ប្លែកៗ
អន្តរជាតិ
×![]()
ដោយ: ធីតា
សួតសិប្បនិម្មិតដែលមិនចាំបាច់ធ្វើការវះកាត់ដាក់បញ្ចូលទៅក្នុងខ្លួន នឹងត្រូវបង្កើតឡើងនៅ ៥ ឆ្នាំខាងមុខនេះ។ ពេលនេះ គម្រោងវេជ្ជសាស្ត្រដែលត្រូវចំណាយថវិកាប្រមាណ ៥៥ លានដុល្លារ កំពុងស្ថិតក្នុងការស្រាវជ្រាវរបស់ក្រុមគ្រូពេទ្យនៃមជ្ឈមណ្ឌលវះកាត់ Marie Lannelongue នៅប្រទេសបារាំង នេះបើតាមការចុះផ្សាយរបស់គេហទំព័រព័ត៌មានបារាំង Europe1 កាលពីថ្ងៃចន្ទកន្លងទៅនេះ។
ខុសពីបេះដូងសិប្បនិម្មិតដែលចាំបាច់ត្រូវតែធ្វើការវះកាត់ សួតសិប្បនិម្មិតថ្មីនេះមិនទាំងតម្រូវឲ្យវះកាត់យកសួតឈឺចេញពីខ្លួនអ្នកជំងឺផងទេ។ សួតនេះគ្មានរូបរាងដូចជាសួតពិតប្រាកដទេ។ វាគឺជាខ្សែក្រវ៉ាត់មួយដែលត្រូវគេដាក់ព័ទ្ធដើមទ្រូង។ វាបង្កភាពងាយស្រួលដល់អ្នកជំងឺ ដោយអ្នកជំងឺគ្រាន់តែពាក់ខ្សែក្រវ៉ាត់ជាប់នឹងដើមទ្រូងដែលមានបំពាក់នូវថ្ម និងឧបករណ៍អុកស៊ីសែនប៉ុណ្ណោះ។ ឧបករណ៍នេះបំពេញមុខងារជំនួសសួតដែលឈឺ ដោយវានឹងបញ្ជូនឈាមមានអុកស៊ីសែនទៅកាន់បេះដូង។
ឧបករណ៍នេះភ្ជាប់ទំនាក់ទំនងទៅកាន់បេះដូងតាមរយៈបំពង់តូចមួយដែលនឹងបញ្ចូលទៅក្នុងសរសៃអ័កទែរតាមបំពង់ក ហើយបំពង់នេះគឺជាវត្ថុតែមួយគត់ដែលបំពាក់នៅក្នុងខ្លួនអ្នកជំងឺ។ សួតសិប្បនិម្មិតក្រៅខ្លួននេះមិនមែនបង្កើតឡើងក្នុងគោលបំណងជំនួសការផ្សាំសរីរៈសួតពិតប្រាកដទេ។ វាគឺជាវិធីថ្មីមួយដែលសមប្រកបសម្រាប់អ្នកជំងឺមានបញ្ហាផ្លូវដង្ហើមធ្ងន់ធ្ងរ ហើយដែលមិនអាចទទួលយកវិធីផ្សាំសួតបាន ដោយសារតែពួកគាត់ជាមនុស្សចាស់ជរា ឬទន់ខ្សោយជាដើម៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
