ជាតិ
បាក់ឌុប៖ អ្នកសង្កេតការណ៍ជាង ៥ពាន់នាក់ កើនឡើងជាងឆ្នាំមុន
× ភ្នំពេញ៖ សម័យប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា នឹងប្រព្រឹត្តឡើងនៅថ្ងៃ២៤ ខែសីហា ឆ្នាំ២០១។ អ្នកស្ម័គ្រចិត្តសង្កេតការណ៍អង្គភាពប្រឆាំងអំពើពុករលួយ (ACU) នឹងឃ្លាំមើលពីដំណើរការប្រឡងដូចឆ្នាំមុនដែរ ដើម្បីរាយការណ៍ ទប់ស្កាត់អំពើពុករលួយពេលប្រឡង។ ប្រធាននាយកដ្ឋានអប់រំ ACU ប្រាប់ថា អ្នកស្ម័គ្រចិត្ត សង្កេតការណ៍ឆ្នាំ២០១៥នេះ មានចំនួន ៥៦២៣នាក់ កើនឡើងទ្វេដង បើប្រៀបធៀបនឹងសម័យប្រឡងឆ្នាំ២០១៤។
ប្រធាននាយកដ្ឋានអប់រំ បង្ការ និងទប់ស្កាត់ នៃ ACU លោកស្រី ម៉ា សូយ៉ិនដា បញ្ជាក់ថា អ្នកអង្កេតការណ៍ប្រឡងបាក់ឌុបឆ្នាំ២០១៥នេះ មានចំនួនកើនឡើង ដែលជាសញ្ញាដ៏ល្អក្នុងការចូលរួមបោសសម្អាតអំពើពុករលួយ ដើម្បីលើកស្ទួយគុណភាពអប់រំនៅកម្ពុជា។ លោកស្រីបន្ត ថា អ្នកអង្កេតការណ៍សហការជាមួយអង្គភាពប្រឆាំងអំពើពុករលួយ មានតួនាទីឃ្លាំមើល និងរាយការណ៍ភាពមិនប្រក្រតីក្នុងដំណើរការប្រឡង តាមមណ្ឌលទូទាំងប្រទេស។
លោកស្រី ម៉ា សូយ៉ិនដា បញ្ជាក់ពីតួនាទីអ្នកស្ម័គ្រចិត្តសង្កេតការណ៍មកពីគ្រឹះស្ថានសិក្សា NGOs ប្រាប់សារព័ត៌មានថ្មីៗថា អ្នកសង្កេតការណ៍ទាំងអស់ ពុំមានសិទ្ធិត្រួតត្រា ឬបញ្ជាលើប្រធានមណ្ឌល អនុរក្ស ឬមន្ត្រីអប់រំក្នុងមណ្ឌលប្រឡងនោះទេ។ លោកស្រីថា៖«អ្នកសង្កេតការណ៍ត្រូវគោរពលក្ខខណ្ឌរបស់ ACU។ អ្នកសង្កេតការណ៍ ជាអ្នកឃ្លាំមើលការឆែកឆេរ និងរាយការណ៍ដំណើរការប្រឡងមក ACU»។
ក្រសួងអប់រំ យុវជន និងកីឡា សហការជាមួយអង្គភាពប្រឆាំងអំពើពុករលួយ បានបើកឲ្យមានអ្នកសង្កេតការណ៍ជាសង្គមស៊ីវិលជាលើក ទី១ នៅសម័យប្រឡងបាក់ឌុបឆ្នាំមុន មានរហូតជាង ៣ពាន់នាក់ ដើម្បីធានាតម្លាភាពពេលប្រឡងបាក់ឌុប។
អ្នកសង្កេតការណ៍របស់អង្គភាពប្រឆាំងអំពើពុករលួយមានសិទ្ធិលើសពីមន្ត្រីអប់រំតាមមណ្ឌល ត្រង់ថា ពួកគេមានសិទ្ធិប្រើប្រាស់ទូរស័ព្ទដៃ ដើម្បីថតយកភ័ស្តុតាង ហើយរាយការណ៍ភ្លាមៗ ។ ប៉ុន្តែអ្នកសង្កេតការណ៍មិនអាចថតវិញ្ញាសានៅលើក្តារខៀន ហើយបញ្ជូនចេញទៅក្រៅនោះទេ។
នាសនិ្នសីទសារព័ត៌មាន កន្លងមក អ្នកនាំពាក្យក្រសួងអប់រំលោក រស់ សាលីន បានបញ្ជាក់ពីការរឹតបន្តឹងការប្រឡង ការឆែកឆេរមុនការប្រឡង និងការរក្សាការសម្ងាត់វិញ្ញាសាប្រឡង។ លោកនិយាយថា មុនពេលប្រឡង បេក្ខជននឹងត្រូវបានកម្លាំងមានសមត្ថកិច្ច និងបុគ្គលិកអប់រំឆែកឆេរចំនួន ៣ដំណាក់កាល រួមមាន ដំណាក់កាលទីមួយគឺ មុនចូលមណ្ឌលប្រឡង រួចដំណាក់បន្ទាប់គឺ មុនចូលបន្ទប់ប្រឡង និងចុងក្រោយគឺ មុនពេលចែកវិញ្ញាសាប្រឡង។
គួរបញ្ជាក់ថា សម័យប្រឡងឆ្នាំ ២០១៥នេះ បេក្ខជនចុះឈ្មោះប្រឡងសរុប ៨៨៤៨៨នាក់ គិតទាំងបេក្ខជនប្រឡងធ្លាក់ឆ្នាំមុន ប៉ុន្តែតួលេខនេះ នៅតែតិចជាងឆ្នាំ២០១៤ ដែលមានដល់ទៅ ៩១.៣៧៣នាក់។ ទាំងថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម មណ្ឌលប្រឡងសរុបមាន ១៤៩ ចែកជា ៣,៥៧៦បន្ទប់ នៅទូទាំង ២៥រាជធានីខេត្ត។ ដើម្បីពង្រឹងគុណភាពវិស័យអប់រំ ក្រសួងអប់រំនៅតែរក្សាវិធានការរឹតបន្តឹងការប្រលងដូចសម័យប្រឡង ឆ្នាំ២០១៤ដដែល។ ប៉ុន្តែគ្មានទៀតឡើយការប្រលងលើកទី២ ដូចឆ្នាំមុននោះ។ ជាមួយគ្នានេះ ក្រសួងអប់រំ ពុំមានគោលការណ៍រៀបចំការប្រឡងលើកទី២ ដូចឆ្នាំមុនឡើយ វាលើកលែងតែមានប្រធានសក្តិ៕
Tag:
បាក់ឌុប
អ្នកសង្កេតការណ៍
ACU
© រក្សាសិទ្ធិដោយ thmeythmey.com