ជាតិ
នយោបាយជាតិ
អ្នករាយការណ៍ពិសេសថ្មីរបស់ UN ចង់ជួបលោក ហ៊ុន សែន ក្នុងទស្សនកិច្ចជាលើកដំបូង
× ភ្នំពេញ៖ អ្នករាយការណ៍ពិសេសរបស់អង្គការសហប្រជាជាតិ (UN) លោកស្រី រ៉ូណា ស្ម៊ីត (Rhona Smith) នឹងបំពេញទស្សនកិច្ចផ្លូវការលើកដំបូង នៅក្នុងប្រទេសកម្ពុជា រយៈពេល៩ថ្ងៃ ចាប់ពីថ្ងៃទី១៦ ដល់ថ្ងៃទី ២៤ ខែកញ្ញា ឆ្នាំ២០១៥។ នេះបើតាមសេចក្តីប្រកាសព័ត៌មានរបស់ការិយាល័យសិទ្ធិមនុស្សអង្គសហប្រជាជាតិ (UNHCR)។
យោងតាមសេចក្តីប្រកាសព័ត៌មានពីទីក្រុងហ្សឺណែវ ចុះថ្ងៃទី១៤ កញ្ញានេះ ក្នុងអំឡុងដំណើរទស្សនកិច្ច លោកស្រី Rhona Smith រំពឹងថា នឹងបានចូលជួបលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងមហាផ្ធៃ លោក ស ខេង រដ្ឋមន្ត្រី ព្រមទាំង សមាជិកជាន់ខ្ពស់រាជរដ្ឋាភិបាលដទៃទៀត។ ក្រៅពីនោះ លោកស្រីនឹងជួបជាមួយតំណាង សង្គមស៊ីវិល និងសហគមន៍មូលដ្ឋាននានា ព្រមទាំងក្រុមអង្គការ សហប្រជាជាតិ និងសហគមន៍ម្ចាស់ជំនួយ។ លោកស្រី Rhona Smith ត្រូវបានតែងតាំងដោយក្រុមប្រឹក្សាសិទ្ធិមនុស្ស UN ក្នុងខែមីនា ឆ្នាំ២០១៥ ស្នងតំណែងរបស់លោក សុរិយា ប្រាសាទ ស៊ូប៊ែឌី ដែលបានបញ្ចប់អាណត្តិ ៦ឆ្នាំ នៅខែមីនា ឆ្នាំ២០១៥ ដើម្បីធ្វើសេចក្តីរាយការណ៍ និងផ្តល់ប្រឹក្សាយោបល់ស្តីពី ស្ថានភាពសិទ្ធិមនុស្សនៅកម្ពុជា។
យោងតាមសេចក្តីប្រកាសព័ត៌មាន អ្នករាយការណ៍ពិសេស UN និយាយថា៖« ខ្ញុំសូមថ្លែងអរគុណដល់រដ្ឋាភិបាល សម្រាប់ឱកាសទស្សនកិច្ចនេះ មុនពេលដែលខ្ញុំនឹងធ្វើ របាយការណ៍ទៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅចុងខែនេះ។ ក្នុងការបំពេញបេសកម្មនេះ ខ្ញុំទន្ទឹងរង់ចាំដោយក្តីសោមនស្សរីករាយ ដើម្បីចូលរួមកិច្ចសន្ទនា ក្នុងន័យស្ថាបនាជាមួយរាជរដ្ឋាភិបាល និងប្រជាជនកម្ពុជាក្នុងការបន្តលើកស្ទួយ និងការពារសិទ្ធិមនុស្សនៅក្នុងប្រទេសនេះ»។
ក្នុងឱកាសបញ្ចប់ដំណើរទស្សនកិច្ច លោកស្រី Rhona Smith នឹងធ្វើសន្និសីទសារព័ត៌មាន នៅម៉ោង ៣រសៀល ថ្ងៃទី២៤ កញ្ញា នៅការិយាល័យសិទ្ធិមនុស្សអង្គសហប្រជាជាតិប្រចាំកម្ពុជា (OHCHR) ផ្ទះលេខ១០ ផ្លូវលេខ ៣០២ សង្កាត់បឹងកេងកងទី១ រាជធានីភ្នំពេញ។
គួរបញ្ជាក់ផងដែរ លោកស្រី Rhona Smith ជាសាស្ត្រាចារ្យផ្នែកសិទ្ធិមនុស្សអន្តរជាតិនៅចក្រភពអង់គ្លេស និងជាសាស្ត្រាចារ្យទស្សនកិច្ចនៅសាកលវិទ្យាល័យបញ្ញាសាស្ត្រកម្ពុជា ផ្នែកច្បាប់សិទ្ធិមនុស្ស៕
Tag:
សិទ្ធិមនុស្ស
អង្គការសហប្រជាជាតិ
© រក្សាសិទ្ធិដោយ thmeythmey.com