អន្តរជាតិ
នយោបាយអន្តរជាតិ
លោកពូទីនចេញបញ្ជាឲ្យកម្ទេចទំនិញលោកខាងលិចដែលរងទណ្ឌកម្មនៅតាមព្រំដែនរុស្ស៊ី
×![]()
ប្រធានាធិបតីរុស្ស៊ីលោក វ្ល៉ាឌីមៀ ពូទីន បានចុះហត្ថលេខាលើក្រឹត្យដែលមានគោលដៅទប់ស្កាត់រាល់ទំនិញអាមេរិក និងសហភាពអឺរ៉ុប ដែលបន្តហូរចូលទឹកដីរុស្ស៊ីរំលោភការហាមឃាត់ទំនិញដែលមានស្រាប់នាពេលបច្ចុប្បន្ន។ ក្រឹត្យនឹងចូលជាធរមាននៅថ្ងៃ ៦សីហាខាងមុខ ហើយរាល់ទំនិញនានាជាពិសេសចំណីអាហារមកពីអាមេរិកនិងអឺរ៉ុបនឹងត្រូវអាជ្ញាធររុស្ស៊ីកម្ទេចចោលនៅតាមព្រំដែន។
លោក មុំ ពិទូរ្យ លម្អិតព័ត៌មាននេះ
វិធានការក្តៅនិងតឹងរ៉ឹងជាងមុខត្រូវបានរដ្ឋាភិបាលក្រុងម៉ូស្គូជ្រើសរើសយកមកដើម្បីទប់ស្កាត់លំហូរទំនិញរបស់បណ្តាប្រទេសលោកខាងលិចជាពិសេសអាមេរិក និងរដ្ឋ សហភាពអឺរ៉ុបនានាដែលបានដាក់ទណ្ឌកម្មប្រឆាំងរុស្ស៊ី។ នោះគឺច្បាប់ថ្មីដែលទើបត្រូវប្រធានាធិបតីរុស្ស៊ីលោក វ្ល៉ាឌីមៀ ពូទីន ចុះហត្ថលេខាកាលពីចុងខែកក្កដាកន្លងទៅនេះ។ លោក ពូទីន បានសម្រេចចុះហត្ថលេខាប្រកាសឲ្យប្រើច្បាប់ថ្មី ដែលអនុញ្ញាតិឲ្យមន្ត្រីគយរុស្ស៊ីតាមព្រំដែនមានអំណាចកម្ទេចចោលរាល់ទំនិញដែលនាំមកពីបណ្តាប្រទេសដែលបានដាក់ទណ្ឌកម្មប្រឆាំងរុស្ស៊ី។
រដ្ឋាភិបាលរុស្ស៊ី សម្រេចទទួលយកវិធានការថ្មីនេះ ក្រោយពេលដែលរដ្ឋមន្ត្រីកសិកម្ម Aleksandr Tkachev បានស្នើសុំទៅកាន់ប្រមុខរដ្ឋរុស្ស៊ីផ្ទាល់ ដើម្បីឲ្យមានការផ្លាស់ប្តូរវិធានការឆ្លើយតបការបន្តនាំចូលទំនិញមកកាន់ប្រទេសរុស្ស៊ី។
យោងតាមបទបញ្ញត្តិខាងលើ រាល់ផលិតផលកសិកម្ម ផលិតផលមិនទាន់ច្នៃ និងស្បៀងអាហារនានា ដែលនាំចេញពីបណ្តារដ្ឋដែលបានដាក់ទណ្ឌកម្មប្រឆាំងក្រុមហ៊ុន ឬមន្ត្រីរុស្ស៊ី ហើយរំលោភលើវិធានការហាមឃាត់ការនាំចូលដែលរុស្ស៊ីបានដាក់កន្លងមក នឹងត្រូវកម្ទេចចោលតាមព្រំដែនរុស្ស៊ីតែម្តង។ កន្លងមក ទោះជារុស្ស៊ីបានហាមឃាត់រាល់ទំនិញដែលផលិតដោយរដ្ឋអឺរ៉ុប ឬអាមេរិកក៏ដោយចុះ តែទំនិញទាំងនោះនៅតែបន្តហូរចូលទឹកដីរុស្ស៊ី បន្តែអាជ្ញាធរបានត្រឹមរឹបអូស និងក្រោយមកបញ្ជូនទំនិញទៅកាន់ប្រទេសទាំងអស់នោះវិញប៉ុណ្ណោះ។
ម្យ៉ាងទៀត ក្រុមឈ្មួញនៅតែបន្តលួចរត់ពន្ធទំនិញដែលហាមឃាត់ចូលមករុស្ស៊ីជាបន្តបន្ទាប់ផង។ រដ្ឋាភិបាលក្រេមឡាំងជឿថា បើសិនទំនិញទាំងនោះត្រូវកម្ទេចចោល វាប្រាកដណាស់ថា ប្រទេសទាំងនោះនឹងមិនបន្តបញ្ជូនទំនិញរបស់ខ្លួនមកកាន់ប្រទេសរុស្ស៊ីទៀតឡើយ។
យ៉ាងណាក៏ដោយ ក្រឹត្យដែលត្រូវបានលោក ពូទីន ចុះហត្ថលេខានោះ មិនមានសុពលភាពលើទំនិញដែលនាំចូលមកដោយបុគ្គលម្នាក់ៗសម្រាប់ប្រើប្រាស់ឡើយ ឲ្យតែពួកគេបំពេញបែបបទ ឬបំពេញសំណុំឯកសារឲ្យបានត្រឹមត្រូវ។
សូមបញ្ជាក់ថា រុស្ស៊ីបានដាក់ការហាមឃាត់ទំនិញកសិកម្មមានសាច់ ត្រី បន្លែ ទឹកដោះគោ ជាដើមនោះ តាំងពីខែសីហាឆ្នាំ ២០១៤មក ដើម្បីសងសឹកប្រទេសមួយចំនួនដែលដាក់ទណ្ឌកម្មខ្លួន ព្រោះជម្លោះនៅអ៊ុយក្រែននិងការក្រសោបយកទឹកដី Crimea ពីអ៊ុយក្រែន។ ប្រទេសដែលស្ថិតក្រោមបញ្ជីខ្មៅរបសរុស្ស៊ីមានអាមេរិក កាណាដា អូស្ត្រាលី ណរវែស សហភាពអឺរ៉ុប និងបណ្តាប្រទេសមួយចំនួនទៀត ហើយការហាមឃាត់នេះមានរយៈពេលពេញមួយឆ្នាំ។ ប៉ុន្តែក្រោយមករុស្ស៊ីក៏សម្រេចបន្ថែមពេលវេលាសម្រាប់ការអនុវត្តរហូតដល់ខែសីហាឆ្នាំក្រោយ ដោយសារថាលោកខាងលិចមិនមានឆន្ទៈព្រមដកទណ្ឌកម្មដែលបានដាក់ប្រឆាំងខ្លួនទាល់តែសោះ៕
Tag:
ពូទីន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
