ជាតិ
សង្គមជាតិ
សាលារាជធានីកំពុងសិក្សាគម្រោងផ្លូវរថភ្លើងលើអាកាសប្រភេទ AGT ចំនួន៣ខ្សែ
× ភ្នំពេញ៖ សាលារាជធានីកំពុងសិក្សាគម្រោងរថភ្លើងធុនស្រាលស្វ័យប្រវត្តិលើផ្លូវអាកាសប្រភេទ AGT ចំនួន៣ខ្សែ ដែលខ្សែទី១ ផ្តើមពីចំណុចវិថីកម្ពុជាក្រោម មហាវិថីព្រះមុនីវង្ស មហាវិថីសហព័ន្ឋរុស្ស៊ី និងរង្វង់មូលចោមចៅ ហើយខ្សែទី២ ពីមហាវិថីព្រះមុនីវង្សរត់ស្របផ្លូវរថភ្លើងរួចបត់ឆ្វេងតាមផ្លូវតាំងកសាងចូលអាកាសយានដ្ឋានអន្តរជាតិភ្នំពេញ និងខ្សែទី៣ ផ្តើមពីផ្សារថ្មី វិថីហ្សាលដឺហ្គោលវិថីព្រះមុនីរ៉េត ផ្លូវវេងស្រេង រង្វង់មូលចោមចៅ បត់មកអាកាសយានដ្ឋានអន្តរជាតិភ្នំពេញ។ នេះបើតាមការផ្សាយលើទំព័រហ្វេសប៊ុកផ្លូវការរបស់សាលារាជធានីភ្នំពេញ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ប្រាប់សារព័ត៌មានថ្មីៗថា សិក្ខាសាលាកម្ពុជា-ជប៉ុន កាលពីថ្ងៃទី៦ សីហា ស្តីពីប្រព័ន្ឋដឹកជញ្ជូនសាធារណៈក្នុងរាជធានីភ្នំពេញរៀបចំឡើងក្នុងគោលបំណងសិក្សាពីលទ្ធភាពបង្កើតប្រព័ន្ធធ្វើដំណើរក្នុងរាជធានីភ្នំពេញ និងប្រទេសកម្ពុជា ដើម្បីកាត់បន្ថយបញ្ហាកកស្ទះចរាចរណ៍។ តែកាលបរិច្ឋេទចាប់ផ្តើម សាងសង់ និងការចំណាយថវិកាគម្រោងយ៉ាងណានោះ អ្នកនាំពាក្យ មិនទាន់បញ្ជាក់បាននោះទេ ដោយលោកលើកឡើងថា នេះ គ្រាន់តែជាការរៀបចំសិក្ខាសាលាផ្លាស់ប្តូរគំនិតរវាងភាគីកម្ពុជា និងជប៉ុនប៉ុណ្ណោះ។ «សាលារាជធានីភ្នំពេញមិនទាន់បញ្ជាក់គម្រោងប្រាកដបានទេ យើងគ្រាន់តែសិក្សាប្រព័ន្ធដឹកជញ្ជូននៅតាមទីក្រុងនៅក្នុងប្រទេសជប៉ុនប៉ុណ្ណោះ ហើយថា តើកម្ពុជាបង្កើតប្រព័ន្ធដឹកជញ្ជូននៅតាមទីក្រុងយ៉ាងណាខ្លះ»។ នេះជាការបញ្ជាក់របស់លោក ឡុង ឌីម៉ង់។
លោក ត្រាំ អ៊ីវតឹក រដ្ឋមន្ត្រីសាធារណៈការដឹកជញ្ជូន បានបញ្ជាក់ថា ទីភ្នាក់ងារសហប្រតិបត្តិការអន្តរជាតិជប៉ុន (JICA) ជួយរៀបចំគម្រោងប្លង់មេទាក់ទងនឹងចរាចរណ៍ទីក្រុងសម្រាប់ឆ្នាំ២០៣៥ដោយផ្អែកតាមវិធានការដោះស្រាយប្រព័ន្ធចរាចរណ៍ដឹកជញ្ជូនកម្ពុជា។ គម្រោងដែលមានតម្លៃអាទិភាពខ្ពស់ជាងគេក្នុងគម្រោងប្លង់មេនោះគឺការរៀបចំប្រព័ន្ធផ្លូវរថភ្លើង ដែលជាផ្លូវចរាចរណ៍សាធារណៈដ៏សំខាន់ និងពុំទាន់មាននៅក្នុងរាជធានីភ្នំពេញ។
លោក ហ្សីមិស៊ុ គិយ៉ូហ្សី អគ្គនាយករងកិច្ចការវិស្វកម្ម នៃក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុនបានបញ្ជាក់ថា គម្រោងនៃការបង្កើតគម្រោងរថភ្លើងលើអាកាសនេះ គឺជាគោលបំណង និងឆន្ទៈ ក្នុងការចូលរួមដោះស្រាយបញ្ហាកកស្ទះចរាចរនៅតាមដងផ្លូវ និងកាត់បន្ថយនូវការចំណាយធ្វើដំណើរនៅក្នុងរាជធានីភ្នំពេញតាមរយៈបង្កើតរថភ្លើងធុនស្រាលស្វ័យប្រវត្តិ ដូចបណ្តាប្រទេសដទៃទៀត។ នេះបើតាមទីភ្នាក់ងារសារព័ត៌មានជាតិកម្ពុជា៕
© រក្សាសិទ្ធិដោយ thmeythmey.com