ប្លែកៗ
អន្តរជាតិ
បុរសម្នាក់មិនមុជទឹក ១២ ឆ្នាំលក់រូបមន្តសម្ងាត់ធ្វើឲ្យស្បែកស្រស់ស្រាយក្នុងស្ព្រាយមួយដប
× នៅទីក្រុង Cambridge រដ្ឋ Massachusetts សហរដ្ឋអាមេរិក បុរសម្នាក់បានអះអាងថា គាត់មិនមុជទឹករយៈពេល ១២ ឆ្នាំមកហើយ តែគាត់បានរកឃើញរូបមន្តពិសេសដែលជួយសម្អាតខ្លួនប្រាណឲ្យស្អាត និងមានអារម្មណ៍ស្រស់ស្រាយល្អប្រសើរជាងការមុជទឹកទៅទៀត។ នោះគឺការបាញ់បាក់តេរីមានជីវិតមួយប្រភេទទៅលើស្បែកដែលបង្កើតឡើងដោយក្រុមហ៊ុន AOBiome របស់លោក។
លោក David Witlock វិស្វករផ្នែកគីមីបានប្រាប់ ABC7 ថា ការមុជទឹកធ្វើឲ្យបាក់តេរីល្អត្រូវបាត់បង់។ ជាមួយនឹងស្ព្រាយ Mother Dirt ដែលត្រូវបាញ់លើដងខ្លួនពីរដងក្នុងមួយថ្ងៃ វាអាចទប់ស្កាត់ការភាយចេញនូវជាតិអាំម៉ូញាក់ដែលកើតពីញើស។ ដូច្នេះ វាអាចកម្ចាត់ក្លិនស្អុយនៃខ្លួនបាន។ លោកបាននិយាយថា៖ « ខ្ញុំមិនមុជទឹកជាង ១២ ឆ្នាំមកហើយ។ គ្មាននរណាម្នាក់ធ្លាប់បានសាកល្បងពិសោធអ្នកដែលមុជទឹកសម្អាតខ្លួនរាល់ថ្ងៃនោះ ថាតើខ្លួនប្រាណរបស់ពួកគេពិតជាស្អាតពិតប្រាកដឬយ៉ាងណាទេ។ ដូច្នេះ យើងមិនអាចអះអាងថា ការមុជទឹកគឺជាវិធីដ៏ត្រឹមត្រូវនោះទេ »។
គាត់បានរកឃើញរូបមន្តពិសេសនេះ នៅពេលដែលគាត់កត់សម្គាល់ឃើញថា សត្វបានប្រើវិធីននៀលនឹងដី ដើម្បីបង្កើនបាក់តេរីនៅលើដងខ្លួនរបស់វា សម្រាប់ទប់ស្កាត់ញើស និងក្លិនផ្អូមជូរនៅពេលអាកាសធាតុក្តៅ។ បន្ទាប់មក គាត់ក៏បានប្រមូលយកបាក់តេរីនៅលើដីក្នុងទ្រុងមាន់ ទ្រុងជ្រូក និងក្រោលគោក្នុងកសិដ្ឋានធម្មជាតិ ដើម្បីបញ្ចូលទៅក្នុងស្ព្រាយពិសេសនេះ។
នៅលើគេហទំព័ររបស់ក្រុមហ៊ុន ស្ព្រាយសម្អាតខ្លួនដបតូចលក់ក្នុងតម្លៃ ៤៩ ដុល្លារ។ ស្ព្រាយនេះគ្មានក្លិនទេ វាស្រដៀវគ្នានឹងទឹកដែរ។ ម្ចាស់រូបមន្តសម្អាតខ្លួនពិសេសនេះបានធានាអះអាងថា ក្រោយពីបានប្រើផលិតផលនេះ ស្បែកនឹងទន់ ហើយរលោងជាងមុន៕
© រក្សាសិទ្ធិដោយ thmeythmey.com