លោក ហ៊ុន សែន លត់លោក សម រង្ស៊ីកាន់តែខ្លាំង ក្រោយផ្ទៀងផ្ទាត់ផែនទី

ជាតិ

នយោបាយជាតិ

លោក ហ៊ុន សែន លត់លោក សម រង្ស៊ីកាន់តែខ្លាំង ក្រោយផ្ទៀងផ្ទាត់ផែនទី

21, Aug 2015 , 11:23 am

រូបភាព

ដោយ:

ក្រោយពីរដ្ឋាភិបាលកម្ពុជា បានផ្ទៀងផ្ទាត់ផែនទីរបស់អង្គការសហប្រជាជាតិជាមួយផែនទីរដ្ឋាភិបាលបច្ចុប្បន្ន លោកនាយករដ្ឋមន្ត្រី ហ៊ុន សែន បានសរសេរសារតាមទូរសព្ទទៅលោកសម រង្ស៊ី ប្រធានគណបក្សសង្គ្រោះជាតិ ដែលកំពុងតែបំពេញការងារនៅប្រទេសអូស្ត្រាលី។ សាររបស់លោក ហ៊ុន សែន បានប្រាប់លោក សម រង្ស៊ី ពីលទ្ធផលអវិជ្ជមានសម្រាប់សហការីរបស់លោកមេបក្សប្រឆាំងរូបនេះ ដូចជា ការជាប់ពន្ធនាគារ និងរត់គេចខ្លួនជាដើម ដោយសារតែការចោទប្រកាន់រដ្ឋាភិបាលថា ប្រើផែនទីក្លែងក្លាយ ការក្លែងឯសារ និងផែនទីរបស់លោក សម រង្ស៊ី ដែលទិញពីប្រទេសបារាំង។

ពាក្យពេចន៍ ដែលលោក ហ៊ុន សែន ប្រើនៅក្នុងសារទូរសព្ទរបស់ខ្លួន ដែលផ្ញើទៅលោក សម រង្ស៊ី ភាគច្រើន ហាក់មានអត្ថន័យ បែបឌឺដងឲ្យលោកមេបក្សប្រឆាំង និងនិយាយពីសកម្មភាពមិនត្រឹមត្រូវរបស់មន្ត្រីគណបក្សសង្គ្រោះជាតិ ដែលតម្រូវឲ្យលោក សម រង្ស៊ី គួរអប់រំមន្ត្រីរបស់ខ្លួន។ សាររបស់លោក ហ៊ុន សែន ផ្ញើទៅលោក សម រង្ស៊ី ត្រូវចុះផ្សាយដោយសារព័ត៌មាន Fresh News នៅថ្ងៃសុក្រនេះ។

គ្រាន់តែឃ្លាដំបូងនៃសាររបស់ខ្លួន លោក ហ៊ុន សែន បាននិយាយពីសកម្មភាពបន្តចោទប្រកាន់រដ្ឋាភិបាលថា ប្រើផែនទីក្លែងក្លាយ ពីសំណាក់សហការីរបស់លោក សម រង្ស៊ី បើទោះបីជារូបលោកបានផ្តល់ឱកាសឲ្យច្រើនដងយ៉ាងណាក៏ដោយ។ លោកនាយករដ្ឋមន្ត្រី បានលើកយកពីសម្តីមន្ត្រីតំណាងគណបក្សសង្គ្រោះជាតិ ក្រោយពិធីពិនិត្យផ្ទៀងផ្ទាត់ផែនទីកាលពីម្សិលមិញយ៉ាងនេះថា៖«ម្សិលមិញក្រោយពេលផ្ទៀងផែនទីយកពីអង្គការសហប្រជាជាតិ តំណាងគណបក្សឯ.ឧ បាននិយាយថា អ្នកនិយាយជាសិទ្ធិរបស់បុគ្គលមិនទាក់ទង នឹងគោលជំហរគណបក្សទេ»។ ចំពោះពាក្យសម្តីនេះ លោក ហ៊ុន សែន បានស្នើឲ្យលោក សម រង្ស៊ី ណែនាំដល់មន្ត្រីខ្លួនឡើងវិញ។

ជាងនេះទៅទៀត លោក ហ៊ុន សែន ក៏ស្នើឲ្យលោក សម រង្ស៊ី រកផែនទី ២ ផ្ទាំងទៀតដែលត្រឹមត្រូវ មកប្រគល់ជូនរាជបណ្ឌិតសភា។ លោក បានចាត់ទុកផែនទីរបស់លោក សម រង្ស៊ី ដូច្នេះថា៖« សុំឯកឧត្តម កុំបន្ទោសខ្ញុំថា ប្រើល្បិចយកសត្វមានពឹសចេញពីរូង ព្រោះផែនទីត្រឹមត្រូវរបស់ ឯ.ឧ សាហាវជាងសត្វ អសិរពឹសទៅទៀត ព្រោះផែនទីនេះមិនត្រឹមតែបោកប្រាស់ប្រជាជនប៉ុណ្ណោះទេ តែផែនទីនេះបានធ្វើឲ្យសហការី ឯ.ឧខ្លះជាប់គុក និងខ្លះទៀតកំពុងរត់គេចខ្លួន»។

បើតាមសាររបស់លោក ហ៊ុន សែន ដែលផ្ញើជូនលោក សម រង្ស៊ី ដដែល លោក ហ៊ុន សែន បញ្ជាក់ថា រូបលោក នឹងឲ្យផ្សព្វផ្សាយនូវឯកសារទាំងអស់ រាប់ទាំងលិខិតរបស់សម្តេចឪ ផ្ញើ ជូនអតីតនាយករដ្ឋមន្ត្រី វៀតណាម ផាំ វ៉ាន់ដុង កាលពីឆ្នាំ១៩៩៩ សុំយកខ្សែរប្រេវីយេជាខ្សែព្រំដែន ទឹករវាងកម្ពុជានិងវៀតណាមទៀត។

ជាចុងបញ្ចប់នៃសារបស់ខ្លួន លោក ហ៊ុន សែន មានក្តីរំពឹងថា លោក សម រង្ស៊ី នឹងលែងយកបញ្ហាព្រំដែនកម្ពុជា-វៀតណាម ជាល្បែងនយោបាយ។ លោក ហ៊ុន សែន មានសុទិដ្ឋិ និយមយ៉ាងនេះថា៖«ខ្ញុំសង្ឃឹមថាចាប់ពីពេលនេះតទៅបញ្ហារព្រំដែនពិសេសព្រំដែនកម្ពុជា-វៀតណាម លែងក្លាយទៅ ជាល្បែងនយោបាយបោកប្រាស់ប្រជាជនពីសំណាក់ឯ.ឧផ្ទាល់ និងមនុស្សក្នុងគណបក្សឯ.ឧតទៅទៀត។ ខ្ញុំនឹងចូលរួមកំដរឯ.ឧនូវគ្រប់ទម្រង់លេង គ្រប់កាលៈទេសៈគ្រប់រដូវកាល និងគ្រប់រស់ជាតិ (ក្តៅ.ត្រជាក់.ផ្អែម.ល្វីង.ជូរចត់) »៕