ជាតិ
នយោបាយជាតិ
CPP ប្រាប់ដៃគូសន្ទនាឲ្យចេះបែងចែករវាងកិច្ចព្រមព្រៀងនយោបាយ និងច្បាប់
× គណបក្សប្រជាជនកម្ពុជាតាមរយៈសេចក្តីថ្លែងការណ៍របស់ខ្លួននាល្ងាចថ្ងៃទី២២ ខែកក្កដា នេះ បានប្រកាសជំហរស្មោះត្រង់របស់ខ្លួននូវគោលការណ៍ទាំងឡាយនៃវប្បធម៌សន្ទនា ហើយបានអំពាវនាវឲ្យគណបក្សសង្គ្រោះជាតិ បន្តគោរពកិច្ចព្រមព្រៀងទាំងឡាយដែលបានឯកភាពគ្នាដោយបែងចែកឲ្យដាច់ស្រឡះរវាងកិច្ចព្រមព្រៀងនយោបាយ និងច្បាប់។
ក្នុងសេចក្តីថ្លែងការណ៍ដែលទំនងជាឆ្លើយតបទៅនឹងសេចក្តីថ្លែងការណ៍របស់គណបក្សសង្គ្រោះជាតិនោះ បក្សកាន់អំណាចធ្វើការប្រកាសនូវគោលការណ៍សំខាន់ៗមួយចំនួនរបស់ខ្លួន ដូចជាការបន្តប្រតិបត្តដោយស្មោះត្រង់នូវគោលការណ៍ទាំងឡាយនៃវប្បធម៌សន្ទនា ក្រោមឆ័ត្រនៃរដ្ឋធម្មនុញ្ញ និងច្បាប់ ពោលគឺមិនអាចគ្របដណ្តប់លើវិស័យតុលាការ។
គណបក្សប្រជាជនកម្ពុជា បានអះអាងដែលថា ខ្លួនបែកចែកបានដាច់ពីគ្នារវាងអំណាចនីតិបញ្ញត្តិ និងអំណាចនីតិប្រតិបត្តិ ដោយស្របទៅនឹងប្រការ៤នៃកិច្ចព្រមព្រៀងស្តីពីដំណោះស្រាយរបស់គណបក្សជាប់ឆ្នោតទាំងពីរកាលពីថ្ងៃទី២២ ខែកក្កដា។
មុននឹងអំពាវនាវគណបក្សដៃគូសន្ទនា និងអង្គការក្រៅរដ្ឋាភិបាល និងមហាជននានា ឲ្យចូលរួមពង្រឹងនីតិរដ្ឋនៅកម្ពុជា បក្សកាន់អំណាចរបស់លោកនាយករដ្ឋមន្ត្រី ហ៊ុន សែន បានបញ្ជាក់សារជាថ្មីថា កម្ពុជាមិនមានអ្នកទោសនយោបាយទេ មានតែអ្នកនយោបាយដែលប្រព្រឹត្តកំហុស ហើយត្រូវបានផ្តន្ទាទោសដោយច្បាប់។
ប្រតិកម្មរបស់គណបក្សកាន់អំណាច កើតឡើងបន្ទាប់ពីការចេញសេចក្តីថ្លែងការណ៍របស់គណបក្សសង្គ្រោះជាតិ ដែលបានសម្តែងការភ្ញាក់ផ្អើល និងសោកស្តាយ បន្ទាប់ពីតុលាការរាជធានីភ្នំពេញ បានសម្រេចដាក់ពន្ធនាគារសកម្មជនខ្លួនចំនួន១១នាក់ កាលពីថ្ងៃទី២១ ខែកក្កដា។
សង្គ្រោះជាតិ បានលើកឡើងថា កិច្ចព្រមព្រៀងនយោបាយដែលបានឈានដល់ខួបមួយឆ្នាំនោះ អាចដោះស្រាយ និងបញ្ចប់ភាពតានតឹងនយោបាយនៅកម្ពុជា ប៉ុន្តែការសម្រេចដាក់ពន្ធនាគារសកម្មជន១១នាក់នោះ បានធ្វើឲ្យមានភាពតានតឹងនយោបាយឡើងវិញដែលផ្ទុយពីកិច្ចព្រមព្រៀងកាលពីថ្ងៃទី២២ ខែកក្កដា ឆ្នាំមុន។
គណបក្សប្រឆាំងរបស់លោក សម រង្ស៊ី បានដាក់ក្តីរំពឹងថា វប្បធម៌សន្ទនាអាចបន្តដោះស្រាយបញ្ហារបស់ប្រទេសជាតិ និងពលរដ្ឋខ្មែរ ជាពិសេសបញ្ចប់នូវភាពតានតឹងនយោបាយ ដែលឈានទៅដល់ការដោះលែងសកម្មជន១១នាក់ឲ្យមានសេរីភាពឡើងវិញ៕
© រក្សាសិទ្ធិដោយ thmeythmey.com