អ្នកវិភាគកម្ពុជាយល់ឃើញផ្សេងគ្នាពីប្រជាប្រិយភាពបក្សកាន់អំណាចសិង្ហបុរី

ជាតិ

នយោបាយជាតិ

អ្នកវិភាគកម្ពុជាយល់ឃើញផ្សេងគ្នាពីប្រជាប្រិយភាពបក្សកាន់អំណាចសិង្ហបុរី

11, Sep 2015 , 12:15 pm

រូបភាព

ដោយ: ថ្មីៗ

តើគណបក្សសកម្មភាពប្រជាជនដែលជាគណបក្សកាន់អំណាចរបស់លោកនាយករដ្ឋមន្ត្រី លី ស៊ានឡុង ទទួលបានអាសនៈច្រើនជាងមុន ឬបាត់បង់ជាងមុន ឬនៅដដែល? ក្រុមអ្នកវិភាគពីប្រទេសកម្ពុជាបានយល់ឃើញផ្សេងៗគ្នាក្រោមហេតុផលរៀងៗខ្លួន។

លោក កែម ឡី អ្នកស្រាវជ្រាវសង្គម៖ គណបក្ស PAP របស់លោក លី ស៊ានឡុង នឹងបាត់បង់អាសនៈខ្លះ ដោយសារតែគណបក្សប្រឆាំងបានរកឃើញតួអង្គគូប្រជែងល្អៗទល់នឹងលោកបណ្ឌិត លី ស៊ានឡុង បាន។ ពលរដ្ឋសិង្ហបុរីពិចារណាលើតួអង្គ ឬបេក្ខភាពនាយករដ្ឋមន្ត្រី។ ពួកគេយល់ថា បុគ្គលភាពរបស់បេក្ខភាពនាយករដ្ឋមន្ត្រីកំណត់ពីការផ្លាស់ប្តូរ។ ពលរដ្ឋសិង្ហបុរីមាន៤ក្រុម គឺអ្នកដែលមានកំណើតពីចិន ឥណ្ឌា អ៊ីស្លាម និងជនជាតិផ្សេងៗ ។ ថ្វីដ្បិតតែពលរដ្ឋដែលមានកំណើតពីចិនគាំទ្រលោក លី ស៊ានឡុង មែន ប៉ុន្តែក្រុមពលរដ្ឋដែលមានកំណើតពីអម្បូរឥណ្ឌាហើយដែលជាក្រុមអ្នកជំនួញ និងពាណិជ្ជករនៅក្នុងសិង្ហបុរីនោះ មិនពេញចិត្តលោក លី ស៊ានឡុងទេ។

លោក រស់ រ៉ាវុធ បណ្ឌិតវិទ្យាសាស្ត្រនយោបាយ៖ គណបក្សកាន់អំណាចរបស់សិង្ហបុរីនឹងអាចរក្សាអាសនៈដដែល ឬអាចទទួលបានអាសនៈថែមទៀតផង។ យើងត្រូវសិក្សា២ចំណុចលើតួអង្គ លី ស៊ានឡុង។ ទី១ ថ្វីដ្បិតលោក លី ស៊ានឡុង ជាកូនអតីតបិតាស្ថាបនិកសិង្ហបុរីមែន ប៉ុន្តែក្នុងរយៈពេលនៃការដឹកនាំសិង្ហបុរីកន្លងមក លោក លី ស៊ានឡុង មិនបានស៊ីកេររបស់ឪពុកលោកនោះទេ។ ម្យ៉ាងវិញទៀត លោក លី ស៊ានឡុង បានជាប់ឆ្នោតជានាយករដ្ឋមន្ត្រីតាមរយៈការបោះឆ្នោតរបស់ពលរដ្ឋដែលគាំទ្រស្នាដៃ ទង្វើ និងសមត្ថភាពរបស់លោក។ ដូច្នេះលោក លី ស៊ានឡុង មានស្នាដៃដឹកនាំប្រទេស។ ទី២ នៅពេលដែលឪពុកលោកនៅមានជីវិត លោក លី ស៊ានឡុង បាននាំវិនិយោគិនច្រើនចូលមកក្នុងប្រទេសសិង្ហបុរី ដែលធ្វើឲ្យពលរដ្ឋមើលឃើញថា លោកជាមេដឹកនាំល្អ។ និយាយពីគណបក្សប្រឆាំង។ ដោយសារតែសិង្ហបុរីជាប្រទេសប្រជាធិបតេយ្យផ្តាច់ការមួយ គណបក្សប្រឆាំងមិនដែលហ៊ាននិយាយរិះគន់ធ្វើឲ្យប៉ះពាល់គណបក្សកាន់អំណាចទេ។ ជាហេតុធ្វើឲ្យពលរដ្ឋមើលឃើញថាបក្សប្រឆាំងមិនមានសមត្ថភាពគ្រប់គ្រាន់នៅឡើយ។

លោក អ៊ូ វីរៈ អ្នកវិភាគឯករាជ្យ៖ ខ្ញុំមិនចាប់អារម្មណ៍ការបោះឆ្នោតនៅសិង្ហបុរី ដែលគេដឹងគ្រប់គ្នាថាគណបក្សកាន់អំណាចសព្វថ្ងៃ គឺគណបក្សសកម្មភាពប្រជាជន (People’s Action Party)នឹងបន្តឈ្នះកាន់អំណាចទៀតនោះទេ។ អ្នកណាក៏ដឹងថា គណបក្សប្រឆាំងនៅក្នុងប្រទេសសិង្ហបុរីមិនមានសំឡេងខ្លាំងឡើយ។ ម្យ៉ាងទៀតពលរដ្ឋសិង្ហបុរីនៅសំដែងការពេញចិត្តច្រើនចំពោះកាន់អំណាចសព្វថ្ងៃ ព្រោះតែការរីកចំរើនផ្នែកសេដ្ឋកិច្ច និងស្ថេរភាពនយោបាយ។ វាមានយុវជនជំនាន់ក្រោយដែលធុញទ្រាន់នឹងការកាន់អំណាចយូរឆ្នាំនៃគណបក្សរបស់លោក លី ស៊ានឡុង មែន ប៉ុន្តែវាមិនដូចប្រទេសកម្ពុជាដែលចំនួនយុវជនជំនាន់ក្រោយមានទំហំធំនោះទេ។ យុវជនសិង្ហបុរីមានតិចនៅឡើយ។