ជាតិ
លោក សុខ ទូច មិនលូកដៃ ដោយទុកឲ្យសមត្ថកិច្ចចាត់ការជនសង្ស័យគំរាមសម្លាប់ខ្លួន
× ប្រធានក្រុមការងារស្រាវជ្រាវព្រំដែន លោក សុខ ទូច មិនអើពើនឹងការចាប់ខ្លួនជនសង្ស័យ ដែលគំរាមសម្លាប់រូបលោកឡើយ ដោយលោកថាទុកភារកិច្ចនេះ ឲ្យខាងសមត្ថកិច្ចចាត់វិធានការតាមផ្លូវច្បាប់។ សមត្ថកិច្ច បានឃាត់ខ្លួនជនសង្ស័យម្នាក់ដែលជាមុខសញ្ញាគំរាមសម្លាប់លោក សុខ ទូច តាមហ្វេសប៊ុក កាលពី ថ្ងៃទី៥ ខែកញ្ញា នៅចំណុចព្រំដែនប៉ោយប៉ែត បន្ទាប់ជនសង្ស័យនេះបានឆ្លងដែនពីប្រទេសថៃចូលមកកម្ពុជា ។
លោក សុខ ទូច ដែលកំពុងសិក្សាស្រាវជ្រាវព្រំដែន បានបញ្ជាក់ថា ការចាប់ខ្លួនសង្ស័យដែលគំរាមសម្លាប់លោកនោះ គឺជារឿងដ៏ត្រឹមត្រូវមួយរបស់សមត្ថកិច្ច ក្នុងការអនុវត្តការងាររបស់ពួកគេ។ ថ្លែងប្រាប់សារព័ត៌មានថ្មីៗនៅថ្ងៃអាទិត្យនេះ លោក សុខ ទូច ក៏មិនមានការលូកដៃស្នើឲ្យសមត្ថកិច្ចជួយដោះលែងជនសង្ស័យ ដែលគំរាមសម្លាប់លោកឡើយ។ ៖«ខ្ញុំទុកឲ្យសមត្ថកិច្ចចាត់ចែងលើរឿងនេះ។ហើយខ្ញុំក៏មិនលូកដៃស្នើឲ្យមានការដោះលែងដែរ ព្រោះបើខ្ញុំលូកដៃចូលនោះ គេនឹងថាខ្ញុំជាអ្នកផ្សំគំនិតរៀបចំរឿងនេះឡើង ដើម្បីឲ្យខ្លួនឯងកាន់តែល្បី»។ នេះជាការបញ្ជាក់របស់លោក សុខ ទូច ដែលអះអាងថា ខ្លួនមិនបានដាក់ពាក្យប្ដឹងនឹងករណីគំរាមសម្លាប់នេះទេ។
ប្រធានក្រុមការងារស្រាវជ្រាវព្រំដែនរូបនេះ ក៏អំពាវនាវឲ្យប្រជាពលរដ្ឋ ជាពិសេសយុវជន កុំឲ្យយកអាយុជីវិតអ្នកដទៃ មកគំរាមកំហែងសម្លាប់នៅបណ្ដាញសង្គមហ្វេសបុកទៀត។
បើតាមការចុះផ្សាយរបស់គេហទំព័រអគ្គស្នងការដ្ឋាននគរបាលជាតិ យុវជនម្នាក់ដែលគេសង្ស័យថា បានគំរាមសម្លាប់លោក សុខ ទូច តាមបណ្ដាញហ្វេសបុកនោះ មានអាយុ២៧ឆ្នាំ មានទីកន្លែងកំណើត ក្នុងឃុំស្ដៅកោង ស្រុកបាភ្នំ ខេត្តព្រៃវែង។
ប្រភពព័ត៌មានដដែល បានឲ្យដឹងទៀតថា ជនសង្ស័យបានសារភាពថា ខ្លួនពិតជាអ្នកបង្ហោះសារ មានរូបភាពគំរាម សម្លាប់ លោកបណ្ឌិត សុខ ទូច ដោយប្រើតាមទូរស័ព្ទដៃ។ ប្រភពបន្ដថា សកម្មភាពជនសង្ស័យនេះកន្លងមក ក៏ធ្លាប់លួចប្រាក់ព្រះសង្ឃក្នុងវត្ត នៅស្រុកកំណើតកាលពីឆ្នាំ២០១២ និងរត់គេចខ្លួនទៅធ្វើពលករនៅប្រទេសថៃ ៕
© រក្សាសិទ្ធិដោយ thmeythmey.com