អន្តរជាតិ
រដ្ឋាភិបាលសិង្ហបុរីរំលាយសភាដើម្បីតៀមការបោះឆ្នោតជាសកល
× រដ្ឋាភិបាលសិង្ហបុរី ចេញសេចក្តីប្រកាសរំលាយសភា និង កំណត់ការបរិច្ឆេទបោះឆ្នោតសកលដើម្បី ជ្រើសរើសសមាជិករដ្ឋសភាអាណត្តិបន្ទាប់។ ការរំលាយនេះ គឺដើម្បីត្រៀមសម្រាប់ការបោះឆ្នោត ដែលនឹងត្រូវប្រព្រឹត្តឡើងនៅខែកញ្ញានេះ ។
ម្សិលមិញនេះ លោកប្រធានាធិបតីសិង្ហបុរី Tony Tan Keng Yam បានប្រកាសរំលាយសភាអាណត្តិទី ១២ ដើម្បីត្រៀមសម្រាប់ការបោះឆ្នោតជាសកល ដែលនឹងត្រូវប្រព្រឹត្តឡើងនៅខែកញ្ញាខាងមុខនេះ។ សេចក្តីប្រកាសនេះ ធ្វើឡើងក្រោយពីលោកនាយករដ្ឋមន្ត្រីលី ស៊ានឡុង បានប្រកាសពីការបោះឆ្នោត កាលពីថ្ងៃសមាជជាតិសបា្ហហ៍មុននេះ។
យោងតាមសេចក្តីប្រកាសរបស់លោកប្រធានាធិបតី Tony Tan Keng Yam ដែលជាអ្នកប្រឹក្សារបស់ លោកនាយករដ្ឋមន្ត្រីលី ស៊ានឡុង ការបោះឆ្នោតជាសកល ឬបោះឆ្នោតសមាជិករដ្ឋសភា នឹងត្រូវធ្វើ ឡើងនៅថ្ងៃទី១១ខែ កញ្ញាខាងមុខនេះ។ តាមសេចក្តីប្រកាសដដែលនោះ ការបោះឆ្នោតជាសកល ២០១៥ នឹងមានចំនួនអាសនៈ ៨៩ និង ប្រជាជនបោះឆ្នោតសរុបប្រមាណជាងពីរលាននាក់ផងដែរ។
ជុំវិញការបោះឆ្នោតនេះ លោកនាយករដ្ឋមន្ត្រីលី ស៊ានឡុង ដែលជាសមាជិករបស់គណបក្សកាន់ អំណាចសកម្មភាពប្រជាជន បានចាត់ទុកការបោះឆ្នោតនេះ មិនត្រឹមតែជាជ្រើសរើសមេដឹកនាំរយៈ ពេលប្រាំឆ្នាំនោះទេ តែវាក៏ជាការជ្រើសរើសក្រុមការងារដើម្បីកំណត់ពីជោគវាសនារបស់សិង្ហបុរីក្នុង រយៈពេល៥០ឆ្នាំ ក្រោយផងដែរ។ អ្វីដែលគួរកត់សម្គាល់ ក្នុងឱកាសនៃការធ្វើសមាជជាតិប្រចាំ លោក លី បានប្រកាសនូវសមិទ្ធផលនិង គោលកាណ៍ជាច្រើនចំណុចដើម្បីព្យាយាមទាក់ទាញប្រជាប្រិយភាព របស់លោកនិង គណបក្សកាន់អំណាចនៅអាណត្តិបោះឆ្នោតនៅពេលខាងមុខនេះ។
សូមរម្លឹកផងដែរថា គិតចាប់ពីពេលសិង្ហបុរីទទូលបានឯករាជ្យឆ្នាំ១៩៦៥ សិង្ហបុរីត្រូវបានដឹកនាំដោយ គណបក្សកាន់អំណាចសកម្មភាពប្រជាជន(PAP) ដែលដឹកនាំដោយបិតាស្ថាបនិកលោក លី ក្វាន់យូ។ ការរក្សាបាននូវប្រជាប្រិយភាពដ៏យូរនេះ ក៏ព្រោះតែគណបក្សកាន់អំណាច បានកែប្រែសិង្ហបុរីជា រដ្ឋមួយដែលមានការអភិវឌ្ឍន៍ឆាប់រហ័សនៅក្នុងតំបន់។ យ៉ាងណាមិញ នៅក្នុងអាណត្តិនេះ គេមិនទាន់អាចធានាបាននូវលទ្ធផលនោះទេ ព្រោះគេឃើញថាគណបក្សប្រឆាំងជាច្រើនបានចូលរួម គ្នាបង្កើតសម្ពន្ធ័ដើម្បីប្រជែងយកអាសនៈនៅក្នុងមណ្ឌលបោះឆ្នោត៕
© រក្សាសិទ្ធិដោយ thmeythmey.com