារ៉ា និងសកម្មជនគណបក្សសង្គ្រោះជាតិចំនួន១០រូបទៀត ឲ្យជាប់ពន្ធនាគារ ៧ឆ្នាំ ទៅ២០ឆ្នាំ ពីពីបទ «ដឹកនាំកូបកម្ម និងអំពើចូលរួមក្នុងអំពើកូបកម្ម» ពាក់ព័ន្ធនឹងករណីប៉ះទង្គិចគ្នាដោយហិង្សា នៅក្បែរស្ពាននាគ កាលពីថ្ងៃទី១៥ កក្កដា ឆ្នាំ២០១៤ ។
ថ្ងៃទី២២ កក្កដា ឆ្នាំ២០១៥នេះ គឺជាខួប១ឆ្នាំ នៃកិច្ចព្រមព្រៀងនយោបាយរវាងគណបក្សសង្គ្រោះជាតិ និងគណបក្សប្រជាជនកម្ពុជា ដើម្បីដោះស្រាយបញ្ហា និងបញ្ចប់នូវភាពតានតឹងនយោបាយនៅកម្ពុជា។ ប៉ុន្ដែថ្ងៃទី២២ កក្កដានេះ ក៏ជាថ្ងៃដែលគណបក្សសង្គ្រោះជាតិ មានការសោកស្ដាយដែរ ស្របពេលដែលសកម្មជនខ្លួនចំនួន១១នាក់ ត្រូវបានតុលាការផ្តន្ទាទោសជាប់ពន្ធនាគារ។
សេចក្ដីថ្លែងការណ៍គណបក្សសង្គ្រោះជាតិ ចុះថ្ងៃទី២២ កក្កដានេះ បានបញ្ជាក់យ៉ាងដូច្នេះថា៖« មានការភ្ញាក់ផ្អើល និងសោកស្តាយជាខ្លាំងដែលតុលាការរាជធានីភ្នំពេញ បានសម្រេចដាក់ពន្ធនាគារសកម្មជនគណបក្សសង្គ្រោះជាតិចំនួន១១រូប កាលពីថ្ងៃទី២១ខែកក្កដា ឆ្នាំ២០១៥ គឺជាការធ្វើឲ្យភាពតានតឹងខាងនយោបាយឡើងវិញ ដែលផ្ទុយនឹងស្មារតីកិច្ចព្រមព្រៀងនយោបាយកាលពីថ្ងៃទី២២ខែកក្កដា ឆ្នាំ២០១៤កន្លងមក»។
សេចក្តីថ្លែងការណ៍ដដែលបន្តថា គណបក្សសង្គ្រោះជាតិបាននិងកំពុង ហើយនឹងនៅតែបន្តព្យាយាមគោរពតាមស្មារតីនៃកិច្ចព្រមព្រៀងនយោបាយខាងលើនេះ ប្រកបដោយសុច្ឆន្ទៈ ដើម្បីសហការគ្នាជាមួយនឹងគណបក្សប្រជាជនកម្ពុជា ក្នុងការស្វែងរកដំណោះស្រាយបញ្ហានានា ដែលជាប្រយោជន៍ជាតិ និងប្រយោជន៍ប្រជាពលរដ្ឋខ្មែរ។គណបក្សសង្គ្រោះជាតិសង្ឃឹមថាវប្បធម៌សន្ទនានឹងអាចបន្តដោះស្រាយនិងបញ្ចប់នូវភាពតានតឹងនយោបាយ ដើម្បីសហការគ្នា ឲ្យមានការដោះលែងសកម្មជនគណបក្សខ្លួនទាំង១១រូបនេះ ឲ្យមានសេរីភាពឡើងវិញ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ បដិសេធការលើកឡើងរបស់គណបក្សសង្គ្រោះជាតិថា ការសម្រេចសាលក្រមរបស់តុលាការ មិនមែនជារឿងរំលោភកិច្ចព្រមព្រៀងនយោបាយឡើយ ព្រោះកិច្ចព្រមព្រៀងកាលពីថ្ងៃទី២២ កក្កដា គឺគ្រាន់តែជាកិច្ចព្រមព្រៀង ដែលឈានទៅបង្កើតវប្បធម៌សន្ទនាប៉ុណ្ណោះ។ ចំណែកការសម្រេចរបស់ផ្ដន្ទាទោសសកម្មជនគណបក្សសង្គ្រោះជាតិនៅពេលនេះ គឺជាឆន្ទានុសិទ្ធិរបស់តុលាការ។
ប្រធានស្តីទីគណបក្សសង្គ្រោះជាតិ លោក កឹម សុខា ប្រកាសថា រូបលោកកំពុងស្វែងរកវិធី ដើម្បីជួយដល់ លោក មាជ សុវណ្ណារ៉ា និងសកម្មជន ១០ នាក់ទៀត ដែលកំពុងជាប់ពន្ធនាគារព្រៃស ស្របពេលដែលលោក សម រង្ស៊ី កំពុងបំពេញការងារនៅក្រៅប្រទេស។ តាមបណ្តាញសង្គមហ្វេសប៊ុកផ្ទាល់ខ្លួន លោក កឹម សុខា បានប្រកាសថា លោកកំពុងខ្វែងដៃខ្វែងជើងរកវិធី ដើម្បីជួយសកម្មជនបក្សទាំងនោះ ដោយលោក បានជួបជាមួយមន្ត្រីទូត នៅស្ថានទូតយ៉ាងតិចចំនួន ៣ ក្នុងរាជធានីភ្នំពេញ ដើម្បីរកកិច្ចអន្តរាគមន៍ចំពោះសកម្មជនខ្លួន។
ប្រធានគណបក្សសង្គ្រោះជាតិលោក សម រង្ស៊ី ចាត់ទុកថា ស្ថានការណ៍នយោបាយនៅប្រទេសកម្ពុជា មានភាពល្អប្រសើរជាងមុន គួរឲ្យកត់សម្គាល់ ខណៈដែលថ្ងៃទី២២ កក្កដានេះ គឺជាខួប១ឆ្នាំ នៃការចុះហត្ថលេខាលើកិច្ចព្រមព្រៀងនយោបាយរវាងគណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ។ លោក សម រង្ស៊ី បានសរសេរលើទំព័រហ្វេសបុករបស់ខ្លួនថា ទោះជានៅមានបញ្ហាជាច្រើនទៀត ដែលគណបក្សទាំងពីរមិនទាន់ឯកភាពគ្នានៅឡើយ និងទោះជាមានព្យុះភ្លៀងនិងផ្គរក៏ដោយ ក៏គណបក្សសង្គ្រោះជាតិនៅតែខិតខំរក្សា និងពង្រឹងវប្បធម៌សន្ទនា ដែលបានកើតចេញពីកិច្ចព្រមព្រៀងខាងលើនេះ។
ការសម្រេចសាលក្រមរបស់តុលាការលើសំណុំរឿងសកម្មជនគណបក្សសង្គ្រោះជាតិចំនួន១១រូបនេះ ត្រូវបានសង្គមស៊ីវិលយល់ថា ជារឿងពាក់ព័ន្ធបញ្ហានយោបាយ ក្រោយពីគណបក្សសង្គ្រោះជាតិ បានសើរើរឿងព្រំដែនឡើងវិញ៕
Tag:
CNRP
គណបក្សសង្គ្រោះជាតិ
© រក្សាសិទ្ធិដោយ thmeythmey.com