ជាតិ
នយោបាយជាតិ
តើសកម្មភាពរបស់លោក អ៊ំ សំអាន នៅ US ជាបេសសកម្មរឿងព្រំដែនផ្លូវការ ឬឯកជន?
×
ភ្នំពេញ៖ លោក អ៊ំ សំអាន ក្រោយពីកើតបញ្ហាចម្រូងចម្រាសរឿងព្រំដែនជាមួយរដ្ឋាភិបាលគ្រប់គ្រងដោយគណបក្សប្រជាជនកម្ពុជារួចមក លោកក៏បានធ្វើដំណើរទៅកាន់សហរដ្ឋអាមេរិកដើម្បីបន្តវាយប្រហាររឿងព្រំដែនមកលើគណបក្សប្រជាជនកម្ពុជា។ សំណួរជាច្រើនបានលើកឡើងថា តើការធ្វើដំណើរចេញពីប្រទេសកម្ពុជាដោយខ្លាចប្រឈមនឹងការចាប់ខ្លួនទៅកាន់សហរដ្ឋអាមេរិកនេះជាបេសសកម្មផ្លូវការអនុញ្ញាតដោយគណបក្សសង្គ្រោះជាតិ ឬជាបេសសកម្មផ្ទាល់ខ្លួនរបស់តំណាងរាស្ត្រ អ៊ំ សំអាន ក្នុងនាមផ្ទាល់ខ្លួន?
ក្នុងរយៈពេលប៉ុន្មានខែចុងក្រោយនេះ លោក អ៊ំ សំអាន តំណាងរាស្ត្រគណបក្សសង្គ្រោះជាតិបានចេញមុខជាសាធារណៈដើម្បីប្រឆាំងនឹងការឈ្លានពានព្រំដែនខាងកើតពីសំណាក់ប្រទេសវៀតណាម។ ការតស៊ូមតិរបស់លោកលើបញ្ហាព្រំដែននេះបានបង្ខំអោយលោកចាកចេញពីប្រទេសកម្ពុជាកាលពីពេលថ្មីៗនេះឆ្ពោះទៅកាន់សហរដ្ឋអាងមេរិក ក្នុងន័យ ចៀសគេចពីការចាប់ខ្លួនជាយថាហេតុដោយប្រការណាមួយពីសំណាក់អាជ្ញាធររាជរដ្ឋាភិបាលកម្ពុជាទាក់ទងទៅនឹងការធ្វើអត្ថាធិប្បាយថា «ផែនទីដែលប្រើប្រាស់ដោយរដ្ឋាភិបាលបច្ចុប្បន្នមិនត្រឹមត្រូវ»។
ទៅដល់សហរដ្ឋអាមេរិក លោក អ៊ំ សំអាន នៅតែបន្តរិះគន់រដ្ឋាភិបាលក្រុងភ្នំពេញរឿងព្រំដែនដដែល។ មានសំណួរជាច្រើនបានចោទសួរលោក កឹម សុខា និងលោក សម រង្ស៊ី នៅក្នុងប្រទេសអូស្ត្រាលីថា តើការធ្វើដំណើររបស់លោក អ៊ំ សំអាន ទៅកាន់សហរដ្ឋអាមេរិក គឺជាបេសសកម្មផ្លូវការអនុញ្ញាតដោយគណបក្សសង្គ្រោះជាតិ ឬជាការធ្វើដំណើរជាលក្ខណៈឯកជនក្នុងនាមតំណាងរាស្ត្រ? សំណួរនេះត្រូវបានខ្មែរនៅក្នុងប្រទេសអូស្ត្រាលីចោទសួរទៅកាន់លោក កឹម សុខា និងលោក សម រង្ស៊ី ក្នុងជំនួបរវាងមេបក្សសង្គ្រោះជាតិ និងអ្នកគាំទ្រនៅក្នុងប្រទេសអូស្ត្រាលី។
ឆ្លើយទៅនឹងសំណួររបស់អ្នកគាំទ្រ លោក កឹម សុខា បានអត្ថាធិប្បាយថា៖«ខ្ញុំ និងលោក សម រង្ស៊ី មិនបានចេញលិខិតបេសសកម្មផ្លូវការជូនលោក អ៊ំ សំអាន ទេ»។ នេះគឺជាចម្លើយខ្លីរបស់លោក កឹម សុខា ដែលដកស្រង់សម្តីបន្តដោយលោក មុត ចន្ថា ប្រធានខុទ្ទកាល័យរបស់លោក កឹម សុខា។ ប៉ុន្តែ ទោះជាយ៉ាងណាក្តី ប្រធានខុទ្ទកាល័យរូបនេះបានបន្តទៀតថា លោក អ៊ំ សំអាន មានសិទ្ធិនិយាយក្នុងនាមប្រជាពលរដ្ឋ និងក្នុងនាមតំណាងរាស្ត្រ។
សូមបញ្ជាក់ថា លោក អ៊ំ សំអាន ត្រូវបានគេចខ្លួនទៅកាន់ប្រទេសអាមេរិក ក្រោយពេលដែលលោកបារម្ភខ្លាចមានការចាប់ខ្លួនទាក់ទងទៅនឹងការធ្វើអត្ថាធិប្បាយរឿងព្រំដែន។ ព្រមពេលជាមួយគ្នា លោកធ្វើដំណើរទៅសហរដ្ឋអាមេរិកដើម្បីជួបជុំសាច់ញាតិរបស់លោក ពីព្រោះលោកក៏មានសញ្ជាតិអាមេរិកដែរ៕
© រក្សាសិទ្ធិដោយ thmeythmey.com