បទយកការណ៍ / បទសម្ភាសន៍
×![]()
ភ្នំពេញ៖ និទ្ទេសA គឺជាបំណងប្រាថ្នារបស់សិស្សប្រឡងបាក់ឌុបគ្រប់រូប តែការទទួលបាន និទ្ទេសA មិនមែនទទួលបានដោយងាយស្រួលនោះទេ ពោលគឺត្រូវមានការខិតខំប្រឹង ប្រែងនិងអត់ធ្មត់ខ្លាំង។ សិស្សដែលជាប់និទ្ទេសA ឆ្នាំនេះ មានវិធីសាស្ត្រសិក្សាប្លែកៗពីគ្នា ដើម្បីចែករំលែកដល់អ្នកជំនាន់ក្រោយទៀត។ តើមានគន្លឹះសំខាន់ៗអ្វីខ្លះដែលធ្វើឲ្យសិស្សប្រឡងជាប់និទ្ទេសA?
កញ្ញា ម៉ក សោភ័ណ្ឌ ជាសិស្សនិទ្ទេសA នៅវិទ្យាល័យច្បារអំពៅ (ភ្នំពេញ) ៖ អ្វីដែលធ្វើឲ្យខ្ញុំទទួលជោគជ័យនៅថ្ងៃនេះ គឺដោយសារការខំប្រឹងប្រែងស្តាប់គ្រូពន្យល់ ការរៀនគួរបន្ថែម ការស្រាវជ្រាវលំហាត់ថ្មីៗ ហើយពេលខួរក្បាលហត់ ខ្ញុំតែងមើលភាពយន្ត ឬស្តាប់ចម្រៀងសិន។ខ្ញុំមិនបង្ខំខួរក្បាលខ្ញុំទេ។
កញ្ញា វៀង តេវីត សិស្សទទួលបាននិទ្ទេស A នៅវិទ្យាល័យ ហ៊ុន សែន មង្គលបុរី (បន្ទាយមានជ័យ)៖ គន្លឹះទទួលបាននិទ្ទេស A សម្រាប់ខ្ញុំមានពីរចំណុចសំខាន់ ទី១ការព្យាយាមគឺជារឿងមិនអាចមើលរំលងបាន និងទី២ ខ្ញុំត្រូវចាប់យកចំណុចសំខាន់នៃមេរៀន ព្រោះការស្វែងរកចំណុចសំខាន់នៃមេរៀនធ្វើឲ្យខ្ញុំយល់មេរៀនទាំងមូល។
យុវជន លឹម រស្មី ជាសិស្សនិទ្ទេស A នៅវិទ្យាល័យ ជាស៊ីមសន្ធរម៉ុក(ភ្នំពេញ) ៖ សម្រាប់ខ្ញុំគន្លឹះក្នុងការទទួលបានជោគជ័យនៅថ្ងៃនេះ មាន៦ចំណុចសំខាន់ៈ ទី១ គឺការជឿជាក់លើខ្លួនឯង ហើយអ្វីផ្សេងៗទៀតគ្រាន់តែជាការបន្ទាប់បន្សំតែប៉ុណ្ណោះ ទី២ មិនត្រូវដាក់សម្ពាធលើខ្លួនឯងថា ត្រូវតែបាននិទ្ទេស A នោះទេ ទី៣ ស្វែងយល់ដោយខ្លួនឯង ទី៤ រៀនឲ្យយល់ជាជាងចងចាំ ទី៥ ត្រូវយល់ស្ថានភាពសង្គម ទី៦ ត្រូវប្រមូលលំហាត់ពីគ្រប់មជ្ឈដ្ឋាន ពីគ្រូពីសិស្សពូកែមកមើលទាំងអស់។ 
កញ្ញា អ៊ូង មុនីរាសី សិស្សនិទ្ទេសA នៅវិទ្យាល័យ ព្រះមុនីវង្ស (ខេត្តបាត់ដំបង) ៖ ដើម្បីឲ្យរៀនពូកែជាដំបូងយើងត្រូវតាំងចិត្តឲ្យខ្ពស់ ឆ្ពោះទៅរកគោលដៅដែលយើងចង់បានបំផុត ហើយស្វ័យសិក្សាជាកត្តាសំខាន់មួយ ដែលធ្វើឲ្យខ្ញុំមានចំណេះដឹង។
កញ្ញា វ៉ែន ម៉ុមមុនិតា សិស្សនិទន្ទេសA នៅវិទ្យាល័យទ័ពមានជ័យ (កំពង់ស្ពឺ) ៖ សម្រាប់ខ្ញុំអ្វីដែលខ្ញុំតែងតែធ្វើគឺការអត់ធ្មត់ ព្រោះវាឳសថនាំយើងឆ្ពោះទៅរកភាពជោគជ័យ។ លើសពីនេះ ការបែកចែកកាលវិភាគក៏ជារឿងសំខាន់ ព្រោះដើម្បីគ្រប់គ្រងខ្លួនឯងកុំឲ្យរៀនតាមអារម្មណ៍។ ម្យ៉ាងទៀត ការអានច្រើន ដូចជា សារព័ត៌មាន សៀវភៅ ស្តាប់វិទ្យុ ជាដើម ធ្វើឲ្យខ្ញុំមានចំណេះទូទៅច្រើន ដែលងាយស្រួលក្នុងការសរសេរពេលប្រឡង។ មួយវិញទៀត ការរៀនបែបទន្ទេញឲ្យចាំ មិនមែនជាមធ្យោបាយដែលខ្ញុំតែងធ្វើនោះទេ តែខ្ញុំរៀនឲ្យយល់ប្រសើរជាង។
កញ្ញា រ័ត្ន ច័ន្ទរស្មី ជាសិស្សនិទ្ទេសA នៅវិទ្យាល័យឥន្ទ្រទេវី (ភ្នំពេញ) ៖ គន្លឹះក្នុងការសិក្សា សម្រាប់ខ្ញុំគឺខ្ញុំដកស្រង់បទពិសោធពីសិស្សច្បងដែលពូកែៗនិងរៀនតាមកាលវិភាគឲ្យបានច្បាស់លាស់ ហើយត្រូវគោរពតាមកាលវិភាគនោះឲ្យបានជាដាច់ខាត។ លើសពីនេះ ខ្ញុំធ្វើលំហាត់ជាមួយមិត្តតាម ហ្វេសប៊ុក(facebook) ព្រោះវាងាយស្រួលមិនចាំបាច់ជួបមុខគ្នាក៏អាចរៀន ជាមួយគ្នាដោយងាយស្រួល។ ម្យ៉ាងទៀត វាគ្មានអ្វីសំខាន់ជាងរៀនដោយខ្លួនឯងនោះទេ ព្រោះមានតែខ្លួនឯង ដែលដឹងពីចំណុចខ្សោយឬចំណុចខ្លាំងរបស់ខ្លួនឯង ពេលយើងដឹង ចំណុចខ្សោយរបស់យើង យើងយកទៅសួរគ្រូ ពេលនោះយើងនឹងចេះច្បាស់ និងចាំទុកជារៀងរហូត។គួររម្លឹកថា នៅឆ្នាំនេះមានសិស្សប្រឡងជាប់និទ្ទេសA ចំនួន១០៨ នាក់ បើប្រៀបធៀបនឹង ឆ្នាំមុន ឆ្នាំនេះមានការកើនឡើងចំនួន៩៧នាក់ ។ ជាពិសេសនោះអ្នកជាប់និទ្ទេសA ក្នុងសម័យកំណែទម្រង់របស់រដ្ឋាភិបាល គឺមានលើកទឹកចិត្តច្រើនពីក្រសួងអប់រំ យុវជន និងកីឡា និងប្រជាពលរដ្ឋខ្មែរទូទៅ៕
Tag:
បាក់ឌុប
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 7 ថ្ងៃ
