អន្តរជាតិ
អាមេរិកអាចចៀសមិនផុតពីបញ្ជូនទ័ពថ្មើរជើងទៅអ៊ីរ៉ាក់តាមច្បាំងកម្ចាត់ក្រុមរដ្ឋឥស្លាម
×![]()
ក្រុងវ៉ាស៊ីនតោនចាប់ផ្តើមបើកការវាយប្រហារកម្ទេចក្រុមរដ្ឋឥស្លាមនៅក្នុងប្រទេសស៊ីរីដោយប្រើប្រាស់មូលដ្ឋានទ័ពនៅក្នុងទឹកដីតួកគីលើកដំបូងបំផុត។ សហរដ្ឋអាមេរិកស្រាប់តែបង្កើនសកម្មភាពតាមប្រមាញ់ក្រុមរដ្ឋឥស្លាមកាន់តែខ្លាំងឡើងរយៈពេលប៉ុន្មានខែចុងក្រោយនេះ ប៉ុន្តែប៉ង់តាហ្កូនមិនទាន់សម្រេចចិត្តប្រើប្រាស់ទ័ពថ្មើរជើងនៅឡើយទេ។ ប៉ុន្តែនាយទាហានជាន់ខ្ពស់អាមេរិកម្នាក់ជិតចូលនិវត្តស្រាប់តែចេញមុខស្នើឲ្យរដ្ឋាភិបាលអាមេរិកប្រើប្រាស់ទ័ពថ្មើរជើងក្នុងកម្រិតមួយប្រកៀកស្មារជាមួយទ័ពរដ្ឋាភិបាលអ៊ីរ៉ាក់តាមកម្ទេចទ័ពក្រុមរដ្ឋឥស្លាម។ បើសិនបន្តប្រើប្រាស់ការវាយប្រហារតាមផ្លូវអាកាស មិនដឹងពេលណាទើបអាចឈ្នះក្រុមរដ្ឋឥស្លាមនេះឡើយ។ 
សូមស្តាប់ការបកស្រាយរបស់លោក សៅ ផលនិស្ស័យ៖
មកទល់ពេលបច្ចុប្បន្ននេះ គេមិនទាន់ឃើញមានការសម្រេចចិត្តប្រើប្រាស់ទ័ពថ្មើរជើងដើម្បីប្រយុទ្ធប្រឆាំងក្រុមរដ្ឋឥស្លាមនៅឡើយទេ។ រដ្ឋបាលលោក បារ៉ាក់ អូបាម៉ា ដែលបានបញ្ជាដកកងទ័ពចេញពីអ៊ីរ៉ាក់នោះ មិនមានផែនការបញ្ជូនទ័ពទៅធ្វើសង្គ្រាមនៅទីនោះដែរ ព្រោះខ្លាចផុងខ្លួនជាថ្មីនៅមជ្ឈិមបូព៌ា។ ប៉ុន្តែសហរដ្ឋអាមេរិកបន្តបង្កើនកិច្ចសហប្រតិបត្តិការយោធា និងការវាយប្រហារតាមផ្លូវអាកាសដើម្បីកម្ចាត់ក្រុមរដ្ឋឥស្លាមនៅស៊ីរីនិងស៊ីរីផងដែរ។ កាលពីខែមុន ក្រុងវ៉ាស៊ីនតោនទើបចរចាជាមួយរដ្ឋាភិបាលក្រុងអង់ការ៉ាដើម្បីប្រើប្រាស់ទឹកដីតួកគីដើម្បីវាយប្រហារតាមផ្លូវអាកាសកម្ទេចមូលដ្ឋានទ័ពក្រុមរដ្ឋឥស្លាមនៅស៊ីរីផងដែរ។
១.អាមេរិកប្រើប្រាស់មូលដ្ឋានទ័ពនៅតួកគីវាយប្រហារក្រុមរដ្ឋឥស្លាមជាលើកដំបូង
ប៉ុន្មានថ្ងៃមុនសហរដ្ឋអាមេរិកទើបបញ្ជូនយន្តហោះចម្បាំង៦គ្រឿងទៅកាន់មូលដ្ឋានទ័ពអាកាសតួកគី និងកងទ័ពប្រហែល៣០០នាក់ផង។ គេដឹងច្បាស់ថា យន្តហោះនិងកងទ័ពត្រៀមខ្លួនដើម្បីចាប់ផ្តើមយុទ្ធនាការទម្លាក់គ្រាប់បែកនៅស៊ីរីកម្ចាត់ក្រុមរដ្ឋឥស្លាម និងអាចចាំការពារក្រុមឧទ្ទាមនៅស៊ីរីផង។ដូចការរំពឹងទុក ថ្ងៃពុធម្សិលមិញ យន្តហោះចម្បាំងអាមេរិក F-16 ហោះចេញពីទឹកដីតួកគីសម្តៅមូលដ្ឋានក្រុមរដ្ឋឥស្លាមនៅស៊ីរី ជាលើកដំបូងបំផុត។ ក្រៅពីប្រើប្រាស់យន្តហោះចម្បាំង ទាហានអាមេរិកដែលឈរជើងនៅទីនោះក៏ប្រើប្រាស់យន្តហោះដ្រូន គ្មានអ្នកបើកបរតាមចាប់ទីតាំងក្រុមរដ្ឋឥស្លាមនៅស៊ីរីដែរ។ យ៉ាងណាមិញ ម្សិលមិញមានតែយន្តហោះអាមេរិកប៉ុណ្ណោះ គ្មានយន្តហោះកងទ័ពអាកាសតួកគីឡើយ។ថ្វីបើរដ្ឋាភិបាលក្រុងអង់ការ៉ាផ្តល់ទឹកដីឲ្យទ័ពអាមេរិកប្រើប្រាស់និងប្រកាសចូលរួមក្រុមសម្ព័ន្ធអន្តរជាតិកម្ចាត់ក្រុមរដ្ឋឥស្លាម កងទ័ពតួកគីបានប្រើប្រាស់ទ័ពអាកាសវាយលុកតែក្រុមឃឺតនៅស៊ីរីប៉ុណ្ណោះ មិនមែនតាមប្រមាញ់កងកម្លាំងសកម្មប្រយុទ្ធរដ្ឋឥស្លាមឡើយ។ សហរដ្ឋអាមេរិករិះគន់ក្រុងអង់ការ៉ារឿងលួចប្រើប្រាស់ការចូលរួមកម្ចាត់ក្រុមរដ្ឋឥស្លាមជាលេសដើម្បីវាយប្រហារឃឺតផងដែរ។
២.នាយទាហានអាមេរិកស្នើបញ្ជូនទ័ពថ្មើរជើងទៅអ៊ីរ៉ាក់កម្ចាត់ក្រុមរដ្ឋឥស្លាម
យុទ្ធសាស្ត្រពង្រាយទ័ពប្រយុទ្ធអាចជាយុទ្ធសាស្ត្រចុងក្រោយបំផុតរបស់ក្រុងវ៉ាស៊ីនតោនក្នុងករណីចាំបាច់។ លោក អូបាម៉ា នៅស្ទាក់ស្ទើរខ្លាំង ក្នុងការសម្រេចស្នើបញ្ជូនទ័ពថ្មើរជើងឲ្យទៅសហការជាមួយទ័ពអ៊ីរ៉ាក់ប្រយុទ្ធប្រឆាំងក្រុមជីហាត ព្រោះវាមិនសូវចំណេញហើយលោកផ្ទាល់ជាអ្នកប្រឹងបញ្ចប់ប្រតិបត្តិការទ័ពអាមេរិកនៅអ៊ីរ៉ាក់តែម្តង។ ប៉ុន្តែស្ថានការណ៍ជារួមប្រែប្រួល ដែលតម្រូវឲ្យមានការផ្លាស់ប្តូរយុទ្ធសាស្ត្រយោធា។ បើផ្អែកលើទ័ពអាកាសមួយមុន មិនដឹងជាគេត្រូវចំណាយពេលប៉ុន្មានឆ្នាំទៅមុខ ដើម្បីកម្ទេចក្រុមសកម្មប្រយុទ្ធរដ្ឋឥស្លាមនេះឡើយ។ អ្វីដែលសំខាន់ ថ្មីៗនេះឧត្តមសេនីយ៍នាយសេនាធិការកងទ័ពអាមេរិកជិតចូលនិវត្តន៍ Ray Odierno បានស្នើឲ្យមានការបញ្ជូនកងទ័ពថ្មើរជើងទៅកាន់ប្រទេសអ៊ីរ៉ាក់ដើម្បីរក្សាប្រសិទ្ធភាពនៃការកម្ចាត់ក្រុមរដ្ឋឥស្លាម។ លោកបានអះអាងថាវាចាំបាច់ត្រូវមានទ័ពនៅផ្ទាល់ដីប្រកៀកស្មារជាមួយទ័ពអ៊ីរ៉ាក់នៅសមរភូមិ ទើបអាចធានាបានថា យុទ្ធនាការបោសសម្អាតក្រុមនេះមានប្រសិទ្ធភាព។ មិនមែនតែមន្ត្រីយោធាម្នាក់នេះទេ ប៉ុន្តែបណ្តាអ្នកជំនាញឯទៀតសុទ្ធតែទិតៀនយុទ្ធសាស្ត្រយោធាលោកអូបាម៉ា ព្រោះវាទន់ជ្រាយពេក។ វាជាការពិតហើយ ទ័ពអាកាសមួយមុខ បានត្រឹមបំបែកសំបុកក្រុមរដ្ឋឥស្លាម បើសិនគ្មានទ័ពថ្មើរជើងខ្លាំងតាមបោសសម្អាតក្រុមទាហានជីហាតដែលបាក់ទ័ពនោះទេ មុនឬក្រោយពួកគេនឹងប្រមូលផ្តុំគ្នានិងពង្រឹងកម្លាំងឡើងវិញដូចដើម។
ពាក់ព័ន្ធបញ្ហានេះដែរ កាលពីថ្មីៗកន្លងទៅ ប្អូនប្រុសប្រធានាធិបតីចច ដាប៊ិលយូប៊ូស (Gorge W. Bush) លោកចេប ប៊ូស (Jeb Bush) បានថ្លែងរិះគន់បេក្ខជនប្រធានាធិបតីបក្សប្រជាធិបតេយ្យ ហ៊ីឡារី គ្លីនតុន និងចោទប្រកាន់រដ្ឋបាលលោក បារ៉ាក់ អូបាម៉ា ថាសុទ្ធតែមានចំណែកខុសដែលបន្តទុកឲ្យក្រុមភេរវជនរដ្ឋឥស្លាមកើនឡើងឥទ្ធិពលខ្លាំងនៅអ៊ីរ៉ាក់និងស៊ីរី ។ បេក្ខជនបក្សសាធារណរដ្ឋចង់បរិហារលោកស្រី ហ៊ីឡារី គ្លីនតុន និងលោកអូបាម៉ា ដែលមិនព្រមទុកកងទ័ពដែលអ៊ីរ៉ាក់ដដែល បែរជាដកទ័ពអស់ក្នុងឆ្នាំ២០១។ ប្អូនប្រុសអតីប្រធានាធិបតីអាមេរិកម្នាក់នេះព្យាយាមសរសើរបងប្រុសខ្លួនដែលរក្សាទុកនៅអ៊ីរ៉ាក់និងទម្លាក់កំហុសលើរដ្ឋាភិបាលលោក អូបាម៉ា ដែលបណ្តែតបណ្តោយឲ្យក្រុមរដ្ឋឥស្លាមឡើងចាងបាន។ គេរំពឹងថា នៅពេលខាងមុខសហរដ្ឋអាមេរិកប្រហែលជាពិចារណាប្រើប្រាស់ទ័ពថ្មើរជើងនៅអ៊ីរ៉ាក់ មិនមែនទ្រង់ទ្រាយធំ តែល្មមអាចពង្រឹងកម្លាំងថ្មើរជើងគាំទ្រកងទ័ពអាកាសបាន។
៣.បើចង់ដោះស្រាយបញ្ហាក្រុមរដ្ឋឥស្លាម អាមេរិកគួរផ្តោតបញ្ឈប់បង្កើតរដ្ឋបរាជ័យ
រដ្ឋដូចជា យេម៉ែន ទុយនេស៊ី ស៊ីរី អ៊ីរ៉ាក់ នៅមជ្ឈិមបូព៌ា និងលីប៊ីនៅអាហ្វ្រិកខាងជើង រួមជាមួយអាហ្វហ្កានីស្ថាននៅអាស៊ីខាងកណ្តាលសុទ្ធតែជាជម្រកដ៏មានសុវត្ថិភាពនិងជាកន្លែងដែលក្រុមភេរវជនដូចជាក្រុមរដ្ឋឥស្លាមសាងកម្លាំងយ៉ាងងាយស្រួល។ វាជាការពិតថាបញ្ហាក្រុមរដ្ឋឥស្លាមត្រូវដោះស្រាយដោយប្រើប្រាស់កម្លាំងទ័ព រួមជាមួយ ការផ្សះផ្សានយោបាយ សាសនា និងអាចពាក់ព័ន្ធបញ្ហាសេដ្ឋកិច្ចផង។ ប៉ុន្តែការបន្តទុករដ្ឋមួយចំនួនដូចរៀបរាប់ខាងលើឲ្យនៅស្ថិតក្នុងភាពអស្ថិរភាពនិងក្លាយជារដ្ឋបរាជ័យដោយគ្មានដំណោះស្រាយនោះ វារឹតតែបង្កការលំបាកដល់ការដោះស្រាយថែមទៀត។ នេះមានន័យថា បើក្រុងវ៉ាស៊ីនតោនចង់ឲ្យក្រុមរដ្ឋឥស្លាមចុះខ្សោយបាត់ខ្លួនពីពិភពលោកនេះ គេមិនត្រូវព្រងើយកន្តើយបញ្ហាដែលកំពុងកើតឡើងនៅរដ្ឋខាងលើទាំងនេះទេ។
ក្រុមរដ្ឋឥស្លាមពង្រីកបណ្តាញដល់ដីអាហ្វហ្កានីស្ថាន លីប៊ី ស៊ី ដែលជារដ្ឋដែលរដ្ឋាភិបាលកណ្តាលមិនអាចគ្រប់គ្រងបានគ្រប់ជ្រុងជ្រោយ។ បើបណ្តារដ្ឋទាំងនេះរឹងមាំ មានលទ្ធភាពការពារខ្លួននិង អនុវត្តច្បាប់ពេញលេញ ក្រុមរដ្ឋឥស្លាមនិងក្រុមភេរវជនឯទៀតក៏គ្មានឱកាសពង្រឹងកម្លាំងនិងឆកឱកាសទាញប្រយោជន៍បានស្រួលដូចបច្ចុប្បន្ននេះឡើយ៕
ក្រុមរដ្ឋឥស្លាមពង្រីកបណ្តាញដល់ដីអាហ្វហ្កានីស្ថាន លីប៊ី ស៊ី ដែលជារដ្ឋដែលរដ្ឋាភិបាលកណ្តាលមិនអាចគ្រប់គ្រងបានគ្រប់ជ្រុងជ្រោយ។ បើបណ្តារដ្ឋទាំងនេះរឹងមាំ មានលទ្ធភាពការពារខ្លួននិង អនុវត្តច្បាប់ពេញលេញ ក្រុមរដ្ឋឥស្លាមនិងក្រុមភេរវជនឯទៀតក៏គ្មានឱកាសពង្រឹងកម្លាំងនិងឆកឱកាសទាញប្រយោជន៍បានស្រួលដូចបច្ចុប្បន្ននេះឡើយ៕
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
