ជាតិ
នយោបាយជាតិ
ក្តីស្រម៉ៃរបស់ទ្រង់ រណឫទ្ធិ និងលោក ម៉ម សូណង់ដូ ចង់បានកៅច្រើន ហាក់ឆ្ងាយពីការពិត
× អ្នកវិភាគនយោបាយទស្សន៍ទាយថា គណបក្សហ្វ៊ុនស៊ិនប៉ិច ដឹកនាំដោយព្រះអង្គម្ចាស់ នរោត្តម រណឫទ្ធិ មិនអាចទទួលបានអាសនៈ សូម្បីតែ១ នោះឡើយ ។ ប៉ុន្ដែគណបក្សសំបុកឃ្មុំប្រជាធិបតេយ្យ របស់លោក ម៉ម សូណង់ដូ ប្រហែលជាអាចទទួលបានអាសនៈចំនួន៣ ក្នុងរដ្ឋសភា នៅក្នុងការបោះឆ្នោតឆ្នាំ២០១៨ខាងមុខ។ ការវិភាគនេះ ធ្វើឡើងក្រោយពីថ្នាក់ដឹកនាំគណបក្សទាំងពីរនោះ សុទ្ធតែអះអាងថា គណបក្សខ្លួននឹងអាចទទួលបានអាសនៈច្រើនក្នុងរដ្ឋសភា នៅពេលបោះឆ្នោតថ្នាក់ជាតិខាងមុខ ។
លោក អ៊ូ វីរៈ អ្នកវិភាគនយោបាយ មើលឃើញថា គណបក្សហ្វ៊ុនស៊ិនប៉ិច មិនអាចទទួលបានអាសនៈ ២៦ ក្នុងការបោះឆ្នោតឆ្នាំ ២០១៨ ដូចការលើកឡើងរបស់ព្រះអង្គម្ចាស់ នរោត្តម រណឫទ្ធិ នោះឡើយ។ តែផ្ទុយវិញ លោកថា គណបក្សនេះ សូម្បីតែមួយអាសនៈក្នុងរដ្ឋសភា ក៏មិនបានដែរ។ ចំពោះគោលនយោបាយ គណបក្សហ្វ៊ុនស៊ិនប៉ិចនេះវិញ ត្រូវបានលោក អ៊ូ វីរៈ ចាត់ទុកជាគោលនយោបាយប្រជាភិថុត គឺជារឿងមួយដែលគណបក្សនេះ មិនអាចធ្វើទៅរួចដូចជាការសន្យានោះទេ។
ថ្លែងប្រាប់សារព័ត៌មានថ្មីៗ អ្នកវិភាគរូបនេះ បានបញ្ជាក់យ៉ាងដូច្នេះថា៖«មិនអាចទៅរួចទេ រកតែមួយកៅអីមិនបានផង ព្រោះគាត់ជាអ្នកនយោបាយខូចឈ្មោះម្ដងរួចហើយ។ ហើយគោលនយោបាយសងប្រាក់ទៅធានាគារជំនួសប្រជាពលរដ្ឋនោះ មិនអាចធ្វើទៅកើតនោះទេ ព្រោះធ្វើដូចនោះសេដ្ឋកិច្ចជាតិនឹងក្រឡាប់ចាក់ ដួលតែម្ដង»។
មិនខុសពីលោក អ៊ូ វីរៈ នោះទេ លោក រស់ រ៉ាវុធ សាស្ត្រាចារ្យវិទ្យាសាស្ត្រ នយោបាយ យល់ឃើញថា ការសង្ឃឹមបាន២៦ អាសនៈរបស់ព្រះអង្គម្ចាស់ រណឫទ្ធិ គឺគ្រាន់តែជាការលើកទឹកចិត្តដល់ថ្នាក់ដឹកនាំ មន្ត្រី និងអ្នកគាំទ្របក្សខ្លួន មុនការប្រកួតសន្លឹកឆ្នោត ដើម្បីឲ្យពួកគេមានការជឿជាក់លើបក្សប៉ុណ្ណោះ។ «គណបក្សនេះអត់អាចទទួលបានអាសនៈក្នុងរដ្ឋសភានោះទេ។ មូលហេតុដែលគណបក្សហ្វ៊ុនស៊ិនប៉ិច មិនអាចទទួលបានគឺដោយសារគណបក្សនេះធ្លាប់មានជម្លោះគ្នាឯងក្នុងបក្ស ។រឿងអាស្រូវជាមួយរដ្ឋាភិបាល ហើយព្រះអង្គម្ចាស់ រណឫទ្ធិ ធ្លាប់រត់ចោលប្រជាពលរដ្ឋ និងគ្នាឯងដែលធ្លាប់តស៊ូជាមួយគ្នា»។ នេះជាការពន្យល់របស់លោក រស់ រាវុធ។
ងាកមកគណបក្សសំបុកឃ្មុំប្រជាធិបតេយ្យ របស់លោក ម៉ម សូណង់ដូ វិញ។ លោក អ៊ូ វីរៈ យល់ថា គណបក្សមួយនេះអាចនឹងទទួលបានសំឡេងគាំទ្រ ដោយបានអាសនៈទំនងមិនលើសពី៣នោះឡើយ។ លោក អ៊ូ វីរៈ បានពន្យល់មូលហេតុយ៉ាងនេះ៖« គាត់យកគោលនយោបាយមូលនិធិជាតិនិយម។ គាត់មានឱកាសច្រើនជាងគណបក្សតូចៗដទៃ ដោយសារហ៊ានលើកបញ្ហាព្រំដែន និយាយជំនួសគណបក្សសង្គ្រោះជាតិ ដែលឈប់ចាក់ចង្កេះរដ្ឋាភិបាល។ ហើយគាត់អាចទាក់ទាញប្រជាប្រិយភាពពីចាស់ៗ នៅតាមជនបទដែលស្ដាប់វិទ្យុសំបុកឃ្មុំបានលឺច្បាស់ ដូចជាខេត្តកំពង់ចាម ព្រៃវែងជាដើម។ ប៉ុន្ដែមានឱកាសជាប់ឆ្នោតមិនលើសពី៣អាសនៈនោះទេ»។
ទាក់ទងនឹងគណបក្សថ្មីមួយនេះ លោក រស់ រ៉ាវុធ ឃើញផ្ទុយពីលោក អ៊ូ វីរៈ បន្ដិច ដោយលោកថា គណបក្សលោក ម៉ម សូណង់ដូ មិនអាចប្រាកដនឹងទទួលបានអាសនៈក្នុងរដ្ឋសភានោះទេ ដោយសារគណបក្សនេះជាគណបក្សថ្មី នៅមិនទាន់មានសកម្មភាពច្បាស់លាស់នៅឡើយ ហើយអ្នកគាំទ្រនៅមានភាពរាយប៉ាយ ដែលពិបាកទទួលបានអាសនៈដែរ។
ប្រធានគណបក្សហ្វ៊ុនស៊ិនប៉ិច ព្រះអង្គម្ចាស់ នរោត្តម រណឫទ្ធិ មានបន្ទូលថា ការបោះឆ្នោតសកលនៅឆ្នាំ២០១៨ខាងមុខ ព្រះអង្គសង្ឃឹមថា នឹងទទួលបានសំឡេងឆ្នោតពីប្រជាពលរដ្ឋ យ៉ាងហោចណាស់ក៏ចំនួន ២៦ អាសនៈក្នុងរដ្ឋសភាដែរ។ រីឯលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ អះអាងថា ប្រសិនបើគណបក្សរបស់លោក មិនបានទទួលការគាំទ្រ ៥០ ភាគរយ បូក ១ នៅក្នុងការបោះឆ្នោតឆ្នាំ ២០១៨ ទេនោះ រូបលោក នឹងដើរចេញពីបក្ស៕
© រក្សាសិទ្ធិដោយ thmeythmey.com