Advisor និង Consultant គឺយើងសំដៅដល់ អ្នកដែលមានចំណេះដឹងជ្រៅជ្រះ និងជំនាញច្បាស់លាស់ ក្នុងការផ្តល់យោបល់ ដល់បុគ្គលណាមួយ ក្រុមណាមួយ ក្រុមហ៊ុនណាមួយ ឬស្ថាប័នរដ្ឋាភិបាល ដើម្បីដោះស្រាយបញ្ហា។
Advisor និង Consultant មានមុខងារដូចគ្នា គឺអ្នកផ្តល់យោបល់ និងគំនិត ដើម្បីដោះស្រាយបញ្ហា ឬស្វែងរកយុទ្ធសាស្ត្រ ដើម្បីធ្វើឲ្យផែនកាអ្វីមួយ កាន់តែទទួលបានជោគជ័យ។ តែតួនាទី និងមុខងារ ក្នុងការផ្តល់យោបល់របស់បុគ្គលទាំងពីរនេះ មានលក្ខណៈផ្សេងគ្នា គឺ៖
អត្ថន័យទី១ Advisor យើងអាចប្រែថា ទីប្រឹក្សា ឬអ្នកណែនាំ ឬក៏អ្នកផ្តល់យោបល់។ ត្រង់នេះ ចង់សំដៅថា Advisor គ្រាន់តែជាបុគ្គល ដែលផ្តល់យោបល់ និងគំនិតដល់យើង ដើម្បីជួយយើងដោះស្រាយបញ្ហាអ្វីមួយ តែពួកគេមិនមែនជាអ្នកជំនាញ ឬឯកទេសខាងផ្តល់យោបល់នោះទេ។ Advisor ត្រង់នេះ យើងសំដៅដល់ ឪពុកម្តាយ បងប្អូន សាច់ញាតិ ឬអ្នកដែលមានទំនាក់ទំនងជិតស្និទ្ធនឹងយើង ដូចជា សង្សារ មិត្តភក្តិ ជាដើម។
ឧទាហរណ៍ថា៖ You are not only my boyfriend, but you are also a good advisor of my lifetime. បងមិនត្រឹមតែជាសង្សារអូននោះទេ តែបងថែមទាំងជាអ្នកផ្តល់យោបល់សម្រាប់ជីវិតអូនទៀតផង។
អត្ថន័យទី២ Advisor យើងអាចប្រែថា «ទីប្រឹក្សា» តែម្តង។ Advisor ទីនេះ សំដៅដល់បុគ្គល ដែលមានជំនាញ និងឯកទេសច្បាស់លាស់ខាងផ្តល់គំនិត ហើយជាអ្នកដែលយល់កិច្ចការល្អិតល្អន់ ពូកែស្វែងរកដំណោះស្រាយ និងរៀបចំយុទ្ធសាស្ត្រផ្សេងៗ ក្នុងការអភិវឌ្ឍក្រុមហ៊ុន ឬស្ថាប័នណាមួយ។ តួយ៉ាងដូចជាទីប្រឹក្សាក្រុមហ៊ុន ទីប្រឹក្សាក្រសួង ទីប្រឹក្សានាយករដ្ឋមន្ត្រី ទីប្រឹក្សារដ្ឋាភិបាល ឬទីប្រឹក្សាគណបក្សនយោបាយ។ ពួកគេត្រូវបានជួល ឬតែងតាំង ឬក៏ស្នើសុំឲ្យ កាន់មុខងារជាទីប្រឹក្សា ក្នុងក្រុមហ៊ុន និងស្ថានប័ន ជាអចិន្ត្រៃយ៍តែម្តង ដើម្បីផ្តល់យោបល់ ដល់ក្រុមហ៊ុន ឬស្ថាប័ននោះ។
ឧទាហរណ៍ថា៖ He is a supreme advisor of Thmey Thmey Media. គាត់គឺជាទីប្រឹក្សាជាន់ខ្ពស់របស់សារព័ត៌មានថ្មី។
ចំណែកឯ Consultant យើងប្រែថា «អ្នកផ្តល់យោបល់ ឬអ្នកពិគ្រោះយោបល់»។ Consultant គឺក៏ជាអ្នកជំនាញ និងឯកទេសក្នុងការផ្តល់យោបល់ ដូច Advisor ដែរ (អត្ថន័យទី២) តែពួកគេមិនមែនជាបុគ្គលដែលស្ថិតនៅក្រោមការគ្រប់គ្រងរបស់ក្រុមហ៊ុន ឬរដ្ឋាភិបាល ឬមួយគណបក្សនយោបាយណាឡើយ។ Consultant គឺជាអ្នកបើកក្រុមហ៊ុនឯកជនដោយខ្លួនឯងផ្ទាល់ ដើម្បីបម្រើសេវាកម្មប្រឹក្សាយោបល់ ដែលជាមុខរបររកស៊ី និងជាអាជីពចិញ្ចឹមជីវិតរបស់ពួកគេតែម្តង។ ដូចជា ក្រុមហ៊ុនប្រឹក្សាយោបល់ខាងជ្រើសរើសគូរស្រករ ក្រុមហ៊ុនប្រឹក្សាច្បាប់ ក្រុមហ៊ុនប្រឹក្សាពាណិជ្ជកម្ម ឬជំនួញ ជាដើម។
ពេលអ្នកមានបញ្ហាអ្វីមួយដោះស្រាយមិនចេញ អ្នកអាចស្វែងរកប្រភេទក្រុមហ៊ុនដែលបម្រើសេវាកម្មពិគ្រោះយោបល់ ទាក់ទងនឹងបញ្ហារបស់អ្នក ដើម្បីឲ្យអ្នកជំនាញជួយស្វែងរកដំណោះស្រាយ។ បុគ្គលដែលអ្នកទៅជួបនៅក្រុមហ៊ុន ឬការិយាល័យ ដើម្បីជួយផ្តល់យោបល់ យើងហៅថា Consultant មិនមែន Advisor ទេ៕
ឧទាហរណ៍ថា៖ I think you should go to meet a specialized consultant before you decide to run your own business. ខ្ញុំគិតថាសម្លាញ់ឯងគួរតែស្វែងរកអ្នកពិគ្រោះយោបល់សិនទៅ មុនពេលសម្រេចចិត្តបង្កើតមុខជំនួញខ្លួនឯង៕