ណាហ្គាប៉ះភ្នំពេញក្រោន អាស៊ីអឺរ៉ុបជួបស្វាយរៀងនៅអូឡាំពិក ថាយហ្គឺរនិងបឹងកេតតទល់គ្នានៅវេស្ទើន

កីឡាជាតិ

ណាហ្គាប៉ះភ្នំពេញក្រោន អាស៊ីអឺរ៉ុបជួបស្វាយរៀងនៅអូឡាំពិក ថាយហ្គឺរនិងបឹងកេតតទល់គ្នានៅវេស្ទើន

12, Aug 2015 , 10:47 am

រូបភាព

ដោយ:

ណាហ្គាវើល ត្រូវប្រកួតជាមួយភ្នំពេញក្រោន ស្របពេលក្រុមខេមបូឌានថាយហ្គ័រ (Cambodian Tiger) ប៉ះក្រុមបឹងកេតអង្គរ និង ក្រុមអាស៊ីអឺរ៉ុបយូណាធីត ប្រកួតជាមួយក្រុមស្វាយរៀង នៅល្ងាចថ្ងៃពុធ ទី ១២ ខែ សីហា នេះក្នុងវគ្គសន្សំពិន្ទុសប្ដាហ៍ទី ១៣ នៃពានរង្វាន់បាល់ទាត់មិត្តហ្វូនខេមបូឌានលីក២០១៥ (Metfone Cambodian League 2015)។

ក្រុមណាហ្គវើល ត្រូវប្រកួតជាមួយក្រុមភ្នំពេញក្រោន វេលាម៉ោង៣:៣០ នាទីរសៀលលើទីលានពហុកីឡដ្ឋានជាតិ។ កាលពីជើងទី១ ភ្នំពេញក្រោន បានយកឈ្នះណាហ្គាវើលដោយលទ្ធផល ៤ ទល់ ២ លើទីលានកីឡដ្ឋាន RSN Stadium។

ណាហ្គាវើល កំពុងតែបង្ហាញទម្រង់លេងនៅប៉ុន្មានប្រកួតចុងក្រោយ ដោយឈ្នះជាប់ៗគ្នា ហើយរំកិលខ្លួនចូលប្រអប់ក្រុមខ្លាំងទាំង៤ (Top4)។ លោក មាស ចាន់ណា មិនបានសម្លឹងរកកីឡាករបន្ថែមនោះទេនៅ MCL 2015 ជើងទី២នេះ។ ១២ ប្រកួតកន្លងមកណាហ្គាវើល ឈ្នះ ៧ និង ចាញ់ ៥ មាន ២១ ពិន្ទុក្នុងដៃ។ ចំណែកក្រុមភ្នំពេញក្រោន វិញជាក្រុមមិនដែលចាញ់ ហើយកំពុងតែប្រដេញពិន្ទុគ្នាជាមួយក្រុមបឹងកេតអង្គរ នៅតំបន់កំពូលតារាងផងដែរ។ លោកគ្រូបង្វឹក Sam Schweingruber ចង់ដឹកនាំការពារតំណែងជើងឯកឱ្យបានម្ដងទៀត ស្របពេលលោកធ្លាប់បានលើកពាននេះម្ដងហើយកាលពីឆ្នាំមុន។

ចំណែកមួយប្រកួតទៀតនៅថ្ងៃនេះ ក្រុមខេមបូឌានថាយហ្គ័រ ត្រូវប្រកួតជាមួយក្រុមកំពូលតារាងបឹងកេតអង្គរ នៅវេលាម៉ោង ៣:៣០ នាទី នៅទីលានកីឡដ្ឋានវេស្ទើន។ កាលពីជើងទី១ បឹងកេតអង្គរ បានយកឈ្នះក្រុមខេមបូឌានថាហ្ក័រ ដោយលទ្ធផល ៣ ទល់ ២ នៅទីលានកីឡដ្ឋានកងយោធពលខេមរភូមិន្ទ (ស្ដាតចាស់)។

ក្រុមខេមបូឌានថាយហ្គ័រ ដែលដឹកនាំដោយថ្នាក់ដឹកនាំជនជាតិជប៉ុនកំពុងតែអុកឡុកក្នុងលីកកម្ពុជា ដោយប្រកួតបាន ១២ លើកមកនេះប្រកួតឈ្នះ ៧ លើកស្មើ ២ និង ចាញ់តែ ៣ ទេហើយមាន ២៣ ពិន្ទុក្នុងដៃ ឈរលេខរៀងទី៣ នៅក្នុងតារាងដែលមាន ១២ ក្រុម។ ដោយឡែកក្រុមបឹងកេតអង្គរ វិញមិនទាន់ស្គាល់រសជាតិចាញ់នៅឡើយនោះទេ ដោយប្រកួតបាន ១២ លើកឈ្នះ ១០ និង ស្មើ ២ មាន ៣២ ពិន្ទុក្នុងដៃ។ កីឡាករ ចាន់ វឌ្ឍនាកា របស់ក្រុមមានប្រភពមកពីខេត្តកំពង់ចាម មួយនេះកំពុងតែឈរនៅក្នុងបញ្ជីកីឡាករដែលអាចរកគ្រាប់បាល់បានច្រើនជាងគេ ក្រោយរកបាន ២៤ គ្រាប់ម្នាក់ឯង។

ចំពោះប្រកួតចុងក្រោយនៅនៅពុធ នេះគឺ ក្រុមអាស៊ីអឺរ៉ុបយូណាធីត ត្រូវជួបក្រុមជើងឯកឆ្នាំ២០១៣ ស្វាយរៀងអែហ្វស៊ី នៅពហុកីឡដ្ឋានជាតិ វេលាម៉ោង ៦ ល្ងាច។ បើមើលលទ្ធផលជើងទី១ វិញក្រុមស្វាយរៀង ធ្លាប់ឈ្នះអាស៊ីអឺរ៉ុប ៣ ទល់ ២ លើទីលានកីឡដ្ឋានខេត្តរបស់ខ្លួន។

២ ប្រកួតចុងក្រោយរបស់ស្វាយរៀង ចាញ់ក្រុមជើងឯកឆ្នាំចាស់ភ្នំពេញក្រោន ទាំង២លើក ស្របពេលកីឡាករសំខាន់ៗ ប្រចាំក្រុមដូចជា ខ្សែការពារ មូល ដារ៉ាវ័ន្ត, ប្រធានក្រុម ប្រាក់ មុន្នីឧត្តម, ណុប តុលា និង នេន សុធារ័ត្ន មានបញ្ហារបួសហើយកីឡាករខ្លះរំពឹងថាអាចជួយក្រុមបាននៅប្រកួតនេះវិញ។ ចំណែកអាស៊ីអឺរ៉ុប វិញ កាន់តែត្រូវការ ៣ ពិន្ទុក្នុងការប្រកួតនេះដើម្បីឆ្លងផុតពីតំបន់គ្រោះថ្នាក់នៅបាតតារាង។ ១២ ប្រកួតមកនេះអាស៊ីអឺរ៉ុប ប្រកួតឈ្នះ ៣ លើក ស្មើ ១ និង ចាញ់ ៨ មាន ១០ ពិន្ទុក្នុងដៃឈរលេខ ៩ បណ្ដោះអាសន្ន។