ជាតិ
នយោបាយជាតិ
×![]()
ដោយ: ម៉ៅ សុផា
លោក ហ៊ុន សែន បានថ្លែងអំណរគុណចំពោះលោក ដុន បេនតុន សមាជិកព្រឹទ្ធសភារដ្ឋវ៉ាស៊ីនតោន សហរដ្ឋអាមេររិក ដែលបានសរសើរ និងចាត់ទុកការដឹកនាំរបស់រដ្ឋាភិបាលកម្ពុជាថា គួរយកជាគំរូតាមក្នុងការការពារអធិបតេយ្យ និងបូរណភាពទឹកដីកម្ពុជា។ នេះបើតាមលិខិតរបស់លោក ហ៊ុន សែន ជូនលោក ដុន បេនតុន ចុះថ្ងៃទី១៨ ខែកញ្ញា ម្សិលមិញ។
ប្រមុខរដ្ឋាភិបាលកម្ពុជា លោក ហ៊ុន សែន បានសរសេរលិខិតឆ្លើយតបលោក ដុន បេនតុន ដើម្បីសម្តែងនូវអំណរគុណដ៏ខ្ពស់ខ្ពស់ចំពោះសមានចិត្ត និងការគាំទ្រ របស់សមាជិកព្រឹទ្ធសភារូបនេះ ដែលបានកោតសរសើរពីការដឹកនាំរបស់ខ្លួន ទាក់ទងនឹងការការពារអធិបតេយ្យភាព និងបូរណភាពទឹកដី។ សមាជិកព្រឹទ្ធសភារូបនេះ បានសរសើរលោក ហ៊ុន សែន តាមរយៈលិខិត ចុះថ្ងៃទី១១ ខែកញ្ញា ឆ្នាំ២០១៥ ។
ខ្លឹមសារលិខិតរបស់លោក ហ៊ុន សែន បានសរសេរថា៖ «ខ្ញុំសូមសម្តែងនូវអំណរគុណដ៏ស្មោះស្ម័គ្រចំពោះសមានចិត្ត និងការគាំទ្រដ៏ខ្លាំងខ្លារបស់ឯកឧត្តម ដែលបានផ្តល់ជូនខ្ញុំក្នុងលិខិតរបស់ឯកឧត្តម សម្រាប់អ្វីដែលខ្ញុំបានធ្វើ ដើម្បីការពារអធិបតេយ្យភាព និងបូរណភាពទឹកដីរបស់កម្ពុជា»។
លោក ហ៊ុន សែន បានបន្តក្នុងលិខិតនេះទៀតថា៖ «ខ្ញុំមានសេចក្តីសោមនស្សរីករាយ ដែលឯកឧត្តមបានយល់ដឹងច្បាស់អំពីអ្វីដែលបានកើតឡើងនៅប្រទេសកម្ពុជាពាក់ព័ន្ធនឹងបញ្ហាផែនទី និងព្រំដែន។ ការយល់ឃើញរបស់ឯកឧត្តមថា ការវាយប្រហារមកលើខ្ញុំ និងរាជរដ្ឋាភិបាលរបស់ខ្ញុំលើបញ្ហាទាំងនេះ គឺគ្មានមូលដ្ឋាន និង ហេតុផលនយោបាយ ជាការផ្តល់យុត្តិធម៌ដល់កិច្ចខិតខំប្រឹងប្រែងរបស់ខ្ញុំ និងរាជរដ្ឋាភិបាល របស់ខ្ញុំ»។
លើសពីនេះទៅទៀត លោក ហ៊ុន សែន ក៏បានសម្តែងការជឿជាក់យ៉ាងមុះមុត ចំពោះលោក ដុន បេនតុន ថា អ្វីដែលរូបលោក និងរាជរដ្ឋាភិបាលរបស់ខ្លួនបានធ្វើ ក្នុងការកំណត់ព្រំដែន និងបោះបង្គោលព្រំដែនជាមួយប្រទេសវៀតណាម បានបង្ហាញយ៉ាងច្បាស់នូវការខិតខំយ៉ាងធំធេង ក្នុងការការពារអធិបតេយ្យភាព និងបូរណភាពទឹកដីរបស់កម្ពុជា៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
