ក្មេងស្រីខ្មែរអ៊ីស្លាមជាប់ច្រវាក់ជិត១ឆ្នាំ ក្រោយម្តាយមីងលក់ឲ្យបុរសម្នាក់សេពសន្ធវៈ

ជាតិ

ក្មេងស្រីខ្មែរអ៊ីស្លាមជាប់ច្រវាក់ជិត១ឆ្នាំ ក្រោយម្តាយមីងលក់ឲ្យបុរសម្នាក់សេពសន្ធវៈ

04, Aug 2015 , 5:35 pm

រូបភាព

ដោយ: ម៉ៅ សុផា

បងប្អូនស្រីពីរនាក់ជាជនជាតិខ្មែរឥស្លាម បានលក់ខ្លួនក្មួយស្រីអាយុ១៣ឆ្នាំម្នាក់ទៅឲ្យបុរសចំណាស់ម្នាក់សេពសន្ថវៈក្នុងតម្លៃ១៥០០ដុល្លារ។ ដោយខ្លាចក្មួយស្រីទៅប្តឹងប៉ូលីស ម្តាយមីងទាំងពីរនាក់នោះសម្រេចឃុំខ្លួននាងដោយដាក់ច្រវាក់នឹងកជើងជាច្រើនដង អស់រយៈពេលជិតមួយឆ្នាំ។ ជនសង្ស័យ៣នាក់ រួមមានទាំងម្តាយមីងទាំងពីរនាក់ និងបុរសម្នាក់ត្រូវបានចាប់ឃុំខ្លួនដើម្បីសួរចម្លើយហើយ។

ហេតុការណ៍ដ៏សោកសង្រេងលើក្មេងស្រីខ្មែរអ៊ីស្លាមម្នាក់ ត្រូវបានប៉ូលីសប្រឆាំងការជួញដូរមនុស្សបំបែកបាននៅថ្ងៃចន្ទទី៣សីហា នៅក្នុងសង្កាត់ច្រាំងចំរេះ១ ខណ្ឌឬស្សីកែវ។ ក្មេងស្រីអនីតិជន អាយុ១៣ឆ្នាំ ត្រូវបានម្តាយមីង (២នាក់បងប្អូនបង្កើត) សមគំនិតលក់ទៅឲ្យមេការសំណង់វ័យចំណាស់ម្នាក់សេពសន្ធវៈកាលពីឆ្នាំមុន ក្នុងតម្លៃ១៥០០ដុល្លារ។

លោក កែវ ធា ប្រធានការិយាល័យប្រឆាំងការជួញដូរមនុស្ស និងការពារអនីតិជន រាជធានីភ្នំពេញបានប្រាប់សារព័ត៌មានថ្មីៗថា ម្តាយមីងខ្មែរអ៊ីស្លាមទាំងពីរនាក់ដែលម្នាក់អាយុ៣២ឆ្នាំ និងម្នាក់ទៀតអាយុ២៧ឆ្នាំ បានឃុំខ្លួន និងដាក់ច្រវាក់ក្មួយស្រី ដើម្បីបង្ខាំងក្មួយស្រីនោះមិនឲ្យប្តឹងប៉ូលីស។

មន្ត្រីប្រឆាំងការជួញដូរមនុស្សបញ្ជាក់បន្តដូច្នេះថា៖«ការពិតរឿងរ៉ាវនេះ កើតឡើងយូរហើយ តាំងពីឆ្នាំមុនម្លេះ។ មុនដំបូងបុរសជាមេការសំណង់អាយុ៣៦ឆ្នាំ ឲ្យប្រាក់ចំនួន ១០០០ ដុល្លារ ដល់ម្តាយមីងទាំងពីរនាក់ ហើយក៏បានរំលោភក្មេងស្រីបានសម្រេចម្តង។ ដោយព្រួយបារម្ភខ្លាចក្មួយទៅប្តឹងប៉ូលីស ម្តាយមីងទាំងពីរនាក់ក៏សម្រេចដាក់ច្រវាក់ជើងនាង ឃុំក្នុងផ្ទះជាច្រើនខែ»។ លោកបន្តថា៖«ក្រោយមក បុរសនោះក៏ឲ្យ ៥០០ដុល្លារបន្ថែមទៀត ដើម្បីឲ្យស្រី្តទាំងពីរនាក់ជាម្តាយមីងនាំក្មេងស្រីទៅនៅជាមួយខ្លួន តែត្រូវក្មេងស្រីប្រកែកមិនព្រមទៅ។ ដោយក្មួយស្រីមិនព្រមទៅនៅជាមួយបុរសនោះ ម្តាយមីង ក៏ដាក់ច្រវាក់ក្មេងស្រីម្តងទៀត»។

ករណីនេះត្រូវបានបំបែក ដោយសារតែក្មេងស្រីរងគ្រោះបានព្យាយាមលួចដោះច្រវាក់ខ្លួនឯង ហើយបានរត់ទៅរស់នៅផ្ទះមិត្តភក្តិដែលបានសម្រេចទៅប្តឹងប៉ូលីសនៅថ្ងៃចន្ទទី៣សីហានេះ។

កាលពីរសៀលថ្ងៃចន្ទ ជនសង្ស័យទាំងបីនាក់ ត្រូវបានសមត្ថកិច្ចឃាត់ខ្លួនភ្លាមៗ និងបញ្ជូនទៅឃុំខ្លួនបណ្តោះអាសន្ននៅ ការិយាល័យប្រឆាំងការជួញដូរមនុស្ស និងការពារអនីតិជន រាជធានីភ្នំពេញ ដើម្បីធ្វើការសាកសួរចម្លើយ និងរៀបចំសំណុំរឿងបញ្ចូនទៅតុលាការកាត់ទោសតាមច្បាប់៕